យោងតាមរបាយការណ៍​ពីក្រសួងទេសចរណ៍ នៅថ្ងៃទី១ ខែកញ្ញានេះ បានឲ្យដឹងថា ក្នុងរយៈពេល​ ៨ខែដំបូង ឆ្នាំ​២០១៨​នេះ ចំណូលបានពីការលក់បណ្ណទស្សនារមនីយដ្ឋានអង្គរ ទទួលបានជិត ៧៩លានដុល្លារអាមេរិក (៧៨ ៧៧៨ ២០៨ ដុល្លារអាមេរិក) កើនឡើង​ ១៣,៧៩%។

ចំពោះខែសីហាកន្លងទៅ មានភ្ញៀវទេសចរជាង ២០ម៉ឺននាក់ បានទិញបណ្ណចូលទស្សនាតំបន់អង្គរ ទទួលបានចំណូលជាង ៩លានដុល្លារអាមេរិក។

របាយការណ៍​បន្ត​ថា ភ្ញៀវទេសចរ​ចំនួន ១,៧លាននាក់ (១៧៤៤៧០៤នាក់) បានទិញបណ្ណទស្សនារមណីយដ្ឋានអង្គរ កើនឡើង ៨,៤៩% បើធៀបនឹងរយៈពេលដូចគ្នាកាលពីឆ្នាំ២០១៧។

គួរបញ្ជាក់ថា នៅឆ្នាំ២០១៧ មានភ្ញៀវទេសចរចំនួនជិត ២,៥លាននាក់ ទិញបណ្ណចូលទស្សនាតំបន់អង្គរ ដោយទទួលបានចំណូលជិត ១០៨ លានដុល្លារ៕