អាមេរិក៖ ចិនគាបសង្កត់កូរ៉េខាងជើង មិនឲ្យលុបបំបាត់កម្មវិធីនុយក្លេអ៊ែរ
- 2018-08-31 06:37:22
- ចំនួនមតិ 0 | ចំនួនចែករំលែក 0
អាមេរិក៖ ចិនគាបសង្កត់កូរ៉េខាងជើង មិនឲ្យលុបបំបាត់កម្មវិធីនុយក្លេអ៊ែរ
ចន្លោះមិនឃើញ
ប្រធានាធិបតីអាមេរិក លោក ដូណាល់ ត្រាំ បានចោទប្រកាន់រដ្ឋាភិបាលចិន អំពីរឿងដែលកូរ៉េខាងជើងមិនព្រមដំណើរការកម្ទេចចោលនូវកម្មវិធីនុយក្លេអ៊ែរ ដូចដែលបានសន្យាកាលពីជំនួបកំពូលនៅសិង្ហបុរី កាលពីខែមិថុនាកន្លងទៅ។
លោក ត្រាំ បានអះអាងថា ចិនបានដាក់សម្ពាធយ៉ាងខ្លាំងទៅលើកូរ៉េខាងជើង ក្រោយពីកើតមានសង្គ្រាមពាណិជ្ជកម្មជាមួយនឹងអាមេរិក។ លោកប្រធានាធិបតី បន្តថា ចិនបានផ្ដល់ជំនួយជាច្រើនប្រភេទទៅឲ្យកូរ៉េខាងជើង ជាថ្នូរនឹងការមិនលុបចោលកម្មវិធីនុយក្លេអ៊ែររបស់ខ្លួន ដូចជា ប្រេងឥន្ធនៈ ជី និងទំនិញមួយចំនួនផ្សេងៗទៀត។
បើទោះជាអ្វីដែលធ្លាប់សន្យាគ្នារវាងអាមេរិក និងកូរ៉េខាងជើង មិនទទួលបានជោគជ័យ លោក ដូណាល់ ត្រាំ បានសង្កត់ធ្ងន់ថា ទំនាក់ទំនងលោក និងមេដឹកនាំកូរ៉េខាងជើង លោក គីម ជុងអ៊ុន គឺនៅតែល្អ និងកក់ក្ដៅដដែល។
"យ៉ាងណាក៏ដោយ លោកប្រធានាធិបតីជឿថា ទំនាក់ទំនងរបស់លោក ជាមួយលោក គីម ជុងអ៊ុន គឺនៅល្អ និងកក់ក្ដៅ ហើយគ្មានមូលហេតុណាមួយនៅពេលនេះដែលត្រូវចំណាយលុយច្រើនសន្ធឹក ដើម្បីធ្វើសមយុទ្ធអាមេរិក-កូរ៉េខាងត្បូងនោះទេ។ ក្រៅពីនេះ លោកប្រធានាធិបតីអាចចាប់ផ្ដើមធ្វើសមយុទ្ធភ្លាមៗជាមួយកូរ៉េខាងត្បូង និងជប៉ុន ប្រសិនបើលោកជ្រើសរើសបែបនេះ។ បើលោកធ្វើមែន នោះវានឹងមានលក្ខណៈធំជាងមុនឆ្ងាយណាស់" នេះជាសារបង្ហោះនៅលើគណនី Twitter ផ្លូវការរបស់លោក ត្រាំ កាលពីថ្ងៃទី៣០ ខែសីហា ឆ្នាំ២០១៨៕