គ្រូណាហ្គា បង្ហាញក្តីបារម្ភ មុនប៉ះទ័ព ក្នុងវគ្គពាក់កណ្តាលផ្តាច់ព្រ័ត្រ Hun Sen Cup

2018-08-31 09:02:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មុនជំនួបជាមួយក្រសួងការពារជាតិ ក្នុងវគ្គពាក់កណ្តាលផ្តាច់ព្រ័ត្រពានរង្វាន់ Hun Sen Cup គ្រូបង្វឹកណាហ្គាវើល លោក មាស ចាន់ណា បានបង្ហាញក្តីបារម្ភដ៏ធំមួយ គឺកង្វះកីឡាករដោយសារតែរបួស និងជាប់ពិន័យ។ នេះបើតាមការចុះផ្សាយរបស់គណៈកម្មការប្រកួតបាល់ទាត់ជាតិកម្ពុជា (CNCC) កាលពីថ្ងៃទី៣០សីហាម្សិលមិញនេះ។

លោក មាស ចាន់ណា បានបង្ហើបថា លោកនឹងដាក់យុវជនមួយចំនួន ដើម្បីបំពេញចន្លោះខ្វះខាត ហើយលោកជឿជាក់កីឡាករវ័យក្មេងទាំងនេះ ថាអាចរ៉ាប់រងការងារជំនួសរៀមច្បងពួកគេបាន។

លោក មាស ចាន់ណា ថ្លែងទៅកាន់អ្នកកាសែត ក្រោយពេលប្រកួតនៅពហុកីឡដ្ឋានជាតិ នាពេលកន្លងមក

ម្ចាស់ពានរង្វាន់គ្រូបង្វឹកសម្បូរប្រជាប្រិយភាពឆ្នាំ២០១៧រូបនេះ បាននិយាយយ៉ាងដូច្នេះថា៖ «**អ្វីដែលព្រួយបារម្ភ គឺកីឡាករឈឺច្រើន ហើយថែមទាំងមានកីឡាករត្រូវព្យួរទៀត សុទ្ធតែសំខាន់ៗទាំងអស់។ លើកនេះមើលទៅយើងប្រើយុវជនហើយ។ ធម្មតាបាល់ទាត់ ចាញ់ឈ្នះ យើងត្រូវតែទទួលហើយ យើងនឹងនៅតែព្យាយាម តែយើងគិតថា ទោះបាត់បង់ ២-៣នាក់ យើងនៅតែល្អអ៊ីចឹង ព្រោះយើងគិតថា ពួកគាត់ក៏មិនអន់ដែរ**»។

យ៉ាងណាក៏ដោយ គ្រូបង្វឹករូបនេះ មិនបានបង្ហើបចំៗថា កីឡាកររូបណាដែលនឹងត្រូវអវត្តមានឡើយ។

សូមជម្រាបថា ក្រុមណាហ្គាវើល នឹងប្រកួតជាមួយក្រសួងការពារជាតិ ក្នុងវគ្គពាក់កណ្តាលផ្តាច់ព្រ័ត្រនេះ នៅថ្ងៃទី១ ខែកញ្ញា ឆ្នាំ២០១៨ វេលាម៉ោង ៦កន្លះល្ងាច នៅពហុកីឡដ្ឋានជាតិ។ ចំណែក១គូទៀត គឺអង្គរថាយហ្គឺរ នឹងប៉ះ អគ្គស្នងការដ្ឋាននគរបាលជាតិ នៅថ្ងៃទី២ ខែកញ្ញា៕