គណបក្សចំនួន៤ បកស្រាយការមិនចូលរួមកិច្ចប្រជុំពិគ្រោះយោបល់ជាមួយរាជរដ្ឋាភិបាល

2018-08-21 02:37:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សនយោបាយចំនួន១៦ បានចូលរួមក្នុងកិច្ចប្រជុំពិគ្រោះយោបល់ជាមួយរាជរដ្ឋាភិបាល ខណៈគណបក្សនយោបាយចំនួន ៤ទៀត មិនចូលរួមនោះទេ។ នេះបើតាមបញ្ជីសមាសភាពចូលរួមក្នុងកិច្ចប្រជុំពិគ្រោះយោបល់រវាងរាជរដ្ឋាភិបាល និងគណបក្សនយោបាយទាំង២០ ដែលលោក ផៃ ស៊ីផាន អ្នកនាំពាក្យរាជរដ្ឋាភិបាល បានបង្ហោះលើហ្វេសប៊ុករបស់លោក នៅព្រឹកថ្ងៃទី២១ ខែសីហានេះ។

កិច្ចប្រជុំពិគ្រោះយោបល់រវាងរាជរដ្ឋាភិបាល និងគណបក្សនយោបាយ នៅវិមានសន្ដិភាព/ រូបភាព៖ ហ្វេសប៊ុកលោក ផៃ ស៊ីផាន

គណបក្សនយោបាយទាំង៤ ដែលមិនចូលរួមនោះ បានបកស្រាយថា៖

គណបក្សសម្ព័ន្ធដើម្បីប្រជាធិបតេយ្យ បានបញ្ជាក់ថា គណបក្សមិនបានចូលរួមវេទិកាពិគ្រោះយោបល់ជាមួយរាជរដ្ឋាភិបាលទេ។ ការមិនបានចូលរួម ត្រូវបានគណបក្សសម្ព័ន្ធដើម្បីប្រជាធិបតេយ្យលើកឡើងនៅហេតុផលចំនួនពីរ។ ទីមួយ គឺជោគជ័យនៃសំឡេងឆ្នោតដែលគណបក្សប្រជាជនទទួលបាន ស្មើនឹង ១២៥អាសនៈនៅក្នុងរដ្ឋសភា គឺឆ្លុះបញ្ចាំងពីឆន្ទៈប្រជាពលរដ្ឋខ្មែរដែលពេញចិត្ត និងគាំទ្រគោលនយោបាយគណបក្សប្រជាជនកម្ពុជា ដូច្នេះវាជាការគោរពស្មារតី ឬឆន្ទៈពលរដ្ឋដែលគាំទ្រគណបក្សប្រជាជនកម្ពុជា។ ទីពីរ គឺសម្តេចនាយករដ្ឋមន្ត្រី ហ៊ុន សែន បានដាក់លក្ខខណ្ឌថា ការចូលរួមឲ្យយោបល់ពីតំណាងគណបក្សនយោបាយផ្សេងៗ មិនត្រូវពាក់ព័ន្ធនឹងគោលនយោបាយគណបក្សប្រជាជនកម្ពុជាឡើយ។

រីឯគណបក្សប្រជាធិបតេយ្យមូលដ្ឋាន បានប្រកាសថា ខ្លួនមិនចូលរួមនៅក្នុងវេទិកាពិគ្រោះយោបល់ជាមួយរាជរដ្ឋាភិបាលនោះទេ។ គណបក្សនេះ នឹងពិចារណាចូលរួមវេទិកានៅក្រោយពេលរដ្ឋសភា និងរាជរដ្ឋាភិបាល អាណត្តិទី៦ ត្រូវបានបង្កើតឡើង ដែលជាវេទិកាមួយប្រកបដោយភាពស្មោះត្រង់ និងផ្តល់អត្ថប្រយោជន៍ពិតប្រាកដដល់សង្គមជាតិ។

លោក ក្រវ៉ាញ ដារ៉ន ប្រធានគណបក្សខ្មែរឈប់ក្រ បានបញ្ជាក់ថា គណបក្សខ្មែរឈប់ក្រ អត់ទៅចូលរួមវេទិកាពិគ្រោះយោបល់ជាមួយរាជរដ្ឋាបាលទេ។ លោកបានលើកឡើងថា “ខ្ញុំមិនចង់ឲ្យវត្តមានរបស់ខ្ញុំក្លាយទៅជាការចោទប្រកាន់ថា ខ្ញុំជាមនុស្សបង្គ្រប់ច្បាប់ផ្លូវការឲ្យគណបក្សប្រជាជននោះទេ”។

ចំណែក លោក ចាន់ ប៊ុនហន ប្រធានគណបក្សមាតុភូមិយើង បានបញ្ជាក់ថា លោកនៅមិនទាន់សម្រេចចិត្តចូលរួម ឬមិនចូលរួមនៅក្នុងវេទិកាពិគ្រោះយោបល់ជាមួយរាជរដ្ឋាភិបាលនៅឡើយទេ។ លោកបានបញ្ជាក់ថា “បើទៅចូលរួមដើម្បីអបអរសាទរ ខ្ញុំអត់មានអីអបអរសាទរ”៕

អត្ថបទទាក់ទង៖ គណបក្ស១៦ ចូលរួមក្នុងវេទិកាពិគ្រោះយោបល់ជាមួយរាជរដ្ឋាភិបាល នៅព្រឹកនេះ

អត្ថបទ៖ សោភា