ថៃ ឈរលើគេនៅអាស៊ាន ជាប្រទេសដែលមានអត្រាសម្លាប់ខ្លួនច្រើនបំផុត

2018-09-17 06:47:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

របាយការណ៍អង្គការសុខភាពពិភពលោក (WHO) បានឲ្យដឹងថា ប្រទេសថៃ មានអត្រាអ្នកសម្លាប់ខ្លួនច្រើនបំផុត គិតនៅក្នុងឆ្នាំ២០១៦ ក្នុងនោះ មនុស្ស ១៤,៤នាក់ ក្នុងចំណោមមនុស្ស ១០ម៉ឺននាក់ បានធ្វើអត្តឃាត។ នេះជាការចុះផ្សាយរបស់វេបសាយ Khaosod English កាលពីថ្ងៃទី១០ ខែកញ្ញា ឆ្នាំ២០១៨។

ក្រុងបាងកក (រូបថត៖ Harshil Shah / Flickr)

របាយការណ៍ WHO បានឲ្យដឹងថា មីយ៉ាន់ម៉ា ឈរលំដាប់ទី២ (មានអត្រាធ្វើអត្តឃាត ៧,៨នាក់ក្នុងចំណោម ១០ម៉ឺននាក់) ម៉ាឡេស៊ី ឈរលេខ៣ (៥,៥នាក់) និង កម្ពុជា ឈរលេខ៤ (៥,៣នាក់)។ នៅទូទាំងពិភពលោក អត្រាសម្លាប់ខ្លួនបានកើនឡើង ៦០% នៅក្នុងរយៈពេល៥ទសវត្សរ៍ចុងក្រោយ។

លោក Boonreung Traireungworarat អគ្គនាយក នៃនាយកដ្ឋានសុខភាពផ្លូវចិត្តថៃ បានឲ្យដឹងថា ក្នុងរយៈពេល១ម៉ោង មានប្រជាជនថៃ ៦នាក់ ព្យាយាមសម្លាប់ខ្លួន ឬ ៥៣០០០ នាក់ក្នុងមួយឆ្នាំ។ ភាគច្រើន ការព្យាយាមមិនទទួលបានជោគជ័យឡើយ។

របាយការណ៍ពីនាយកដ្ឋានខាងលើបន្តថា ពលរដ្ឋថៃ ៣៩៣៤នាក់ បានសម្លាប់ខ្លួនក្នុងឆ្នាំ២០១៧, ធ្លាក់ចុះពី ៤១៣១នាក់ កាលពីឆ្នាំ២០១៦។ ថៃខាតបង់ប្រមាណជា ៤០០លានបាត ឬជាង ១២លានដុល្លារអាមេរិក ដោយសារបញ្ហានេះក្នុងឆ្នាំ២០១៧។ អ្នកសម្លាប់ខ្លួន ភាគច្រើនមានវ័យពី ៣០ ទៅ ៥៩ឆ្នាំ៕

អត្ថបទ៖ លាភ.