រកឃើញក្រុមដែលរកគ្រាប់បាល់បានពី VAR លើកដំបូងនៅ La Liga ហើយ

2018-08-27 06:04:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រព័ន្ធជំនួយការអាជ្ញាកណ្ដាល (VAR) ត្រូវបានប្រើប្រាស់ជាលើកដំបូង នៅក្របខណ្ឌ La Liga ក្នុងការប្រកួតរវាងក្លឹប Espanyol និង Valencia នាចុងសប្ដាហ៍កន្លងទៅ ខណៈ Espanyol ជាក្លឹបដែលអាចរកគ្រាប់បាល់បានពី VAR ជាលើកដំបូង នៅ La Liga ។

Espanyol បានយកឈ្នះ Valencia ដោយលទ្ធផល ២-០ ។

គ្រាប់បាល់ទី១ ដែលត្រូវបានផ្ដល់ឲ្យដោយប្រព័ន្ធ VAR នៅក្របខណ្ឌ La Liga ក្នុងការប្រកួតរវាង Espanyol ទល់នឹង Valencia (រូបថត៖ Marca)

គ្រាប់បាល់ដំបូងក្នុងការប្រកួតនេះ កើតឡើងនៅពេលបាល់បានឆ្លងផុតខ្សែបន្ទាត់ទីរបស់ Valencia ។ កីឡាករ Granero របស់ Espanyol បានទាត់បាល់ហ្វ្រីឃីក ទៅប៉ះបង្គោលទី រួចបានខ្ទាតឆ្លងខ្សែបន្ទាត់ ដែលបង្កភាពចម្រូងចម្រាសរវាងកីឡាករក្រុមទាំងពីរ ទើបលោកអាជ្ញាកណ្ដាល Del Cerro Grande សម្រេចប្រើប្រាស់ប្រព័ន្ធ VAR ។

ខុសពីលីគកំពូលនៅអឺរ៉ុបមួយចំនួន លីគកំពូលអេស្ប៉ាញ La Liga មិនប្រើប្រាស់បច្ចេកវិទ្យា Goalline Technology នោះទេ។ VAR ក៏ត្រូវបានបំពាក់នៅលីគកំពូលដូចជា អ៊ីតាលី អាល្លឺម៉ង់ ព័រទុយហ្គាល់ អាមេរិក និងលីគកំពូលអូស្ត្រាលី ផងដែរ។

សូមបញ្ជាក់ថា VAR ត្រូវបានប្រើប្រាស់ជាលើកដំបូង ក្នុងព្រឹត្តិការណ៍ FIFA World Cup 2018 កន្លងទៅ នៅប្រទេសរុស្ស៊ី៕

ទស្សនាការសម្រេចផ្ដល់គ្រាប់បាល់លើកដំបូង ដោយ VAR នៅ La Liga