ឥណ្ឌា នឹងក្លាយជាប្រទេសទី៤ ដែលបញ្ជូនមនុស្សទៅកាន់អវកាស នៅត្រឹមឆ្នាំ២០២២

2018-08-15 08:11:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយករដ្ឋមន្រ្តីឥណ្ឌា លោក ណារិនដ្រា មូឌី បានប្រកាសថា ឥណ្ឌា នឹងក្លាយជាប្រទេសទី៤ ដែលបញ្ជូនមនុស្សទៅកាន់ទីអវកាសតាមរយៈយានអវកាសរបស់ខ្លួនជាលើកដំបូងនៅត្រឹមឆ្នាំ២០២២ បន្ទាប់ពីអាមេរិក រុស្ស៊ី និងចិន។ ការប្រកាសនេះ ធ្វើឡើងក្នុងពិធីបុណ្យឯករាជ្យជាតិឥណ្ឌា នាថ្ងៃទី១៥ ខែសីហា ឆ្នាំ២០១៨នេះ។

លោកបានថ្លែងយ៉ាងដូច្នេះថា៖ «នៅពេលដែលឥណ្ឌាប្រារព្ធខួបឯករាជ្យលើកទី៧៥ ក្នុងឆ្នាំ២០២២ ឬក៏អាចនៅមុននោះ កូនប្រុស ឬកូនស្រីឥណ្ឌាម្នាក់ នឹងប្រតិបត្តិការបេសកម្មនៅទីអវកាសលើយានអវកាស Gaganyaan ដោយនាំទង់ជាតិឥណ្ឌាទៅជាមួយ»។

លោក ណារិនដ្រា មូឌី ថ្លែងក្នុងពិធីខួបឯករាជ្យជាតិឥណ្ឌា នាថ្ងៃទី១៥សីហា ២០១៨។ រូបថត៖ Times of India

គួររំលឹកថា លោក Rakesh Sharma គឺជាជនជាតិឥណ្ឌាទី១ ដែលបានធ្វើដំណើរទៅកាន់ទីអវកាស កាលពីឆ្នាំ១៩៨៤ ប៉ុន្តែពេលនោះ លោកបានធ្វើដំណើរតាមរយៈគ្រាប់រ៉ុកកែតរបស់រុស្ស៊ីតែប៉ុណ្ណោះ។

គួរកត់សម្គាល់ថា ឥណ្ឌាក៏ធ្លាប់ទទួលបានជោគជ័យបំផុតក្នុងកម្មវិធីអវកាសរបស់ខ្លួនផងដែរ ដោយបានបាញ់បង្ហោះយានអវកាសមួយហៅថា បេសកកម្ម MOM ឬ Mangalyaan ទៅកាន់គន្លងភពអង្គារកាលពីឆ្នាំ២០១៤៕

ប្រភព៖ Indiatimes ប្រែសម្រួល៖ សំភី