មន្ទីរបញ្ចកោណ៖ យន្តហោះចម្បាំងចិនកំពុងហ្វឹកហាត់សម្រាប់ការវាយប្រហារអាមេរិក
- 2018-08-17 02:07:18
- ចំនួនមតិ 0 | ចំនួនចែករំលែក 0
មន្ទីរបញ្ចកោណ៖ យន្តហោះចម្បាំងចិនកំពុងហ្វឹកហាត់សម្រាប់ការវាយប្រហារអាមេរិក
ចន្លោះមិនឃើញ
យោងតាមរបាយការណ៍ដែលចេញផ្សាយដោយមន្ទីរបញ្ចកោណអាមេរិក កាលពីថ្ងៃទី១៦ ខែសីហា ២០១៨ ម្សិលមិញ បានបញ្ជាក់ថា យន្តហោះទម្លាក់គ្រាប់បែករបស់ចិនជាច្រើនគ្រឿងទំនងកំពុងហ្វឹកហាត់សម្រាប់ការវាយប្រហារលើគោលដៅអាមេរិក និងសម្ព័ន្ធមិត្តនៅក្នុងតំបន់ប៉ាស៊ីហ្វិក។
របាយការណ៍ដដែលនេះក៏បានបញ្ជាក់លម្អិតផងដែរពីមធ្យោបាយដែលក្រុងប៉េកាំងកំពុងធ្វើកំណែទម្រង់ពីកងទ័ពថ្មើរជើងរបស់ខ្លួន ទៅជា "ការហោះហើរ និងជ័យជម្នះសង្រ្គាម" តាមការដាក់ចេញរបស់លោក ស៊ី ជីនពីង ប្រធានាធិបតីចិន។
របាយការណ៍ដែលគ្រោងបញ្ជូនទៅព្រឹទ្ធសភាអាមេរិកនេះ ក៏បានរៀបរាប់ពីការកើនឡើងវិស័យយោធា សេដ្ឋកិច្ច និងការទូតរបស់ចិន និងមធ្យោបាយដែលចិនកំពុងធ្វើសកម្មភាពទាំងនេះ ដើម្បីកសាងរូបភាពជាអន្តរជាតិ និងបង្កើតឥទ្ធិពលតំបន់របស់ខ្លួនឲ្យកាន់តែលឿន។
របាយការណ៍បានបង្ហាញថា យន្តហោះទម្លាក់គ្រាប់បែករបស់ចិនជាច្រើនគ្រឿង កំពុងអភិវឌ្ឍសមត្ថភាពនានា ដើម្បីវាយប្រហារគោលដៅនានា ដែលនៅឆ្ងាយពីប្រទេសចិន។ "ជាង ៣ឆ្នាំចុងក្រោយនេះ កងទ័ពរំដោះប្រជាជនចិនបានពង្រីកយ៉ាងលឿននូវតំបន់ប្រតិបត្តិការទម្លាក់គ្រាប់បែកលើដែនទឹករបស់ខ្លួន កំពុងទទួលបទពិសោធន៍ក្នុងតំបន់ដែនសមុទ្រនានា និងទំនងជាកំពុងហ្វឹកហាត់សម្រាប់ការវាយប្រហារនានាប្រឆាំងនឹងអាមេរិក និងសម្ព័ន្ធមិត្ត"។ នេះបើយោងតាមរបាយការណ៍របស់មន្ទីរបញ្ចកោណអាមេរិក។
នៅខែសីហា ឆ្នាំ២០១៧ យន្តហោះទម្លាក់គ្រាប់បែកចិន H-6K ចំនួន ៦គ្រឿងបានហោះកាត់ច្រកសមុទ្រ Miyako នៅភាគនិរតីនៃប្រទេសជប៉ុន និងបន្ទាប់មកទៀត បានហោះជាលើកដំបូងនៅភាគខាងកើតកោះ Okinawa របស់ជប៉ុន ជាមូលដ្ឋានដែលអាមេរិកដាក់កងទ័ព ៤៧០០០នាក់នៅទីនោះ។
អ្វីដែលកាន់តែធ្វើឲ្យមានការព្រួយបារម្ភនោះ គឺរបាយការណ៍ដដែលនេះបញ្ជាក់ថា កងទ័ពរំដោះប្រជាជនចិនប្រហែលពង្រឹងសមត្ថភាពដើម្បីវាយកងកម្លាំងអាមេរិក និងសម្ព័ន្ធមិត្ត និងមូលដ្ឋានយោធានានា នៅតំបន់មហាសមុទ្រប៉ាស៊ីហ្វិកខាងលិច រួមទាំងកោះ Guam របស់អាមេរិកផងដែរ៕