រដ្ឋាភិបាលក្រុងវ៉ាស៊ីនតោន ដាក់ទណ្ឌកម្មលើក្រុមហ៊ុនចិន រុស្ស៊ី និងសិង្ហបុរី

2018-08-16 08:53:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលអាមេរិក កាលពីថ្ងៃទី១៥ ខែសីហា ២០១៨ ម្សិលមិញ បានដាក់ទណ្ឌកម្មថ្មីលើបុគ្គល និងក្រមហ៊ុនដឹកជញ្ជូនចំនួន៣ នៅក្នុងប្រទេសចិន រុស្ស៊ី និងសិង្ហបុរី សម្រាប់ការរំលោភលើការរឹតបន្ដឹងស្ដីពីពាណិជ្ជកម្មជាមួយកូរ៉េខាងជើង។

លោក ដូណាល់ ត្រាំ ប្រធានាធិបតីអាមេរិក និងលោក គីម ជុងអ៊ុន មេដឹកនាំកំពូលកូរ៉េខាងជើង ក្នុងជំនូបកំពូលនៅសិង្ហបុរី នាពេលកន្លងមក/ រូបភាព៖ CNN

សេចក្តីប្រកាសរបស់ក្រសួងរតនាគារជាតិអាមេរិកដូច្នេះ គឺក្រោយមានការរិះគន់ពីមន្រ្តីអាមេរិកថា សមាជិកអង្គការសហប្រជាជាតិចាំបាច់ត្រូវអនុវត្តទណ្ឌកម្មលើកូរ៉េខាងជើងឲ្យបានតឹងរឹង ដែលជាផ្នែកមួយនៃកិច្ចខិតខំដើម្បីឲ្យក្រុងព្យុងយ៉ាងរំសាយនុយក្លេអ៊ែរ។

ក្នុងនោះ ក្រសួងរតនាគារជាតិអាមេរិកបានដាក់ទណ្ឌកម្មលើក្រុមហ៊ុនដឹកជញ្ជូនអន្តរជាតិរបស់ចិន Dalian Sun Moon Star International Logistics Trading Co. និងក្រុមហ៊ុនដែលមានស្នាក់ការនៅសិង្ហបុរី SINSMS Pte. Ltd. សម្រាប់ការធ្វើការរួមគ្នាដើម្បីសម្របសម្រួការដឹកជញ្ជូនខុសច្បាប់ទៅកូរ៉េខាងជើង ដោយប្រើប្រាសឯកសារក្លែងក្លាយជាច្រើន ដោយក្នុងនោះ រូមមានការនាំចេញផលិតផលស្រា ថ្នាំជក់ និងបារី។

ជាមួយគ្នានេះ ក្រសួងរតនាគារអាមេរិកបានដាក់ទណ្ឌកម្មលើទីភ្នាក់ងារសេវាកម្មកំពង់ផែរបស់ក្រុមហ៊ុនរុស្ស៊ី Profinet Pte Ltd និងអគ្គនាយកក្រុមហ៊ុននេះ គឺលោក Vasili Aleksandrovich Kolchanov ដែលជាជនជាតិរុស្ស៊ី។ ទណ្ឌកម្មនេះ ដោយសារក្រុមហ៊ុនបានផ្ដល់សេវាកម្មកំពង់ផែយ៉ាងតិច ៦ដង ឲ្យនាវាដែលដោតទង់ជាតិកូរ៉េខាងជើងចូលចត។

ក្រសួងរតនាគារជាតិអាមេរិកប្រកាសថា ក្រសួងនឹងបន្ដអនុវត្តទណ្ឌកម្មដែលមានស្រាប់លើកូរ៉េខាងជើង និងចាត់ចំណាត់ការដើម្បីរារាំង និងដាក់កម្រិតលើក្រុមហ៊ុន កំពង់ផែ និងនាវានានា ដែលសម្របសម្រួលការដឹកជញ្ជូនដោយខុសច្បាប់ទៅកាន់កូរ៉េខាងជើង៕

ប្រភព៖ CNN ប្រែសម្រួល៖ វាសនា