ចិន នឹងបញ្ជូនកប៉ាល់បុកបំបែកផ្ទាំងទឹកកក ទៅតំបន់ប៉ូល
- 2018-09-12 12:34:09
- ចំនួនមតិ 0 | ចំនួនចែករំលែក 0
ចិន នឹងបញ្ជូនកប៉ាល់បុកបំបែកផ្ទាំងទឹកកក ទៅតំបន់ប៉ូល
ចន្លោះមិនឃើញ
ចិន បានបង្ហាញកប៉ាល់បុកបំបែកផ្ទាំងទឹកកកលើកទីមួយរបស់ខ្លួន និងគ្រោងបញ្ជូនទៅកាន់តំបន់ប៉ូលទាំងពីរនៃផែនដី ដើម្បីធ្វើការស្រាវជ្រាវ និងរុករកធនធានរ៉ែ។ នេះបើយោងតាមការចុះផ្សាយរបស់វេបសាយ South China Morning Post កាលពីថ្ងៃទី១២ ខែកញ្ញា ឆ្នាំ២០១៨។
កប៉ាល់ដដែល ដំណើរការដោយកម្លាំងស្លាបចក្រ ហើយជាកប៉ាល់ទីមួយលើពិភពលោក ដែលអាចបំបែកផ្ទាំងទឹកកកដោយបើកទៅមុខ និងថយក្រោយ។ Xuelong 2 មានទម្ងន់ ១៤០០០តោន អាចផ្ទុកនាវិក ៩០នាក់ និងអាចដាក់ឧទ្ធម្ភាគចក្រចំនួន ២គ្រឿងផងដែរ។
Xuelong 2 ជាកប៉ាល់បំបែកផ្ទាំងទឹកកកជំនាន់ទី២ បន្ទាប់ពីកប៉ាល់ Xuelong ជំនាន់ទី១ ដែលចិនទិញពីអ៊ុយក្រែន ក្នុងឆ្នាំ ១៩៩៤ និងត្រូវបានធ្វើបច្ចុប្បន្នភាពកាលពីឆ្នាំ២០១៣។ កប៉ាល់ខាងលើ នឹងចាប់ផ្ដើមបេសកកម្មនៅក្នុងឆ្នាំ២០១៩ខាងមុខ។
សូមបញ្ជាក់ថា ចិនក៏មានគម្រោងផលិតកប៉ាល់បំបែកផ្ទាំងទឹកកកជំនាន់ទី៣ ដែលដំណើរការដោយថាមពលនុយក្លេអ៊ែរ។ កប៉ាល់ប្រភេទនេះ ត្រូវបានប្រើប្រាស់ដោយប្រទេសរុស្ស៊ី គឺកប៉ាល់ Akademik Lomonosov ដែលត្រូវបានដាក់ឲ្យដំណើរការកាលពីខែមេសា ឆ្នាំ២០១៨៕