ជប៉ុន ចង់នាំយកម៉ាស៊ីនចម្រោះទឹកសមុទ្រ ទន្លេ ទឹកស្អុយ មកកាន់កម្ពុជា

2018-09-15 04:05:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន Techno System Organization for Global Environment Conservation មកពីប្រទេសជប៉ុន បានបង្ហាញពីបំណងក្នុងការនាំចូលម៉ាស៊ីនចម្រោះទឹកស្អាត ដែលជាបច្ចេកវិទ្យារបស់ជប៉ុនដែលមានខ្នាតតូច និងធំ មកប្រតិបត្តិការនៅកម្ពុជា ជាពិសេសតំបន់ដែលមានការខ្វះខាតទឹកស្អាតប្រើប្រាស់។

ការឲ្យដឹងដូច្នេះ ត្រូវបានធ្វើឡើងក្នុងជំនួបពិភាក្សាការងាររវាងលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយប្រតិភូក្រុមហ៊ុន Techno System Organization for Global Environment Conservation ដឹកនាំដោយលោក Yamamoto Tadashi អគ្គលេខាធិការរងនៃក្រុមហ៊ុន នៅទីស្ដីការក្រសួង កាលពីថ្ងៃទី១៣ ខែកញ្ញា ឆ្នាំ២០១៨។

លោក ចម ប្រសិទ្ធ ជួបជាមួយប្រតិភូក្រុមហ៊ុន Techno System Organization for Global Environment Conservation ពិភាក្សាស្ដីពី ការនាំយកម៉ាស៊ីនចម្រោះទឹកស្អាត មកកាន់កម្ពុជា កាលពីថ្ងៃទី១៣ កញ្ញា ឆ្នាំ២០១៨ នៅទីស្ដីការក្រសួងឧស្សាហកម្ម (រូបថត៖ ក្រសួងឧស្សាហកម្ម និងសិប្បកម្ម)

លោក Yamamoto Tadashi បានឲ្យដឹងថា ម៉ាស៊ីនចម្រោះទឹកស្អាតរបស់ក្រុមហ៊ុនលោក មានសមត្ថភាពចម្រោះចេញពីប្រភពទឹកគ្រប់ប្រភេទ ដូចជា ទឹកសមុទ្រ ទឹកទន្លេ បឹង បួរ និងទឹកស្អុយ ជាដើម ឲ្យក្លាយជាទឹកស្អាតអាចផឹក និងប្រើប្រាស់បាន។ លោកបន្តថា ម៉ាស៊ីននេះមិនប្រើប្រាស់ថាមពលអគ្គិសនីទេ តែប្រើប្រាស់ផ្ទាំងសូឡាពីថាមពលព្រះអាទិត្យ។ វាមានសមត្ថភាពផលិតទឹកស្អាត តាមខ្នាតម៉ាស៊ីនតូច ឬ ធំ ចាប់ពី ៧០០លីត្រក្នុងមួយថ្ងៃ រហូតដល់ ៤ម៉ឺនលីត្រក្នុងមួយថ្ងៃ។

លោក ចម ប្រសិទ្ធ បានលើកឡើងថា ម៉ាស៊ីនចម្រោះទឹកស្អាតប្រភេទនេះ មានលក្ខណៈប្រសើរណាស់សម្រាប់ផ្គត់ផ្គង់តំបន់ដីកោះក្នុងខេត្តជាប់មាត់សមុទ្រ តំបន់ដាច់ស្រយាល និងតំបន់ជាយក្រុង ជាពិសេសអាចធ្វើអន្តរាគមន៍ផ្គត់ផ្គង់ទឹកស្អាតជូនដល់ប្រជាពលរដ្ឋពេលជួបគ្រោះទឹកជំនន់ក្នុងប្រទេស។

លោកទេសរដ្ឋមន្ត្រី បានបន្តថា រាជរដ្ឋាភិបាលនឹងគិតគូរពីតម្លៃច្បាស់លាស់តាំងពីការដំឡើង និងប្រភេទរថយន្តដឹកចល័តជាដើម ដើម្បីងាយស្រួលធ្វើការបញ្ជាទិញ ។ ក្នុងនោះ រាជរដ្ឋាភិបាល អាចទិញយកមកប្រើប្រាស់ជាលក្ខណៈកម្ចី ODA (Official Development Assistant) ឬ ជាលក្ខណៈជំនួយឥតសំណង (Grant Aid) ។ ដោយឡែកក្រុមហ៊ុនឯកជន ក៏នឹងអាចមានចំណាប់អារម្មណ៍ផងដែរ បើតម្លៃមានលក្ខណៈសមរម្យ។

ជាការឆ្លើយតប ក្រុមហ៊ុនខាងលើ នឹងនាំចូលប្រភេទម៉ាស៊ីនចម្រោះទឹកស្អាតមួយឈុត មកសាកល្បងជាគំរូ នៅអំឡុងខែក្រោយនេះ ព្រមទាំងបញ្ជាក់ពីតម្លៃរបស់វាផងដែរ ។

សូមជម្រាបថា ក្រុមហ៊ុន Techno System Organization for Global Environment Conservation បានធ្វើប្រតិបត្តិការជាច្រើនប្រទេសលើពិភពលោក ក្នុងជំនាញបច្ចេកទេស ដូចជា ផ្នែកទឹកស្អាត ចំណីអាហារ និងអគ្គិសនីជាដើម៕

អត្ថបទ៖ លាភ.