រឿង «ផ្នូរគ្មានឈ្មោះ» របស់លោក ប៉ាន់ រិទ្ធី កំពុងត្រូវការគាំទ្រក្នុងស្រុក

2018-09-17 06:55:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភាពយន្ត «ផ្នូរគ្មានឈ្មោះ» របស់អ្នកដឹកនាំរឿង ប៉ាន់ រិទ្ធី កំពុងស្ថិតនៅក្រោមក្រសែភ្នែករបស់គណៈកម្មការជ្រើសរើសអន្តរជាតិ សម្រាប់យកទៅប្រកួតពានរង្វាន់អូស្ការ លើកទី៩១។ ប៉ុន្តែមុនបោះជំហានទៅភាពយន្តមួយនេះត្រូវការ ការគាំទ្ររបស់ទស្សនិកជននៅកម្ពុជាជាមុនសិន ដោយបច្ចុប្បន្ន «ផ្នូរគ្មានឈ្មោះ» កំពុងត្រូវបានចាក់បញ្ចាំងនៅតាមរោងភាពយន្តទំនើបៗទាំងអស់ នៅរាជធានីភ្នំពេញ និងខេត្តសៀមរាប។

លោក ជា សុភាព នាយកប្រតិបត្តិមជ្ឈមណ្ឌលបុប្ផាណា ដែលបានរួមចំណែកផលិតភាពយន្តនេះ លើកឡើងក្នុងសន្និសីទសារព័ត៌មានមួយកាលពីចុងសប្ដាហ៍កន្លងទៅថា រឿង «ផ្នូរគ្មានឈ្មោះ» ជាប្រភពដ៏សំខាន់មួយ ដើម្បីឱ្យក្មេងជំនាន់ក្រោយ បានស្វែងយល់បទពិសោធពីអតីតកាល ដើម្បីសិក្សាពីបច្ចុប្បន្ន និងអនាគត។

លោកបញ្ជាក់ថា៖ «មជ្ឈមណ្ឌលបុប្ផាណាជាកន្លែងរក្សាទុកភាពយន្តឯកសារ ដូច្នេះភាពយន្តមួយនេះ មជ្ឈមណ្ឌល បានធ្វើការគាំទ្រ និងមានមោទនភាព ដែលបានស្ថិតក្នុងក្រសែភ្នែកគណៈកម្មការជ្រើសរើសរឿងចូលរួមទៅលើការប្រកួតនៃពានរង្វាន់ Oscar បែបនេះ»។

រូបភាពពីក្នុងរឿង «ផ្នូរគ្មានឈ្មោះ»

រឿង «ផ្នូរគ្មានឈ្មោះ» និយាយពីព្រលឹងតែលតោល ដែលបានស្លាប់នៅក្នុងរបបប្រល័យពូជសាសន៍ ខ្មែរក្រហម។ ភាពយន្តឯកសារនេះឆ្លុះបញ្ចាំងពីភាពឈឺចាប់ និងការព្យាយាម របស់អ្នកនៅរស់រានមានជីវិត ដើម្បីតាមស្វែងរកឆ្អឹងសាច់ញាតិរបស់ពួកគេ។ រឿងនេះក៏បានឆ្លុះបញ្ចាំងពីជំនឿអរូបីរបស់ខ្មែរផងដែរ។

គណៈកម្មការជ្រើសរើសរឿងនៃពានរង្វាន់ Oscar នៅកម្ពុជា អ្នកស្រី Mariam Arthur ឱ្យដឹងថា ភាពយន្តរបស់អ្នកដឹកនាំ ប៉ាន់ រិទ្ធី នេះ កំពុងស្ថិតក្នុងការពិចារណារបស់គណៈកម្មការជ្រើសរើសរឿងនៅឡើយ។ ភាពយន្តនេះអាចមានឱកាសច្រើនដើម្បីក្លាយខ្លួន ជាជម្រើសសម្រាប់យកទៅប្រកួតប្រជែងពានរង្វាន់ Oscar លុះត្រាណាតែរឿងនេះបានបញ្ចាំងនៅក្នុងស្រុកយ៉ាងហោចណាស់មួយសប្ដាហ៍ ហើយមានអ្នកគាំទ្រច្រើន។

អ្នកស្រីលើកឡើងថា ក្នុងនាមជាគណៈកម្មការជ្រើសរើសរឿង អ្នកស្រីពេញចិត្តភាពយន្តមួយនេះ ព្រោះវាបានបង្ហាញអំពីស្ថានភាពសង្គមពិត។

អ្នកស្រី Mariam Arthur ថ្លែងក្នុងសន្និសីទសារព័ត៌មានស្តីពីរឿង «ផ្នូរគ្មានឈ្មោះ»

បច្ចុប្បន្ន រឿង «ផ្នូរគ្មានឈ្មោះ» កំពុងតែដាក់បញ្ចាំងនៅរោងភាពយន្ត ប៉ារីស អេដិន ក្នុងមជ្ឈមណ្ឌលបុប្ផាណា, Legend Cinema, Prime Cineplex, Major Cineplex តម្លៃសំបុត្រត្រឹមតែ៣ដុល្លារ និង២ ដុល្លារ។ ថវិកាទាំងអស់ដែលទទួលបាន រោងភាពយន្តនឹងផ្ដល់ជូនដល់មជ្ឈមណ្ឌលបុប្ផាណា ដើម្បីទ្រទ្រង់មជ្ឈមណ្ឌលមួយនេះ។

សូមរំលឹកថា កាលពីឆ្នាំ២០១៤ ភាពយន្តរឿង «កង្វះរូបភាព» (The Missing Picture) របស់លោក ប៉ាន់ រិទ្ធី ដដែល ក៏ធ្លាប់ត្រូវគណៈកម្មការជ្រើសរើសភាពយន្តយកទៅប្រកួតក្នុងមហោស្រពភាពយន្តពិភពលោក ពានរង្វាន់អូស្ការនេះផងដែរ ដោយបានជាប់ជម្រើស ៥រឿងចុងក្រោយ៕