ក្រសួងផែនការ-ធនាគារជាតិ រួមគ្នាចងក្រងស្ថិតិ និងទិន្នន័យថ្នាក់ជាតិ

2018-08-17 10:07:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងផែនការ និងធនាគារជាតិនៃកម្ពុជា បានសហការប្រមូល និងចងក្រងស្ថិតិ ដើម្បីទុកជាទិន្នន័យជាតិមួយប្រកបដោយភាពត្រឹមត្រូវ សម្រាប់ប្រើប្រាស់ក្នុងការរៀបចំគោលនយោបាយ និងការអភិវឌ្ឍវិស័យសេដ្ឋកិច្ច និងសង្គមនៅកម្ពុជា។ នេះបើតាមការចុះផ្សាយរបស់ AKP នៅថ្ងៃទី១៧ ខែសីហានេះ។

ក្នុងសិក្ខាសាលាស្ដីពីសារៈសំខាន់នៃការចងក្រងស្ថិតិ កាលពីព្រឹកមិញ នៅសណ្ឋាគារភ្នំពេញ លោកស្រី ហង់ លីណា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកវិទ្យាស្ថានជាតិស្ថិតិ នៃក្រសួងផែនការបានបញ្ជាក់ថា ការរៀបចំចងក្រងស្ថិតិ គឺពិតជាមានសារៈសំខាន់ណាស់ ក្នុងការពង្រីកវិសាលភាពទិន្នន័យ ដើម្បីផ្ដល់លទ្ធភាពឱ្យអ្នកសិក្សាស្រាវជ្រាវ សិស្ស និសិ្សត អង្គការជាតិ អន្ដរជាតិ អ្នកវិនិយោគ និងវិស័យឯកជន ស្វែងរក និងទទួលទិន្នន័យបានជាក់លាក់ និងទាន់ពេលវេលា ដើម្បីអាចឆ្លើយតបទៅនឹងតម្រូវការប្រើប្រាស់កាន់តែមានភាពទូលំទូលាយ។

លោកស្រីបានលើកឡើងថា ការចងក្រងទិន្ន័យនេះ គឺជាការចាំបាច់បំផុតក្នុងការផ្គង់ផ្គង់ទិន្នន័យប្រកបដោយគុណភាពសម្រាប់ពង្រីកការយល់ដឹងពីសារៈសំខាន់ស្ថិតិ និងការប្រើប្រាស់ទិន្នន័យទុកជាភស្ដុតាង ក្នុងការធ្វើសេចក្ដីសម្រេចចិត្ត ការតាក់តែងគោលនយោបាយ និងការរៀបចំផែនការអភិវឌ្ឍន៍នានា នៅតាមក្រសួង ស្ថាប័នទាំងក្នុងវិស័យរដ្ឋ និងឯកជន កាន់តែមានប្រសិទ្ធភាពខ្ពស់ ថែមទៀត។

ធនាគារជាតិនៃកម្ពុជា ដែលស្ថិតនៅតាមបណ្តោយមហាវិថីព្រះនរោត្តម

ចំណែកលោកស្រី នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានមានប្រសាសន៍ក្នុងសិក្ខាសាលានេះថា ការចងក្រងស្ថិតិនេះ គឺបានដើរតួនាទីយ៉ាងសំខាន់សម្រាប់អ្នកសិក្សាស្រាវជ្រាវ ក្រុមអ្នកវិភាគ និងអ្នកអនុវត្ដគោលនយោបាយ ដែលចង់ដឹង និងស្វែងរកព័ត៌មាន ទិន្នន័យដែល អាចផ្ដល់នូវភាពត្រឹមត្រូវ និងជឿទុកចិត្ដ សម្រាប់រៀបចំផែនការ ការវិភាគ ការព្យាករពី ស្ថានភាពសេដ្ឋកិច្ច និងការអភិវឌ្ឍជាតិ។

លោកស្រីបន្ដថា នេះគឺជាចំណុចអាទិភាពមួយ ដែលធនាគារជាតិតែងតែយកចិត្តទុកដាក់ខ្ពស់ តាមរយៈការធ្វើបច្ចុប្បន្នកម្ម លើវិធីសាស្រ្ដ ចងក្រង ការពង្រីកវិសាលភាពលើប្រភពទិន្នន័យ និងការកែលម្អវិធីសាស្រ្ដនៃការប្រមូលទិន្នន័យ។ លោកស្រីថា ស្ថិតិដែលមានគុណភាពល្អ គឺជាបុរេលក្ខខណ្ឌមួយសម្រាប់ធនាគារកណ្ដាល អាចសម្រេចបាននូវគោលដៅរក្សាស្ថិរភាពរូបិយវត្ថុ និងហិរញ្ញវត្ថុ ព្រមទាំងជំរុញដល់ការអភិវឌ្ឍវិស័យហិរញ្ញវត្ថុឱ្យមានការរីកចម្រើនថែមទៀត៕

ប្រភព៖ AKP ប្រែសម្រួល៖ សំភី