ឡាវ បង្ហាញក្ដីសោកស្ដាយ និងការអបអរសាទរមកលើកម្ពុជាក្នុងពេលតែមួយ

2018-08-17 07:03:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី១៧ ខែសីហា ឆ្នាំ២០១៨ សម្ដេចនាយករដ្ឋមន្ត្រី ហ៊ុន សែន បានជួបពិភាក្សាការងារជាមួយលោក Prasith Sayasith ឯកអគ្គរដ្ឋទូតឡាវប្រចាំកម្ពុជា ដែលផុតអាណត្តិ។ នេះបើយោងតាមទំព័រហ្វេសប៊ុកផ្លូវការរបស់សម្ដេច ហ៊ុន សែន។

ក្នុងជំនួបនេះ លោកឯកអគ្គរដ្ឋទូតឡាវ បានគោរពសម្ដែងនូវការសោកស្ដាយ ចំពោះគ្រោះទឹកជំនន់ដែលបានកើតឡើងមកលើប្រជាជនកម្ពុជា ដោយសារតែការបាក់ទំនប់វារីអគ្គិសនីនៅក្នុងខេត្តអាត់តាពើ ប្រទេសឡាវ កាលពីថ្ងៃទី២៣ ខែកក្កដាកន្លងទៅ។ បន្ថែមពីនេះ លោកបានអរគុណដល់កម្ពុជា ដែលបានបរិច្ចាគប្រាក់ជំនួយដល់ឡាវ ពាក់ព័ន្ធនឹងគ្រោះមហន្តរាយថ្នាក់ជាតិនេះ។

ក្រៅពីបង្ហាញសេចក្ដីសោកស្ដាយ ភាគីឡាវក៏បានសម្ដែងនូវការអបអរសាទរចំពោះលទ្ធផលបោះឆ្នោតនៅកម្ពុជាផងដែរ។ លោក Prasith Sayasith ថា លោកក៏បានធ្វើជាអ្នកសង្កេតការណ៍ផងដែរ នៅអំឡុងពេលបោះឆ្នោតជ្រើសតាំងតំណាងរាស្ត្រនីតិកាលទី៦របស់កម្ពុជា ដែលជាការបោះឆ្នោតមានតម្លាភាព និងការរៀបចំល្អ។

លោក Prasith Sayasith បានជម្រាបជូនសម្ដេច ហ៊ុន សែន អំពីទំហំពាណិជ្ជកម្មរវាងប្រទេសទាំង២នាពេលកន្លងទៅ ដែលមានការកើនឡើងទ្វេដង គឺពី១០លានដុល្លារ ទៅ ២៤លានដុល្លារ នៅឆ្នាំ២០១៨។

ជាការឆ្លើយតប សម្ដេច បានកោតសរសើរចំពោះលោកឯកអគ្គរដ្ឋទូតឡាវ ដែលបានចូលរួមពង្រឹងចំណងមិត្តភាព និងជំរុញទំហំសេដ្ឋកិច្ចរវាងកម្ពុជា-ឡាវ រយៈពេល៤ឆ្នាំ ២ខែកន្លងមក។ យ៉ាងណាមិញ សម្ដេច បានបញ្ជាក់ថា ទំហំពាណិជ្ជកម្មនេះមិនទាន់សមស្របទៅនឹងសក្ដានុពល ដែលប្រទេសទាំង២មាននោះឡើយ ដូច្នេះសម្ដេចបានស្នើសុំឲ្យមានការប្រឹងប្រែងបន្ថែមទៀតចំពោះកិច្ចការនេះ។

ជាចុងក្រោយ សម្ដេចក៏បានសម្ដែងនូវការចូលរួមសោកស្ដាយចំពោះពលរដ្ឋឡាវ ដែលបានបាត់បង់ជីវិត ដោយសារគ្រោះទឹកជំនន់កាលពីពេលថ្មីៗផងដែរ៕

អត្ថបទ៖ ឈាង.