Facebook ប្ដេជ្ញាប្រើប្រាស់ថាមពលកកើតឡើងវិញឲ្យបាន ១០០% នៅឆ្នាំ២០២០

2018-08-29 06:27:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនបណ្ដាញសង្គមយក្ស Facebook បានប្រកាសកាលពីថ្ងៃទី២៨សីហាថា ខ្លួនកំពុងកាត់បន្ថយការសាយភាយឧស្ម័នផ្ទះកញ្ចប់បានចំនួន ៧៥% ហើយ។ គម្រោងនេះ នឹងបង្កើនភាគរយឲ្យដល់ ១០០ នៃការប្រើប្រាស់ថាមពលកកើតឡើងវិញ នៅត្រឹមចុងឆ្នាំ២០២០ខាងមុខ។

Facebook ប្រាប់ថា ការធ្វើដូចនេះ គឺជាផ្នែកមួយនៃយុទ្ធនាការប្រយុទ្ធប្រឆាំងទៅនឹងការបម្រែបម្រួលអាកាសធាតុ។ Facebook បានចុះកិច្ចសន្យាប្រើប្រាស់ថាមពលព្រះអាទិត្យ និងថាមពលខ្យល់ទំហំច្រើនជាង ៣មេហ្គាវ៉ាត់ គិតចាប់តាំងពីការអនុវត្តនៅឆ្នាំ២០១៣។ គម្រោងថាមពលទាំងនេះ បានដាក់ដំណើរការនៅមជ្ឈមណ្ឌលផ្ទុកទិន្នន័យរបស់ Facebook ជាច្រើនមកហើយ ដូចជា នៅរដ្ឋ Oregon រដ្ឋ Virginia រដ្ឋ New Mexico និងប្រទេសស៊ុយអែត ជាដើម។

កាលពីឆ្នាំ២០១៥ Facebook មានគម្រោងកំណត់ការប្រើប្រាស់ថាមពលកកើតឡើងវិញឲ្យបាន ៥០% គិតត្រឹមដើមឆ្នាំ២០១៨។ យ៉ាងណាមិញ គម្រោងនេះបានលើសពីផែនការដែលបានកំណត់ទៅទៀត ដោយការប្រើប្រាស់ថាមពលឡើងវិញមានចំនួនដល់ទៅ ៥១% នៅត្រឹមឆ្នាំ២០១៧។

សូមជម្រាបថា មិនខុសពី Facebook ក្រុមហ៊ុនបច្ចេកវិទ្យាជាច្រើនទៀតក៏កំពុងស្ទុះស្ទារឿងប្រើប្រាស់ថាមពលកកើតឡើងវិញ ដើម្បីការពារបរិស្ថានផងដែរ។ នៅខែមិថុនា ឆ្នាំ២០១៨ ក្រុមហ៊ុន Samsung បានសន្យាថា ដំណើរការរបស់ខ្លួននៅសហរដ្ឋអាមេរិក អឺរ៉ុប និងចិន នឹងត្រូវប្រើប្រាស់ថាមពលកកើតឡើងវិញឲ្យបានពេញលេញ ១០០% នៅត្រឹមឆ្នាំ២០២០។ Apple និង Google ក៏បានចាប់ផ្ដើមទិញថាមពលកកើតឡើងវិញ ដូចជា ថាមពលព្រះអាទិត្យ និងថាមពលខ្យល់ ផងដែរ គិតតាំងពីខែមេសា៕

ប្រភព៖ The Verge ប្រែសម្រួល៖ ឈាង.