ក្រសួង និងស្ថាប័នចិនជាច្រើន ចេញសេចក្តីថ្លែងការណ៍ផ្ទួនៗគ្នាប្រឆាំងច្បាប់ថវិកាការពារជាតិអាមេរិក

2018-08-15 04:32:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងការពារជាតិ ក្រសួងការបរទេស ក្រសួងពាណិជ្ជកម្ម និងការិយាល័យទទួលបន្ទុកកិច្ចការតៃវ៉ាន់ នៃក្រុមប្រឹក្សារដ្ឋចិន បានចេញសេចក្តីថ្លែងការណ៍ដាច់ដោយឡែកពីគ្នា និងផ្ទួនៗគ្នា ប្រឆាំងនឹងច្បាប់ស្ដីពីថវិកាការពារជាតិអាមេរិកឆ្នាំ២០១៩។ ច្បាប់ថវិកាការពារជាតិនេះ មានទំហំទឹកប្រាក់ ៧១៦ពាន់លានដុល្លារ ជាទំហំទឹកប្រាក់ការពារជាតិប្រចាំឆ្នាំច្រើនបំផុតក្នុងប្រវត្តិសាស្រ្តអាមេរិក ត្រូវបានលោក ដូណាល់ ត្រាំ ប្រធានាធិបតីអាមេរិក ចុះហត្ថលេខាអនុម័ត កាលពីថ្ងៃទី១៣ ខែសីហា ២០១៨។

លោក ដូណាល់ ត្រាំ ប្រធានាធិបតីអាមេរិក ទៅចូលរួមកម្មវិធីយោធាមួយ នាពេលកន្លងមក/ រូបភាព៖ Reuters

ផ្ដើមមុនគេ គឺ**ក្រសួងពាណិជ្ជកម្មចិន** ដែលបានចេញមកឆ្លើយតបភ្លាមៗ ប៉ុន្មានម៉ោងប៉ុណ្ណោះក្រោយលោក ដូណាល់ ត្រាំ ចុះហត្ថលេខាអនុម័តច្បាប់ថវិកាការពារជាតិអាមេរិកឆ្នាំ២០១៩។ ក្រសួងពាណិជ្ជកម្មបញ្ជាក់តាមរយៈសេចក្តីថ្លែងការណ៍របស់ខ្លួនថា ក្រសួងនឹងពិនិត្យគ្រប់ជ្រុងជ្រោយពីច្បាប់ស្ដីពីកញ្ចប់ថវិកាការពារជាតិឆ្នាំ២០១៩ របស់អាមេរិក។ ការពិនិត្យនេះ ដោយសារច្បាប់ស្ដីពីកញ្ចប់ថវិកាការពារជាតិអាមេរិកបានពង្រឹងតួនាទីស្នូលដល់គណៈកម្មាធិការទទួលបន្ទុកវិនិយោគបរទេស ក្នុងការត្រួតពិនិត្យគម្រោងវិនិយោគបរទេស ហើយក្រសួងអំពាវនាវឲ្យមានអនុវត្តឲ្យមានភាពត្រឹមត្រូវចំពោះអ្នកវិនិយោគចិន។

ក្នុងសេចក្តីថ្លែងការណ៍ដដែលនោះបន្ដទៀតថា "ក្រុមហ៊ុនចិន និងក្រុមហ៊ុនអាមេរិកមានកិច្ចសហប្រតិបត្តិការវិនិយោគរឹងមាំ ហើយសក្ដានុពល គឺធំសំបើម។ រដ្ឋាភិបាលនៃប្រទេសទាំងពីរគួរតែស្ដាប់សំឡេងរបស់ក្រុមហ៊ុននានា ហើយផ្ដល់បរិស្ថានល្អមួយ និងការរំពឹងទុកដ៏មានស្ថិរភាពមួយ"។

បន្ទាប់មកទៀត គឺក្រសួងការពារជាតិចិន តាមរយៈអ្នកនាំពាក្យរបស់ខ្លួន គឹលោក Wu Qian បានប្រកាសថា ចិនប្រឆាំងយ៉ាងខ្លាំងទៅនឹងច្បាប់ស្ដីពីថវិកាការពារជាតិអាមេរិកឆ្នាំ២០១៩។ អ្នកនាំពាក្យរូបនេះ បញ្ជាក់ថា ច្បាប់នេះបានពោពេញដោយចិត្តសាស្រ្តសង្រ្គាមត្រជាក់ និងបានបំភ្លៃពីបដិបក្ខភាពរវាងចិន និងអាមេរិក។

លោកបន្ដទៀតថា "ច្បាប់នេះបានលូកលាន់កិច្ចការផ្ទៃក្នុងរបស់ចិន បំផ្លាញទំនុកចិត្ត និងទំនាក់ទំនងទៅវិញទៅមករវាងយោធាប្រទេសទាំងពីរ"។

អ្វីដែលធ្វើឲ្យក្រសួងការពារចិននៅមិនសុខនោះ គឺច្បាប់នេះបានធ្វើការបញ្ជាក់ច្បាស់ៗពីតៃវ៉ាន់ ដោយតម្រូវឲ្យក្រសួងការពារជាតិអាមេរិកធ្វើការវាយតម្លៃគ្រប់ជ្រុងជ្រោយពីភាពរួចរាល់នៃយោធាតៃវ៉ាន់ និងបញ្ចូលការរកឃើញនានាទៅក្នុងរបាយការណ៍មួយបញ្ជូនទៅសភាអាមេរិកក្នុងរយៈពេលមួយឆ្នាំ ជាមួយនិងអនុសាស្រ្តនានា សម្រាប់ពង្រឹងកិច្ចសហប្រតិបតិការអន្តរប៉ាស៊ីហ្វិក។

ពាកព័ន្ធនឹងបញ្ហានេះ អ្នកនាំពាក្យក្រសួងការពារចិនបានបញ្ជាក់ថា "យើងនឹងមិនអនុញ្ញាតឲ្យនរណាម្នាក់ មិនថានៅពេលណា ឬក្នុងទម្រង់ណា បំបែកតៃវ៉ាន់ចេញពីចិននោះទេ"។ លោកបន្ដថា "យើងទាមទារឲ្យអាមេរិកគោរពគោលការណ៍ចិនតែមួយ និងសេចក្តីថ្លែងការណ៍រួមចំនួន៣ រវាងចិន និងអាមេរិក ដើម្បីដោះស្រាយបញ្ហានានាពាក់ព័ន្ធនឹងតៃវ៉ាន់ឲ្យបានត្រឹមត្រូវ"។

ចំណែកក្រសួងការបរទេសចិនវិញ ក៏បានចេញសេចក្តីប្រកាសព័ត៌មានបង្ហាញពីការមិនពេញចិត្តយ៉ាងខ្លាំង និងប្រឆាំងយ៉ាងខ្លាំងទៅនឹងច្បាប់ថវិកាការពារជាតិអាមេរិក ដែលបានរួមបញ្ចូលទាំងមាតិកាអវិជ្ជមានពាក់ព័ន្ធនឹងចិន។

អ្នកនាំពាក្យក្រសួងការបរទេសចិន លោក Lu Kang បានថ្លែងថា ចិនជំរុញឲ្យអាមេរិកទម្លាក់ចោលចិត្តសាស្រ្តសង្រ្គាមត្រជាក់ និងជនឿឈ្នះ-ចាញ់ ដើម្បីពិនិត្យមើលទំនាក់ទំនងនានាជាមួយអាមេរិកដោយត្រឹមត្រូវ និងច្បាស់លាស់។

ដូចគ្នានឹងក្រសួងការពារជាតិចិនដែរ ក្រសួងការបរទេសចិនបានទាមទារឲ្យអាមេរិកគោរពគោលការណ៍ចិនតែមួយ និងសេចក្តីថ្លែងការណ៍រួមចំនួន៣ រវាងចិន និងអាមេរិក ដើម្បីដោះស្រាយបញ្ហានានពាក់ព័ន្ធនឹងតៃវ៉ាន់ឲ្យបានត្រឹមត្រូវ។

ក្រសួងការពារជាតិអាមរិក/ រូបភាព៖ CGTN

ចុងក្រោយ គឺការិយាល័យទទួលបន្ទុកកិច្ចការតៃវ៉ាន់នៃក្រុមប្រឹក្សារដ្ឋចិនបានរិះគន់ច្បាប់ថវិកាការពារជាតិថ្មីរបស់អាមេរិក និងបញ្ជាក់ជាថ្មីពីជំហរប្រឆាំងរបស់ចិនដីគោក ទៅនឹងទំនាក់ទំនងយោធា ឬផ្លូវការណាមួយរវាងអាមេរិក និងតៃវ៉ាន់។

លោក Ma Xiaoguang អ្នកនាំពាក្យការិយាល័យទទួលបន្ទុកកិច្ចការតៃវ៉ាន់នៃក្រុមប្រឹក្សារដ្ឋចិនបញ្ជាក់ថា "យើងប្រឆាំងដាច់ខាតទៅនឹងការលក់អាវុធរបស់អាមេរិកទៅឲ្យតៃវ៉ាន់"។ លោកបន្ដថា "យើងជំរុញឲ្យអាមេរិកជៀសវាងការអនុវត្តលើកថាខណ្ឌនានា ពាក់ព័ន្ធនឹងតៃវ៉ាន់ ដែលមាននៅក្នុងច្បាប់ថវិកាការពារជាតិអាមេរិក ដើម្បីបង្ការការបំផ្លាញទំនាក់ទំនងនានារវាងចិន និងអាមេរិក និងសន្តិភាព និងស្ថិរភាព នៅច្រកសមុទ្រតៃវ៉ាន់"៕

អត្ថបទ៖ វាសនា