ធារី ចន្ថាប៊ីន អន្ទះសាចង់ជួបក្រុមការងាររបស់ Honda ក្រោយជាប់ជម្រើសជាតិ

2018-09-01 06:36:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ធារី ចន្ថាប៊ីន កីឡាកររបស់ក្លឹប Terengganu នៃក្របខណ្ឌ Malaysian Super League បានលើកឡើងថា ការផ្លាស់ប្ដូរគ្រូបង្វឹកពីមួយទៅមួយ ត្រូវការពេលវេលាដើម្បីឲ្យកីឡាករផ្សាំទៅនឹងបច្ចេកទេស ប៉ុន្តែគេក៏អន្ទះសានឹងរួមការងារជាមួយក្រុមអ្នកចាត់ការ Keisuke Honda ផងដែរ។ នេះបើតាមការចុះផ្សាយរបស់គណៈកម្មការប្រកួតបាល់ទាត់កម្ពុជា (CNCC) នៅរសៀលថ្ងៃទី១ ខែកញ្ញា ឆ្នាំ២០១៨។

ធារី ថតសែលហ្វីជាមួយអ្នកគាំទ្រម្នាក់ នៅពហុកីឡដ្ឋានជាតិ នាពេលកន្លងទៅ

ធារី លើកឡើងថា៖ ***«ខ្ញុំសប្បាយចិត្តមែនទែនដែលបានជាប់ក្នុងក្រុមជម្រើសជាតិ និង ជួបមិត្តរួមក្រុមជាថ្មី។ ខ្ញុំពិតជាអន្ទះសាក្នុងការរួមការងារជាមួយក្រុមគ្រូបង្វឹកថ្មី។ ដូចដែលអ្នកបានដឹងអ៊ីចឹង នៅពេលមានការផ្លាស់ប្ដូរគ្រូបង្វឹក ពួកយើងតែងតែត្រូវការពេលវេលាដើម្បីផ្សាំទៅនឹងតាក់តិច និង ទស្សនៈវិស័យ។ ដូច្នេះ ខ្ញុំសប្បាយចិត្តចំពោះការវិលត្រឡប់នេះ»***។

ធារី ចន្ថាប៊ីន នឹងធ្វើដំណើរពីម៉ាឡេស៊ី មកកាន់កម្ពុជា នៅថ្ងៃទី០៣ ខែកញ្ញា ចូលរួមហ្វឹកហាត់ជាមួយក្រុមបាល់ទាត់ជម្រើសជាតិកម្ពុជា ក្រោមការដឹកនាំពីលោក Felix Gonzales ជំនួយការ Keisuke Honda និងក្រុមការងារដទៃទៀត។

គួរបញ្ជាក់ថា ក្រុមជម្រើសជាតិកម្ពុជា នឹងប្រកួតមិត្តភាពអន្តរជាតិជាមួយក្រុមជម្រើសជាតិម៉ាឡេស៊ី ដែលនឹងប្រព្រឹត្តទៅនាថ្ងៃទី១០ ខែកញ្ញា ឆ្នាំ២០១៨ខាងមុខនេះ៕

អត្ថបទទាក់ទង បញ្ជីឈ្មោះកីឡាករជម្រើសជាតិ២៣នាក់របស់ Honda គ្មានចាន់ វឌ្ឍនាកា នោះទេ

អត្ថបទ៖ លាភ.