៥ប្រទេស ដែលងាយស្រួលក្នុងការចូលសញ្ជាតិបំផុត
- 2018-09-15 07:19:21
- ចំនួនមតិ 0 | ចំនួនចែករំលែក 0
៥ប្រទេស ដែលងាយស្រួលក្នុងការចូលសញ្ជាតិបំផុត
ចន្លោះមិនឃើញ
ការចូលសញ្ជាតិនៅប្រទេសមួយចំនួន គឺមានភាពងាយស្រួលជាងប្រទេសមួយចំនួនទៀត។ យោងតាមវេបសាយ Bussiness Insider ដែលចុះផ្សាយកាលពីថ្ងៃទី១៤ ខែកញ្ញា ឆ្នាំ២០១៨ បានបង្ហាញប្រទេសចំនួន៥ ដែលងាយស្រួលចូលសញ្ជាតិបំផុត។
១- ប្រទេសម៉ិកស៊ីកូ៖
គេអាចចូលសញ្ជាតិម៉ិកស៊ីកូបាន បន្ទាប់ពីរស់នៅរយៈពេល ៥ឆ្នាំ។ ប៉ុន្តែ រយៈពេលនេះអាចកាត់បន្ថយមកត្រឹម ២ឆ្នាំ ប្រសិនបើអ្នកស្នើមានជាប់សាច់ឈាមម៉ិកស៊ីកូ មានកូនជនជាតិម៉ិកស៊ីកូ រៀបការជាមួយជនជាតិម៉ិកស៊ីកូ ឬ បានរួមចំណែកជួយផ្នែកណាមួយដល់ប្រទេសម៉ិចស៊ីកូ។ បន្ថែមពីនេះ គេត្រូវចេះនិយាយភាសាអេស្ប៉ាញ និងស្គាល់ប្រវត្តិសាស្ត្ររបស់ម៉ិចស៊ីកូ។ ក៏ប៉ុន្តែ អ្នកស្នើត្រូវបោះបង់សញ្ជាតិដទៃចោល។
២- កាណាដា៖
ដើម្បីស្នើសុំចូលសញ្ជាតិកាណាដា គេត្រូវរស់នៅកាណាដាឲ្យជាប់លាប់ រយៈពេល ១០៩៥ថ្ងៃ ក្នុងអំឡុងរយៈពេល ៥ឆ្នាំ។ អ្នកស្នើត្រូវបានបង់ពន្ធលើប្រាក់បៀវត្សរ៍ រយៈពេល៣ឆ្នាំ ក្នុងអំឡុងពេល៥ឆ្នាំ។ ចំណេះដឹងផ្នែកភាសាអង់គ្លេស និងបារាំង ព្រមទាំងប្រវត្តិសាស្ត្រ តម្លៃ ស្ថាប័ន និងសិទ្ធិនៅកាណាដា ជារឿងចំបាច់ ដើម្បីស្នើសុំចូលសញ្ជាតិ។
៣- អៀរឡង់៖
សម្រាប់អ្នកដែលមានឪពុកម្ដាយ ជីដូនជីតា ចៅ ដែលកើតនៅអៀរឡង់ អាចស្នើចូលសញ្ជាតិបាន។ ម្យ៉ាងទៀត ដើម្បីចូលសញ្ជាតិអៀរឡង់ គេត្រូវរស់នៅក្នុងប្រទេសនេះរយៈពេល ៥ឆ្នាំ (ត្រូវរស់នៅឲ្យជាប់លាប់រយៈពេល១ឆ្នាំ)។
៤- ប៉ារ៉ាហ្គាយ៖
ដើម្បីស្នើចូលសញ្ជាតិប៉ារ៉ាហ្គាយ គេត្រូវជាមនុស្សពេញវ័យ ដែលធ្លាប់រស់នៅរយៈពេល ៣ឆ្នាំ និងរួមចំណែកជួយដល់ប្រទេស ព្រមទាំងមិនធ្លាប់ប្រព្រឹត្តទង្វើល្មើសច្បាប់ណាមួយឡើយ។
៥- អ៊ីស្រាអែល៖
ជនជាតិជ្វីស អាចចូលសញ្ជាតិអ៊ីស្រាអែលបានដោយងាយ ទោះបីជាមិនធ្លាប់រស់នៅអ៊ីស្រាអ៊ែលក៏ដោយ។ ម្យ៉ាងទៀត គេអាចទទួលបានសញ្ជាតិអ៊ីស្រាអ៊ែល ប្រសិនបើមានឪពុកម្ដាយ ជាសញ្ជាតិអ៊ីស្រាអ៊ែល។ មួយវិញទៀត ដើម្បីចូលសញ្ជាតិនេះបាន គេត្រូវរស់នៅជាប់លាប់យ៉ាងតិច ៣ឆ្នាំ ក្នុងអំឡុងពេល ៥ឆ្នាំ មុននឹងដាក់ពាក្យស្នើសុំសញ្ជាតិ។ ហើយគេត្រូវបោះបង់សញ្ជាតិផ្សេងៗផងដែរ៕
រូបថត៖ Business Insider