ចិន នឹងបញ្ជូនកប៉ាល់បុកបំបែកផ្ទាំងទឹកកក ទៅតំបន់ប៉ូល

2018-09-12 12:34:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចិន បានបង្ហាញកប៉ាល់បុកបំបែកផ្ទាំងទឹកកកលើកទីមួយរបស់ខ្លួន និងគ្រោងបញ្ជូនទៅកាន់តំបន់ប៉ូលទាំងពីរនៃផែនដី ដើម្បីធ្វើការស្រាវជ្រាវ និងរុករកធនធានរ៉ែ។ នេះបើយោងតាមការចុះផ្សាយរបស់វេបសាយ South China Morning Post កាលពីថ្ងៃទី១២ ខែកញ្ញា ឆ្នាំ២០១៨។

ពិធីដាក់ដំណើរការកប៉ាល់បុកបំបែកផ្ទាំងទឺកកក Xuelong 2 (រូបថត៖ South China Morning Post)

South China Morning Post បានឲ្យដឹងថា កប៉ាល់នេះមានឈ្មោះថា Xuelong 2 ឬ Snow Dragon II ដែលមានការសហការផលិតរវាងក្រុមហ៊ុន China State Shipbuilding Corporation (CSSC) ជាមួយក្រុមហ៊ុន Aker Arctic Technology របស់ប្រទេសហ្វាំងឡង់។ ការផលិតបានចាប់ផ្ដើម កាលពីឆ្នាំ២០១៦ នៅក្រុងសៀងហៃ។

កប៉ាល់ដដែល ដំណើរការដោយកម្លាំងស្លាបចក្រ ហើយជាកប៉ាល់ទីមួយលើពិភពលោក ដែលអាចបំបែកផ្ទាំងទឹកកកដោយបើកទៅមុខ និងថយក្រោយ។ Xuelong 2 មានទម្ងន់ ១៤០០០តោន អាចផ្ទុកនាវិក ៩០នាក់ និងអាចដាក់ឧទ្ធម្ភាគចក្រចំនួន ២គ្រឿងផងដែរ។

Xuelong 2 ជាកប៉ាល់បំបែកផ្ទាំងទឹកកកជំនាន់ទី២ បន្ទាប់ពីកប៉ាល់ Xuelong ជំនាន់ទី១ ដែលចិនទិញពីអ៊ុយក្រែន ក្នុងឆ្នាំ ១៩៩៤ និងត្រូវបានធ្វើបច្ចុប្បន្នភាពកាលពីឆ្នាំ២០១៣។ កប៉ាល់ខាងលើ នឹងចាប់ផ្ដើមបេសកកម្មនៅក្នុងឆ្នាំ២០១៩ខាងមុខ។

កប៉ាល់ Xuelong 2 ផលិតដោយក្រុមហ៊ុនចិន និងក្រុមហ៊ុនហ្វាំងឡង់ (រូបថត៖ South China Morning Post)

សូមបញ្ជាក់ថា ចិនក៏មានគម្រោងផលិតកប៉ាល់បំបែកផ្ទាំងទឹកកកជំនាន់ទី៣ ដែលដំណើរការដោយថាមពលនុយក្លេអ៊ែរ។ កប៉ាល់ប្រភេទនេះ ត្រូវបានប្រើប្រាស់ដោយប្រទេសរុស្ស៊ី គឺកប៉ាល់ Akademik Lomonosov ដែលត្រូវបានដាក់ឲ្យដំណើរការកាលពីខែមេសា ឆ្នាំ២០១៨៕

ប្រភព៖ South China Morning Post ប្រែសម្រួល៖ លាភ.