ប្រទេសអាស៊ាន១ ក្លាយជាកន្លែងផ្ទុកទិន្នន័យធំបំផុតរបស់ Facebook ប្រចាំទ្វីបអាស៊ី

2018-09-06 07:20:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនបណ្ដាញសង្គម Facebook នៅថ្ងៃទី៦ ខែកញ្ញា ឆ្នាំ២០១៨នេះ បានប្រកាសថា ខ្លួននឹងចំណាយទឹកប្រាក់ ១,៤ ពាន់លានដុល្លារសិង្ហបុរី (ប្រហែល ១,២ពាន់លានដុល្លារអាមេរិក) ដើម្បីសាងសង់មជ្ឈមណ្ឌលផ្ទុកទិន្នន័យលើកទី១ និងធំបំផុតប្រចាំទ្វីបអាស៊ី នៅក្នុងប្រទេសសិង្ហបុរី។

មជ្ឈមណ្ឌលនេះ ស្ថិតនៅប៉ែកខាងលិច ប្រទេសសិង្ហបុរី ដោយគ្របដណ្ដប់លើផ្ទៃដីសរុប ១៧០០០០ ម៉ែត្រការ៉េ។

គម្រោង មជ្ឈមណ្ឌលផ្ទុកទិន្នន័យរបស់ Facebook នៅប្រទេសសិង្ហបុរី (រូបភាព៖ Facebook Singapore)

លោក Thomas Furlong អនុប្រធាន ទទួលបន្ទុកសាងសង់មជ្ឈមណ្ឌលទិន្នន័យរបស់ Facebook បានប្រាប់អ្នកសារព័ត៌មាននៅក្នុងពិធីបង្ហាញគម្រោងសាងសង់ថា មជ្ឈមណ្ឌលផ្ទុកទិន្នន័យនេះ នឹងផ្ដល់ការងាររាប់ពាន់កន្លែង។ ជាងនេះទៅទៀត វាមានបំពាក់បច្ចេកវិទ្យាចំហាយទឹកក្នុងអគារ ដើម្បីកាត់បន្ថយការប្រើប្រាស់ទឹក និងថាមពល។

លោក Furlong បន្តថា មជ្ឈមណ្ឌលផ្ទុកទិន្នន័យធំបំផុតប្រចាំអាស៊ីនេះ នឹងចាប់ផ្ដើមដំណើរការនៅក្នុងឆ្នាំ២០២២ ហើយបន្ទាប់ទៀត Facebook មានគម្រោងសាងសង់អគារ ថ្មីៗបន្ថែមទៀត នៅទីតាំងដដែល។

ថ្លែងក្នុងពិធីបង្ហាញគម្រោងខាងលើ លោក Chan Chun Sing រដ្ឋមន្ត្រីក្រសួងពាណិជ្ជកម្ម និងឧស្សាហកម្មសិង្ហបុរី បានសាទរចំពោះការសម្រេចជ្រើសរើសប្រទេសសិង្ហបុរីជាទីកន្លែងសម្រាប់ផ្ទុកទិន្នន័យ Facebook លើកដំបូងនៅអាស៊ី និងជាការបោះជំហានដ៏សំខាន់មួយទៀតសម្រាប់សិង្ហបុរី។

យោងតាមរបាយការណ៍ពី Facebook បានឲ្យដឹងថា គិតត្រឹមត្រីមាសទី២ ឆ្នាំ២០១៨ មានអ្នកប្រើប្រាស់ Facebook សកម្ម ចំនួន ២,២ពាន់លាននាក់។ ក្នុងនោះ អ្នកប្រើប្រាស់សកម្មនៅទ្វីបអាស៊ី-ប៉ាស៊ីហ្វិក មានចំនួនជិត ៩០០លាននាក់៕

ប្រភព៖ Channelnewsasia ប្រែសម្រួល៖ លាភ.