Arsene Wenger បានទៅដល់ទឹកដីអាហ្វ្រិកហើយ

2018-08-23 02:57:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីថ្ងៃទី២២ ខែសីហា ឆ្នាំ២០១៨ អតីតគ្រូបង្វឹកក្លឹប Arsenal លោក Arsene Wenger បានទៅដល់ប្រទេសលីបេរីយ៉ា ដើម្បីទទួលពានរង្វាន់ដ៏ខ្ពង់ខ្ពស់មួយពីប្រធានាធិបតីលីបេរីយ៉ា និងអតីតកីឡាករបាល់ទាត់ លោក George Weah ។

លោក Wenger ត្រូវបានស្វាគមន៍ដោយថ្នាក់ដឹកនាំកំពូលរបស់ប្រទេសលីបេរីយ៉ា ក្នុងដំណើរទៅកាន់ប្រទេសនេះដើម្បីទទួលបានរង្វាន់ដ៏ធំមួយ (រូបថត៖ EPA)

លោក George Weah វ័យ៥១ឆ្នាំ នឹងផ្ដល់កិត្តិយសសម្រាប់លោក Wenger និងលោក Claude Le Roy ដែលបានរួមចំណែកយ៉ាងធំធេង ក្នុងអាជីពរបស់លោក ជាពិសេសកាលពីលោកនៅជាកីឡាករបាល់ទាត់។

លោក Le Roy បានមើលឃើញពីសមត្ថភាពរបស់លោក Goerge Weah ដែលលេងក្នុងតួនាទីជាខ្សែប្រយុទ្ធនៅប្រទេសកាមេរ៉ូន កាលពីទសវត្សរ៍៨០ ហើយបាននាំលោកទៅចូលរួមជាមួយក្លឹប Monaco នៅបារាំង ដែលពេលនោះលោក Wenger ជាអ្នកដឹកនាំ។ បន្ទាប់មក លោក Weah បានជោគជ័យជាបន្តបន្ទាប់ជាមួយក្លឹប PSG និង AC Milan ហើយបានក្លាយជាកីឡាករអាហ្វ្រិកតែម្នាក់គត់ ដែលធ្លាប់ឈ្នះពានរង្វាន់កីឡាករឆ្នើមប្រចាំឆ្នាំរបស់ FIFA កាលពីឆ្នាំ១៩៩៥។

លោក Wenger នឹងទទួលពានរង្វាន់ "Humane Order Of African Redemption" ដែលផ្ដល់ចំពោះបុគ្គលដែលធ្វើសកម្មភាពមនុស្សធម៌នៅប្រទេសលីបេរីយ៉ា។

(រូបថត៖ EPA)

សូមបញ្ជាក់ថា លោក Weah បានចូលនិវត្តន៍ពីអាជីពបាល់ទាត់ ក្នុងឆ្នាំ២០០៣ ។ ក្នុងឆ្នាំ២០១៧ លោកបានទទួលជ័យជម្នះក្នុងការបោះឆ្នោត ក្លាយជាប្រធានាធិបតីរបស់លីបេរីយ៉ា៕

ប្រភព៖ The Sun ប្រែសម្រួល៖ លាភ.