ចំណូលជាមធ្យមរបស់ប្រជាជនកម្ពុជាម្នាក់ៗ នឹងកើនឡើងស្ទើរជិត ១៥០០ដុល្លារ នៅឆ្នាំនេះ

2018-09-13 07:40:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងឆ្នាំ២០១៨នេះ កម្ពុជានឹងសម្រេចបានកំណើនសេដ្ឋកិច្ចលើសការគ្រោងទុកក្នុងរង្វង់អត្រា ៧,២% ដែលធ្វើឱ្យចំណូលជាមធ្យមរបស់ប្រជាជនម្នាក់ៗ កើនឡើងស្ទើរតែស្មើនឹង ១៥០០ដុល្លារ ជាមួយនឹងអត្រាអតិផរណា ៧% ក្នុង១ឆ្នាំ។ នេះបើយោងតាមសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ ស្តីពីជំនួបរវាងលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច ជាមួយគណៈប្រតិភូអង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ (ARMO) កាលពីថ្ងៃទី១២ កញ្ញា ២០១៨។

លោកស្រី Junhong Chan ប្រធានគណៈប្រតិភូ ក្នុងជំនួបជាមួយលោកឧបនាយករដ្ឋមន្រ្តី អូន ព័ន្ធមុនីរ័ត្ន កាលពីថ្ងៃទី១២កញ្ញា ២០១៨ នៅក្រសួងសេដ្ឋកិច្ច។ រូបថត៖ FB ក្រសួងសេដ្ឋកិច្ច

តាមការវាយតម្លៃរបស់ភាគីទាំង២ខាងលើនេះ គឺបានយល់ឃើញដូចគ្នាថា សមតុល្យពាណិជ្ជកម្មរបស់កម្ពុជាក្នុងឆ្នាំនេះ មានភាពរឹងមាំ និងស្ថានភាពហិរញ្ញវត្ថុល្អប្រសើរ។ ចំណែកការវិនិយោគផ្ទាល់ពីបរទេស ក៏នឹងមានចរន្តកើនឡើងផងដែរ ស្របពេលដែលកម្ពុជា រក្សាបាននូវស្ថានភាពបំណុលល្អប្រសើរ។

ទោះជាយ៉ាងណា សេចក្តីជូនដំណឹងដដែលនេះ បានអះអាងថា សេដ្ឋកិច្ចកម្ពុជា ក៏នឹងប្រឈមផងដែរ ទៅនឹងហានិភ័យនៃកត្តាខាងក្រៅមួយចំនួន ខណៈដែលបញ្ហាប្រឈមក្នុងស្រុក កំពុងបន្តដោះស្រាយ ដើម្បីជំរុញភាពប្រកួតប្រជែងរបស់កម្ពុជា និងជំរុញល្បឿននៃការធ្វើពិពិធកម្មសេដ្ឋកិច្ចឱ្យកាន់តែឆាប់រហ័ស។

សូមបញ្ជាក់ថា ដំណើរទស្សនកិច្ចរបស់គណៈប្រតិភូនេះ ធ្វើឡើងក្នុងគោលបំណងដើម្បីជួបពិភាក្សាជាមួយស្ថាប័នរដ្ឋ និងវិស័យឯកជនពាក់ព័ន្ធ សំដៅប្រមូលទិន្នន័យ និងព័ត៌មានបន្ថែម ដើម្បីជាមូលដ្ឋានសម្រាប់វាយតម្លៃពីនិន្នាការ និងការវិវត្តថ្មីៗ នៃស្ថានភាពសេដ្ឋកិច្ច និងហិរញ្ញវត្ថុរបស់កម្ពុជា៕

អត្ថបទ៖ សំភី