EU បន្តគាំទ្រកម្ពុជាលើកម្មវិធីមួយចំនួន គិតជាទឹកប្រាក់ជាង ១៣០លានដុល្លារ

2018-08-23 04:17:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក George Edgar ឯកអគ្គរដ្ឋទូត និងជាប្រធានប្រតិភូសហភាពអឺរ៉ុបប្រចាំកម្ពុជា បានបង្ហាញពីសុឆន្ទៈនៃកិច្ចសហប្រតិបត្តិការ ក្នុងការបន្តគាំទ្រកម្ពុជា លើកម្មវិធីមួយចំនួនដែលគិតជាទឹកប្រាក់សរុបប្រមាណ ១១៥លានអឺរ៉ូ (ជាង ១៣២លានដុល្លារ)។ ការប្តេជ្ញានេះ ធ្វើឡើងក្នុងជំនួបរវាងលោក George Edgar និងលោកទេសរដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២២ ខែសីហា ឆ្នាំ២០១៨ នៅទីស្តីការក្រសួង។

លោក George Edgar ក្នុងជំនួបពិភាក្សាជាមួយលោក អូន ព័ន្ធមុនីរ័ត្ន កាលពីថ្ងៃទី២២ ខែសីហា ឆ្នាំ២០១៨។ រូបថត៖ FB ក្រសួងសេដ្ឋកិច្ច និងហិរញ្ញវត្ថុ

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចស្តីពីលទ្ធផលនៃជំនួបខាងលើនេះ បានឱ្យដឹងថា កម្មវិធីរបស់រាជរដ្ឋាភិបាលកម្ពុជា ដែល EU ប្តេជ្ញាបន្តគាំទ្រនោះរួមមានដូចខាងក្រោម៖

កម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៣ ពីឆ្នាំ២០២០-២០២១ ប្រមាណ ២២លានអឺរ៉ូ (ជាង ២៥លានដុល្លារ)
កម្មវិធីសម្រាប់កំណើនប្រកបដោយនិរន្តភាព និងបរិយាប័ន្ននៅកម្ពុជា លើវិស័យជលផលប្រមាណ ៨៧លានអឺរ៉ូ (ជាង ១០០លានដុល្លារ)
និងកម្មវិធីសម្ព័ន្ធភាពការប្រែប្រួលអាកាសធាតុកម្ពុជា ដំណាក់កាលទី៣ ប្រមាណ ៦លានអឺរ៉ូ (ជិត ៧លានដុល្លារ)។

ក្នុងជំនួបនេះ លោក អូន ព័ន្ធមុនីរ័ត្ន បានថ្លែងអំណរគុណចំពោះការគាំទ្ររបស់ EU ទាំងជំនួយជាហិរញ្ញប្បទានឥតសំណង និងជំនួយបច្ចេកទេស ដើម្បីគាំទ្រការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈប្រកបដោយជោគជ័យ និងចីរភាព។ លោកបានគូសបញ្ជាក់ថា នេះគឺជាការឆ្លុះបញ្ចាំងឱ្យឃើញអំពីកិច្ចទំនាក់ទំនងល្អរវាងកម្ពុជា និង EU៕

អត្ថបទ៖ សំភី