ប្រមុខដឹកនាំអាស៊ាន លើកពីជំនាញដ៏សំខាន់មួយ សម្រាប់ទ្រទ្រង់សេដ្ឋកិច្ច

2018-09-12 09:26:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេច ហ៊ុន សែន នាយករដ្ឋមន្ត្រីកម្ពុជា រួមទាំងប្រមុខដឹកនាំនៃប្រទេសវៀតណាម សិង្ហបុរី ឥណ្ឌូណេស៊ី ឡាវ និងភូមា បានចាត់ទុកការរួមសហការលើវិស័យឯកជនជាមួយរដ្ឋាភិបាល ជារឿងចាំបាច់ដើម្បីជំរុញពាណិជ្ជកម្ម និងកំណើនសេដ្ឋកិច្ច។ ជាពិសេស គេត្រូវយកចិត្តទុកដាក់ចំពោះការបណ្ដុះបណ្ដាលជំនាញបច្ចេកវិទ្យា ដែលជាមូលដ្ឋានដ៏សំខាន់សម្រាប់ទ្រទ្រង់ខឿនសេដ្ឋកិច្ចប្រកបដោយចីរភាព។

សម្ដេច ហ៊ុន សែន ថ្លែងក្នុងវេទិកាសេដ្ឋកិច្ចពិភពលោក នៅថ្ងៃទី១២ ខែកញ្ញា ឆ្នាំ២០១៨ នៅក្រុងហាណូយ ប្រទេសវៀតណាម (រូបថត៖ ហ្វេសប៊ុកផ្លូវការរបស់សម្ដេច ហ៊ុន សែន)

ការលើកឡើងនេះ ត្រូវធ្វើឡើងក្នុងវេទិកាសេដ្ឋកិច្ចពិភពលោក លើកទី២៧ ក្រោមប្រធានបទ "យុវជន បច្ចេកវិទ្យា និងកំណើនការធានាពីគុណប្រយោជន៍ផ្នែកប្រជាសាស្ត្រនិងឌីជីថលរបស់អាស៊ាន" នៅទីក្រុងហាណូយ ប្រទេសវៀតណាម នាថ្ងៃទី១២ ខែកញ្ញា ឆ្នាំ២០១៨នេះ ដែលមានការចូលរួមពីបណ្តាមេដឹកនាំ និងផ្នែកធុរកិច្ច អ្នកសេដ្ឋកិច្ច និងម្ចាស់ក្រុមហ៊ុនធំៗលើពិភពលោកជាច្រើនរូប។

យោងតាមទំព័រហ្វេសប៊ុកផ្លូវការរបស់សម្ដេច ហ៊ុន សែន បានឲ្យដឹងថា សព្វថ្ងៃនេះ ពលរដ្ឋជាពិសេសយុវជនកំពុងប្រើប្រាស់ស្មាតហ្វូន និងបច្ចេកវិទ្យាថ្មីៗ រួមទាំងការធ្វើពាណិជ្ជកម្ម និងលក់ទំនិញអនឡាញតាមប្រព័ន្ធអេឡិចត្រូនិក ការប្រើប្រាស់បច្ចេកវិទ្យាគ្រប់គ្រងហិរញ្ញវត្ថុតាមធនាគារ និងទូទាត់តាមប្រព័ន្ធឆ្លាតវៃនានា ព្រមទាំងការប្រើប្រាស់បច្ចេកវិទ្យាដើម្បីទប់ស្កាត់អំពើភេរវកម្មផ្សេងៗ ដែលបានជួយបង្កើតការងារនិងមុខរបរបានយ៉ាងច្រើន។ ទន្ទឹមនឹងនេះ ជំនាញបច្ចេកវិទ្យា កំពុងជួយពន្លឿនដល់សមាហរណកម្មក្នុងតំបន់ ព្រមទាំងជំរុញឲ្យមានទំនាក់ទំនងរវាងពលរដ្ឋ និងពលរដ្ឋកាន់តែប្រសើរឡើងទៀតផង៕

អត្ថបទ៖ លាភ.