ក្រុមហ៊ុនដែលផលិតកាំភ្លើងអាកា៤៧ សម្ញែងរ៉ូបូតពិឃាដថ្មី ទម្ងន់ជាង៤តោន

2018-08-22 08:07:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនផលិតសព្វាវុធរុស្ស៊ី ឈ្មោះ Kalashnikov Concern បានធ្វើការបង្ហាញជាសាធារណៈនូវរ៉ូបូតពិឃាដ ដែលមានកម្ពស់ជិត៤ម៉ែត្រ សម្រាប់បម្រើដល់វិស័យយោធាក្នុងប្រទេសរុស្ស៊ី ក្នុងពិធីតាំងពិព័រណ៍យោធាឆ្នាំ២០១៨ នៅក្រុងម៉ូស្គូ កាលពីពេលថ្មីៗនេះ។

រ៉ូបូត Igorek ត្រូវបានដាក់បង្ហាញនៅពិធីពិព័រណ៍យោធាមួយ នៅក្រុងម៉ូស្គូ (រូបថត៖ Kalashnikov.media)

យោងតាមក្រុមហ៊ុនដែលជាអ្នកផលិតកាំភ្លើងប្រភេទ AK-47 កាលពីទសវត្សរ៍ឆ្នាំ១៩៤០ នេះ បានឲ្យដឹងថា រ៉ូបូតពណ៌មាសដែលមានឈ្មោះថា “Igorek” ជាប្រភេទរ៉ូបូតកំពុងស្ថិតក្នុងការអភិវឌ្ឍនៅឡើយ ដោយមិនទាន់ត្រូវបានបញ្ចេញពីលក្ខណៈសម្បត្តិរបស់វានៅឡើយទេ។ រ៉ូបូតនេះ អាចដើរបាន និងអាចបញ្ជាបានដោយមនុស្សម្នាក់ នៅខាងក្នុង។

Igorek មានទម្ងន់ ៤,៥តោន ហើយអាចចាប់កាន់អាវុធផ្សេងៗបាន។ ផ្នែកខាងក្រៅរបស់វា អាចការពារពីគ្រាប់កាំភ្លើង និងគ្រឿងផ្ទុះ។ វេបសាយរបស់ Kalashnikov បានបញ្ជាក់ថា គោលបំណង២ នៃការបង្កើតរ៉ូបូតនេះ គឺបម្រើដល់វិស្វកម្ម និងសមរភូមិប្រយុទ្ធ។

លោក Vladimir Dmitriev នៃក្រុមហ៊ុន Kalashnikov Concern បានបញ្ជាក់ថា រ៉ូបូតខាងលើគ្រាន់តែដាក់តាំងបង្ហាញសិនតែប៉ុណ្ណោះ។ ចំពោះលក្ខណៈសម្បត្តិរបស់វា នឹងត្រូវបង្ហាញនៅពេលក្រុមហ៊ុនសម្រេចប្រកាសជាផ្លូវការ។

សូមជម្រាបថា ពិធីតាំងពិព័រណ៍យោធានៅក្រុងម៉ូស្គូ មានក្រុមហ៊ុនជាង ១២០០ បានចូលរួម និងបង្ហាញអាវុធថ្មីៗប្រហែល ២៦០០០ ប្រភេទ។

អាវុធធុនស្រាលជាង ៩៥% នៅរុស្ស៊ី ត្រូវបានផ្គត់ផ្គង់ដោយក្រុមហ៊ុន Kalashnikov Concern ។ ជាងនេះទៅទៀត ក្រុមហ៊ុននេះក៏បានចែកចាយទៅកាន់ ២៧ប្រទេសផ្សេងទៀត នៅលើពិភពលោកផងដែរ។ អាវុធល្បីជាងគេរបស់ Kalashnikov Concern គឺ អាកា៤៧ (AK-47) ដែលមានឈ្មោះពេញថា Avtomat Kalashnikov 1947 ៕