Duterte ចោទភ្នាក់ងារអាមេរិកថា លួចស្ដាប់លោកនិយាយទូរសព្ទ និងចង់ធ្វើឃាតលោក

2018-08-23 01:53:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្លែងនៅក្រុង Cebu កាលពីថ្ងៃទី២១សីហា លោកប្រធានាធិបតីហ្វីលីពីន Rodrigo Duterte បានមានប្រសាសន៍ថា ភ្នាក់ងារ CIA នៃសហរដ្ឋអាមេរិក បានលួចស្ដាប់ការសន្ទនារបស់លោក និងអាចធ្វើឃាតរូបលោកថែមទៀតផង។

«ខ្ញុំដឹងថា អាមេរិកកំពុងតែស្ដាប់ខ្ញុំ។ ខ្ញុំដឹងច្បាស់ថា CIA ពួកគេនេះហើយ ដែលនឹងសម្លាប់ខ្ញុំ»។ នេះជាសម្ដីរបស់លោក Duterte ។

លោក Duterte កំពុងនិយាយទូរសព្ទ (រូបថត៖ Reuters)

ដើម្បីចៀសវាងការលួចស្ដាប់តាមស្មាតហ្វូនពីមហាអំណាចមួយចំនួន ប្រធានាធិបតីវ័យ៧៣ឆ្នាំខាងលើ បានបង្ហើបថា លោកកំពុងពិចារណាក្នុងការប្រើប្រាស់ទូរសព្ទស៊េរីធម្មតាមួយ ដែលគេមិនអាចលួចស្ដាប់ បានដោយងាយស្រួលឡើយ។

ទីក្រុងវ៉ាស៊ីនតោន បានបង្ហាញព្រួយបារម្ភពីការធ្លាក់ចុះសិទ្ធិមនុស្សនៅហ្វីលីពីន ជុំវិញសង្គ្រោមប្រឆាំងគ្រឿងញៀនរបស់លោក Duterte ។ ដូច្នេះ ហ្វីលីពីន បានងាកទៅរកប្រទេសចិន និងរុស្ស៊ី វិញ។

កាលពីឆ្នាំ២០១៧ ក្រុងមូស្គូ និងក្រុងម៉ានីល ចុះកិច្ចព្រមព្រៀងយោធាមួយ ស្ដីពីការផ្គត់ផ្គង់កាំភ្លើងរបស់ម៉ាក Kalashnikov ជាង ៥ពាន់គ្រឿង ដោយមិនយកប្រាក់ ដើម្បីរួមចំណែកក្នុងការប្រឆាំងនឹងក្រុមបះបោរឥស្លាម។ បើទោះបីជាទទួលរងសម្ពាធពីសហរដ្ឋអាមេរិកក៏ដោយ ក៏រដ្ឋាភិបាលលោក Duterte កំពុងពិចារណាទិញបន្ថែមនូវ នាវាល្បាត ឧទ្ធម្ភាគចក្រ រថយន្តយោធា និងនាវាមុជទឹកពីរុស្ស៊ី។

ពាក់ព័ន្ធនឹងការទទួលអាវុធពីរុស្ស៊ី លោក Randall Schriver អនុរដ្ឋមន្ត្រីក្រសួងការពារជាតិអាមេរិក ទទួលបន្ទុកកិច្ចការសន្តិសុខអាស៊ី និងប៉ាស៊ីហ្វិក កាលពីដើមខែសីហានេះបានធ្វើការព្រមានក្រុងម៉ានីលពីការទទួលយកអាវុធពីរុស្ស៊ី។ លោក Schriver អះអាងថា ហ្វីលីពីន កំពុងវិនិយោគលើទំនាក់ទំនងមួយជាមួយរុស្ស៊ី៕

ប្រភព៖ RT ប្រែសម្រួល៖ លាភ.