ក្បួនដង្ហែយោធាលោក ដូណាល់ ត្រាំ នឹងត្រូវពន្យារពេលទៅឆ្នាំក្រោយ
- 2018-08-17 01:56:12
- ចំនួនមតិ 0 | ចំនួនចែករំលែក 0
ក្បួនដង្ហែយោធាលោក ដូណាល់ ត្រាំ នឹងត្រូវពន្យារពេលទៅឆ្នាំក្រោយ
ចន្លោះមិនឃើញ
គម្រោងដង្ហែក្បួនយោធា ដែលស្នើសុំដោយលោកប្រធានាធិបតីអាមេរិក ដូណាល់ ត្រាំ នឹងត្រូវលើកពេលប្រារព្ធ ទៅឆ្នាំ២០១៩ខាងមុខវិញ។ នេះបើយោងតាមការប្រកាសរបស់ក្រសួងការពារជាតិអាមេរិក កាលពីថ្ងៃទី១៦ ខែសីហា ឆ្នាំ២០១៨។
អ្នកនាំពាក្យក្រសួងការពារជាតិ លោក Rob Manning បានឲ្យដឹងថា ដើមឡើយក្បួនដង្ហែនេះ គ្រោងនឹងប្រព្រឹត្តនៅថ្ងៃទី១០ ខែវិច្ឆិកា ឆ្នាំ២០១៨។ ពាក់ព័ន្ធនឹងការពន្យារពេលនេះ មិនត្រូវបានលោក Rob បញ្ជាក់ប្រាប់ពីមូលហេតុនៅពីក្រោយនោះទេ។
ប្រភពពីមន្ត្រីអាមេរិកមិនបញ្ចេញឈ្មោះម្នាក់ បានឲ្យសារព័ត៌មាន Reuters ដឹងថា ថ្លៃចំណាយលើសពីការគ្រោងទុក អាចជាបញ្ហាដែលរុញកាលបរិច្ឆេទនៃក្បួនដង្ហែយោធារបស់លោក ត្រាំ។
Reuters បានចុះផ្សាយថា ការដង្ហែយោធា ធ្វើឡើងដើម្បីរំលឹកដល់កងទ័ពជើងចាស់អាមេរិក និងខួបទី១០០នៃការបញ្ចប់សង្គ្រាមលោកលើកទី១។ បើតាមការប៉ាន់ស្មាន ព្រឹត្តិការណ៍នេះនឹងចំណាយអស់ថវិកាជាតិមិនតិចជាង ៩០លានដុល្លារនោះឡើយ ខណៈការគ្រោងទុកពីដើមឆ្នាំរបស់សេតវិមានត្រឹមតែ ១០ ទៅ ៣០លានដុល្លារតែប៉ុណ្ណោះ។
ប្រភពដដែល បានបង្ហើបទៀតថា កញ្ចប់ថវិកាជាង ៩០លានដុល្លារសម្រាប់ក្បូនយោធាអាមេរិក នៅមិនទាន់បានអនុម័តដោយលោក Jim Mattis រដ្ឋមន្ត្រីក្រសួងការពារជាតិនៅឡើយទេ ហើយវាអាចនឹងមានការប្រែប្រួលខ្លះចំពោះការរៀបចំព្រឹត្តិការណ៍នេះ៕