សហជីពព្រមបញ្ចុះ ៣ដុល្លារតែនិយោជកព្រមឡើងតែ១ដុល្លារ ក្នុងកិច្ចប្រជុំប្រាក់ឈ្នួលអប្បបរមា

2018-09-19 02:11:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភាគីសហជីព បានបញ្ចុះតួលេខប្រាក់ឈ្នួលអប្បបរមាឆ្នាំ២០១៩ មកត្រឹម១៨៩ដុល្លារ។ ចំណែកភាគីនិយោជកវិញ បានដំឡើងតួលេខដល់ ១៧៦ដុល្លារ។ នេះបើតាមការបញ្ជាក់របស់លោក ហេង សួរ អនុប្រធានលេខាធិការដ្ឋាននៃគណៈកម្មការប្រឹក្សាការងារ ក្រោយកិច្ចពិភាក្សាលើកទី៣ ស្តីពីការកំណត់ប្រាក់ឈ្នួលអប្បបរមាសម្រាប់កម្មករនិយោជិតលើវិស័យវាយនភណ្ឌកាត់ដេរនិងផលិតស្បែកជើង ឆ្នាំ២០១៩ កាលពីថ្ងៃទី១៨ខែកញ្ញាឆ្នាំ២០១៨។ លោកអះអាងថា តាមរយៈតួលេខនេះ គេឃើញថាកាន់តែកៀកគ្នាហើយ ពោលគឺការចរចាប្រាក់ឈ្នួលលើកនេះ មានលក្ខណៈល្អប្រសើរជាងលើកមុន។ ជាមួយគ្នានេះ លោករំពឹងថា នៅកិច្ចប្រជុំថ្ងៃខាងមុខ តួលេខនឹងខិតកាន់តែជិតគ្នាបន្ថែមទៀត ហើយអាចនឹងសម្រេចលទ្ធផលនៅថ្ងៃខាងមុខនេះផ្ងដែរ។

កម្មការិនីនៅរោងចក្រមួយកន្លែង កំពុងទិញចំណីអាហារ ពេលចេញពីធ្វើការ

ក្នុងកិច្ចប្រជុំពិភាក្សាត្រីភាគីនាកន្លងមក ភាគីនីមួយៗបានដាក់ចេញ តួលេខផ្លូវការរៀងៗខ្លួន សម្រាប់ប្រាក់ឈ្នួលអប្បបរមា ឆ្នាំ២០១៩ខាងមុខ ដូចជាភាគីសហជីពចំនួន ១៩២ដុល្លារ ភាគីនិយោជកចំនួន ១៧៥ដុល្លារ និងភាគីរាជរដ្ឋាភិបាលចំនួន ១៧៧ដុល្លារ។

សូមរំលឹកថា កាលពីថ្មីៗនេះ លោក អ៊ិត សំហេង រដ្ឋមន្ត្រីក្រសួងការងារ បានលើកឡើងថាលទ្ធផលនៃការកំណត់ប្រាក់ឈ្នួលរបស់កម្មករ នឹងចេញនៅមុនពិធីបុណ្យភ្នុំបិណ្ឌ។

ប្រាក់ឈ្នួលគោលរបស់កម្មករនិយោជិតបច្ចុប្បន្នចំនួន ១៧០ដុល្លារ ហើយបើបូកផ្សំប្រាក់បន្ថែមម៉ោង និងអត្ថប្រយោជន៍នានាផងកម្មករម្នាក់ៗអាចទទូលបានប្រាក់ឈ្នួលក្នុងខ្ទង់ជាង ២០០ដុល្លារ៕

ប្រភព៖ រស្មីកម្ពុជា ប្រែសម្រួល៖ សំភី