ថ្ងៃប្រឡងបាក់ឌុប៖ នគរបាលចរាចរណ៍រាជធានី នឹងត្រូវដាក់នៅគ្រប់ដងផ្លូវសំខាន់ៗ
- 2018-08-17 13:11:40
- ចំនួនមតិ 0 | ចំនួនចែករំលែក 0
ថ្ងៃប្រឡងបាក់ឌុប៖ នគរបាលចរាចរណ៍រាជធានី នឹងត្រូវដាក់នៅគ្រប់ដងផ្លូវសំខាន់ៗ
ចន្លោះមិនឃើញ
នៅថ្ងៃទី២០-២១ ខែសីហា ឆ្នាំ២០១៨ ដែលជាថ្ងៃប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) រដ្ឋបាលរាជធានីភ្នំពេញ នឹងដាក់កម្លាំងនគរបាលចរាចរណ៍ នៅគ្រប់ដងផ្លូវសំខាន់ៗទាំងអស់ ជាពិសេសផ្លូវចេញចូលទៅគ្រប់មណ្ឌលប្រឡង ចាប់ពីម៉ោង៥ព្រឹកតទៅ។ នេះបើតាមការបញ្ជាក់របស់លោក នួន ផារ័ត្ន អភិបាលរងរាជធានីភ្នំពេញ ក្នុងកិច្ចប្រជុំស្តីពីការរៀបចំសន្តិសុខ សណ្តាប់ធ្នាប់ នៅថ្ងៃប្រឡងបាក់ឌុប កាលពីព្រឹកថ្ងៃទី១៧ ខែសីហា ឆ្នាំ២០១៨ នៅសាលារាជធានីភ្នំពេញ។ កិច្ចប្រជុំនេះ ក៏មានតំណាងមកពីក្រសួងអប់រំ យុវជន និងកីឡា និងអង្គភាពប្រឆាំងអំពើពុករលួយ ចូលរួមផងដែរ។ នេះបើតាមការចុះផ្សាយរបស់ AKP។
លោក នួន ផារ័ត្ន បានឱ្យដឹងថា នៅថ្ងៃប្រឡងបាក់ឌុបខាងមុខនេះ អាជ្ញាធររាជធានីភ្នំពេញ បានត្រៀមកម្លាំងសមត្ថកិច្ចគ្រប់គ្រាន់ដើម្បីការពារសន្តិសុខ សណ្តាប់ធ្នាប់ និងសុវត្ថិភាព ជូនដល់បេក្ខជនប្រឡងទាំងអស់។
ជាមួយគ្នានេះ លោកក៏បានស្នើឱ្យគ្រប់ស្ថាប័នពាក់ព័ន្ធ និងសមត្ថកិច្ច ត្រូវបន្ដកិច្ចសហការគាំទ្រ ដើម្បីធ្វើការសម្របសម្រួលបេក្ខជន ក្នុងអំឡុងពេលប្រឡងបាក់ឌុបឆ្នាំនេះប្រព្រឹត្តទៅដោយភាពល្អប្រសើរ។
ចំណែកលោក ឃាង សេង អនុប្រធានអង្គភាពប្រឆាំងអំពើពុករលួយ ក្នុងកិច្ចប្រជុំនេះ ក៏បានស្នើឱ្យអាជ្ញាធររាជធានីភ្នំពេញ ចូលរួមការពារសន្តិសុខសណ្តាប់ធ្នាប់ ២៤ម៉ោង លើ២៤ម៉ោង នៅតាមមណ្ឌលប្រឡងទាំងអស់ និងការពារសុវត្ថិភាព នៅមណ្ឌលទាំង១០កន្លែង ក្នុងរាជធានីភ្នំពេញ រហូត ដល់ថ្ងៃទី២៩ ខែសីហា ឆ្នាំ២០១៨។ លោក ឃាង សេង បានបញ្ជាក់ថា អង្គភាពប្រឆាំងអំពើពុករលួយ នឹងដាក់អ្នកសង្កេតការណ៍ស្ម័គ្រចិត្ត ចំនួន ១ ១១៤នាក់ ទូទាំង២៥ មណ្ឌលប្រឡងក្នុងរាជធានីភ្នំពេញនេះ៕