មជ្ឈមណ្ឌលពិសោធន៍ឧស្សាហកម្មធំជាងគេនៅកម្ពុជា នឹងលេចរូបរាងនៅឆ្នាំក្រោយ

2018-08-18 01:20:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពិធីបញ្ចុះបឋមសិលា បើកការដ្ឋានសាងសង់អគារមជ្ឈមណ្ឌលមន្ទីរពិសោធន៍ឧស្សាហកម្មកម្ពុជា ត្រូវបានប្រព្រឹត្តទៅកាលពីថ្ងៃទី១៧ ខែសីហា ឆ្នាំ២០១៨ ដោយគ្រោងនឹងបញ្ចប់ការសាងសង់នៅចុងឆ្នាំ២០១៩ខាងមុខ។ មជ្ឈមណ្ឌលមន្ទីរពិសោធន៍ឧស្សាហកម្មធំជាងគេនៅកម្ពុជានេះ មានទីតាំងស្ថិតនៅតាមបណ្ដោយផ្លូវជាតិលេខ២ តំបន់ចាក់អង្រែលើ ខណ្ឌមានជ័យ រាជធានីភ្នំពេញ។

លោក ចម ប្រសិទ្ធ ដឹកនាំថ្នាក់ដឹកនាំ មន្ត្រី បើកការដ្ឋានសាងសង់អគារមជ្ឈមណ្ឌលមន្ទីរពិសោធន៍ឧស្សាហកម្មកម្ពុជាកាលពីថ្ងៃទី១៧ ខែសីហា ឆ្នាំ២០១៨ (រូបថត៖ ក្រសួងឧស្សាហកម្ម និងសិប្បកម្ម)

ពិធីបញ្ចុះបឋមសិលានេះ ត្រូវបានធ្វើឡើងក្រោមអធិបតីភាពលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ដោយមានការចូលរួមពីថ្នាក់ដឹកនាំ និងមន្ត្រីក្រោមឱវាទក្រសួង។

អគារមជ្ឈមណ្ឌលមន្ទីរពិសោធន៍ឧស្សាហកម្មកម្ពុជា មានកម្ពស់ ៧ជាន់ សាងសង់លើផ្ទៃដី ៦ពាន់ម៉ែត្រការ៉េ ទំហំអគារ ២០ម៉ែត្រ គុណនឹង ៣០ម៉ែត្រ លម្អដោយសួនច្បារ ទីធ្លាចតយានយន្ត និងអាងប្រព្រឹត្តិកម្មទឹក ជាដើម។

រូបតំណាង

មន្ទីរពិសោធន៍នេះនឹងបម្រើអតិថិជន ក្នុងវិស័យឯកជន ជាអ្នកផលិត អាជីវករ និងអ្នកនាំចេញផលិតផល ក្នុងមុខសញ្ញាជាច្រើនដូចជា៖ ផ្នែកម្ហូបអាហារ មីក្រូសរីរាង្គ ផ្នែកគីមី ផ្នែកគីមីមិនមែនម្ហូបអាហារ ផ្នែកមេកានិចនិងយានយន្ត ផ្នែកសម្ភារៈសំណង់ ផលិតផលអេឡិចត្រូនិក ផ្នែកថ្នាំសម្លាប់សត្វល្អិត ផ្នែកសំណង់លោហៈធ្ងន់ និងសំណង់ជាតិពុលជាដើម។ បើតាមលោក ចម ប្រសិទ្ធ បានឲ្យដឹងថា ទីតាំងខាងលើធ្លាប់ជារោងចក្រផលិតសំបកកង់ និងតមក ជារោងចក្រស័ង្កសីបូព៌ា តែត្រូវបានក្ស័យធនជាបន្តបន្ទាប់៕