ក្រសួង ណែនាំពីការបង្ការបញ្ហាសុខភាព ក្រោយទឹកជំនន់ស្រក

2018-09-03 07:11:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៅថ្ងៃទី៣ ខែកញ្ញា ឆ្នាំ២០១៨នេះ បានចេញសេចក្ដីណែនាំ ស្ដីពីការបង្ការបញ្ហាសុខភាពក្រោយទឹកជំនន់ស្រក ជៀសវាងការកើតមានជំងឺមួយចំនួនដូចជា ជំងឺរាក គ្រុនឈាម កមរមាស់ និងជំងឺព្រូនជាដើម។

ពលរដ្ឋ ជម្លៀសទៅកាន់ទីទួលមានសុវត្ថិភាព ពីទឹកជំនន់

លិខិតរបស់ក្រសួងសុខាភិបាល បានណែនាំដូចខាងក្រោម៖

ត្រូវបន្តបរិភោគចំណីអាហារស្អាត-ឆ្អិនល្អ ពិសានិងប្រើប្រាស់ទឹកស្អាត ព្រមទាំងអនាម័យខ្លួនប្រាណ និងឧស្សាហ៍សម្អាតដៃនឹងសាប៊ូរាល់ពេលចម្អិនអាហារ មុនពេលបរិភោគ និងក្រោយពេលបន្ទោបង់
ត្រូវសម្រាន្តក្នុងមុង ដើម្បីការពារជំងឺគ្រុនឈាម គ្រុនចាញ់ និងជំងឺផ្សេងៗ ដែលឆ្លងដោយសារមូស
ត្រូវពិនិត្យមើលផ្ទះសម្បែង ក្រែងមានបាក់ស្រុតនាំឲ្យគ្រោះថ្នាក់ ប្រុងប្រយ័ត្នក្រែងមានសត្វពស់ ឬសត្វអាសិរពិសផ្សេងៗ នៅទីនោះដែលអាចចឹង ឬខាំ
ត្រូវសម្អាតបរិស្ថានជុំវិញផ្ទះ និងក្នុងផ្ទះ ព្រោះក្រោយពេលទឹកស្រកទៅ បានបន្សល់នូវភាពកខ្វក់ កាកសំណល់ និងមេរោគជាច្រើន
ត្រូវលុបថ្លុក ឬកន្លែងដែលមានទឹកដក់ជុំវិញផ្ទះ នាំឲ្យមានដង្កូវទឹក បង្កឲ្យកើតជាមូសខ្លា និងមូសដែកគោល ដែលជាប្រភពបង្កជំងឺគ្រុនឈាម គ្រុនចាញ់ និងជំងឺផ្សេងៗ
ចាំបាច់ត្រូវស្ដារ និងសម្អាតអណ្ដូងទឹកឡើងវិញមុននឹងប្រើប្រាស់
ជួសជុល និងសង់បង្គន់ឡើងវិញ ដោយជានិច្ចកាល ត្រូវបន្ទោបង់ក្នុងបង្គន់គ្រប់ពេល
ហាលកំរាល ឬសម្ភារៈប្រើប្រាស់ដែលសើម និងបើកទ្វារ បើកបង្អួចទាំងអស់ ឲ្យមានលំហូរខ្យល់ចេញចូលគ្រប់គ្រាន់ក្នុងផ្ទះ ដើម្បីកុំឲ្យដុះផ្សិតដែលបង្កឲ្យមានជំងឺរាករូស និងជំងឺផ្លូវដង្ហើម
ចៀសវាងប៉ះខ្សែភ្លើងដែលបានធ្លាក់ចុះ និងត្រូវប្រុងប្រយ័ត្នបំណែកកញ្ចក់ ឬដែកស្រួចនៅក្នុងបរិវេណផ្ទះ ដែលអាចនាំឲ្យមុត ឬរបួស។

ក្រសួងសុខាភិបាល បានអំពាវនាវដល់ប្រជាពលរដ្ឋ ទៅពិនិត្យនិងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតផ្ទះបំផុត ឬទាក់ទងលេខទូរសព្ទទាន់ហេតុការណ៍ដោយឥតគិតថ្លៃ ១១៥ ឬ ទាក់ទងក្រសួងសុខាភិបាល លេខ ០១២ ៨២៥ ៤២៤ (លោក លី សូវ៉ាន់)៕

អត្ថបទ៖ លាភ.