ភាគីថៅកែរោងចក្រ សម្រេចដាក់តួលេខប្រាក់ឈ្នួលអប្បបរមា សម្រាប់ឆ្នាំ២០១៩

2018-09-15 03:24:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

និយោជក (ថៅកែរោងចក្រ) បានដាក់តួលេខចំនួន ១៧៥ដុល្លារអាមេរិក នៅក្នុងដំណើរការកិច្ចពិភាក្សាលើកទី២ ដើម្បីកំណត់ប្រាក់ឈ្នួលអប្បបរមា សម្រាប់កម្មករ និយោជិតក្នុងវិស័យវាយនភណ្ឌកាត់ដេរសម្លៀកបំពាក់ និងផលិតស្បែកជើងសម្រាប់ឆ្នាំ២០១៩។ ដោយឡែក ភាគីខាងសហជីព បានស្នើសុំចំនួន ១៩២ដុល្លារ ខណៈភាគីរដ្ឋាភិបាលដាក់តួលេខ ១៧៧ដុល្លារ។

កម្មការិនី កំពុងធ្វើការងារ នៅរោងចក្រកាត់ដេរសម្លៀងបំពាក់មួយកន្លែង នៅរាជធានីភ្នំពេញ

ក្នុងកិច្ចប្រជុំកាលពីថ្ងៃទី១៤កញ្ញាឆ្នាំ២០១៨នេះ លោក ហេង សួរ អនុប្រធានលេខាធិការដ្ឋាននៃគណៈកម្មការប្រឹក្សាការងារ បានឲ្យដឹងថា ភាគីទាំងអស់បានដាក់ចេញតួលេខផ្លូវការរៀងៗខ្លួនសម្រាប់ប្រាក់ឈ្នួលអប្បបរមាឆ្នាំ២០១៩ខាងមុខ។ លោកបន្តថា រាជរដ្ឋាភិបាលបានផ្ដល់នូវអត្រាជាង ៤ភាគរយ សម្រាប់យកធ្វើគោលក្នុងការពិភាក្សាបន្ត ដើម្បីបង្ខិតតួលេខឲ្យកាន់តែកៀកគ្នា ក្នុងការកំណត់ប្រាក់ឈ្នួលអប្បបរមានៅឆ្នាំ២០១៩ខាងមុខ។ កិច្ចពិភាក្សានេះដែរ ត្រូវធ្វើឡើងដើម្បីរកចំណុចប្រសព្វគ្នាមួយដល់តួលេខដែលជិតគ្នា និងអាចចុះសម្រុងគ្នាដើម្បីកំណត់ប្រាក់ឈ្នួលដល់កម្មករជាចុងក្រោយ។

លោក ហេង សួរ បានមានប្រសាសន៍ថា ក្នុងកិច្ចពិភាក្សានេះដែរគឺភាគីសហជីពបានស្នើសុំឲ្យមានការគាំទ្រទៅលើសុខុមាលភាពរបស់កម្មករនិយោជិតបន្តទៀតការជួយផ្ដល់របបអាហារ និងថ្លៃដឹកជញ្ជូនបន្ថែមពីលើប្រាប់ឈ្នួលជាដើម។

សូមបញ្ជាក់ថា ពាក់ព័ន្ធនឹងការចរចាកំណត់ប្រាក់ឈ្នួលដល់កម្មករនិយោជិតសម្រាប់ឆ្នាំ២០១៩នេះដែរ កាលពីថ្មីៗមកនេះ លោក អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានលើកឡើងថា លទ្ធផលការកំណត់ប្រាក់ឈ្នួលរបស់កម្មករនឹងចេញនៅមុនពិធីបុណ្យភ្ជុំបិណ្ឌប្រពៃណីខ្មែរ។

ចំពោះប្រាក់ឈ្នួលគោលរបស់កម្មករនិយោជិតបច្ចុប្បន្ន គឺចំនួន ១៧០ដុល្លារ ហើយបើបូកផ្សំប្រាក់បន្ថែមម៉ោង និងអត្ថប្រយោជន៍នានា កម្មករម្នាក់ៗអាចទទូលបានប្រាក់ឈ្នួលប្រហែល ២០០ដុល្លារអាមេរិក៕

អត្ថបទទាក់ទង ភាគីសហជីពកំណត់យកតួលេខ ១៩២ដុល្លារ សម្រាប់កិច្ចចរចាប្រាក់ឈ្នួលអប្បបរមាឆ្នាំ២០១៩

ប្រភព៖ រស្មីកម្ពុជា ប្រែសម្រួល៖ លាភ.