សត្វកន្ធាយក្បាលកង្កែបជាង ៥០០ក្បាល ត្រូវបានព្រលែងឱ្យទៅរស់នៅក្នុងធម្មជាតិវិញ

2018-09-20 06:22:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គការសមាគមអភិរក្សសត្វព្រៃ (WCS) សហការជាមួយរដ្ឋបាលជលផល Wildlife Reserve Singapore និងសម្ព័ន្ធដើម្បីការរស់រានប្រភេទសត្វអណ្តើក (Turtle Survival Alliance) បានលែង កូនសត្វកន្ធាយក្បាលកង្កែប (ឬរមិច) ចំនួន ៥៦៥ក្បាល ឲ្យទៅរស់នៅក្នុងទីជម្រកធម្មជាតិនៅតាមដងទន្លេមេគង្គវិញ។ នេះបើតាមការប្រកាសរបស់អង្គការ WCS នៅថ្ងៃទី២០ កញ្ញា ២០១៨នេះ។

សកម្មភាពព្រលែងសត្វកន្ធាយក្បាលកង្កែប ចូលក្នុងទន្លេមេគង្គ (រូបថត៖ អង្គការ WCS)

លោក ញូន ចន្ទី អ្នកសម្របសម្រួលគម្រោងអភិរក្សសត្វកន្ធាយក្បាលកង្កែបនៃអង្គការ WCS បាននិយាយថា ការលែងកូនកន្ធាយក្បាលកង្កែបនេះ ធ្វើឡើងក្នុងគោលបំណងដើម្បីបង្កើនចំនួនសត្វកន្ធាយក្បាលកង្កែបរស់នៅក្នុងធម្មជាតិ។ ការលែងសត្វនេះ ក៏នឹងជួយបង្កើនប្រាក់ចំណូលសម្រាប់ប្រជាសហគមន៍ និងលើកទឹកចិត្តឲ្យពួកគាត់គាំទ្រ និងចូលរួមក្នុងការអភិរក្សប្រភេទសត្វនេះផងដែរ។

កន្ធាយក្បាលកង្កែបស្ថិតនៅក្នុងបញ្ជីក្រហមរបស់អង្គការ IUCN ដែលជាប្រភេទរងគ្រោះជិតផុតនៅលើសាកលលោក ខណៈចំនួនរបស់វានៅតែបន្តធ្លាក់ចុះគួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ។

សត្វកន្ធាយក្បាលកង្កែប (រូបថត៖ អង្គការ WCS)

អង្គការ WCS បានសរសេរនៅលើទំព័រហ្វេសប៊ុករបស់ខ្លួនយ៉ាងដូច្នេះថា៖ «យើងបានគិតថាកន្ធាយក្បាលកង្កែប បានផុតពូជពីកម្ពុជាទៅហើយ រហូតដល់ឆ្នាំ២០០៧ គេបានរកឃើញវត្តមានពួកវាម្តងទៀតនៅក្នុងបរិវេណ ៤៨គីឡូម៉ែត្រនៅដងទន្លេមេគង្គចន្លោះខេត្តក្រចេះ និងខេត្តស្ទឹងត្រែង»។

ចាប់តាំងពីឆ្នាំ២០០៧មក អង្គការ WCS បានអនុវត្តគម្រោងអភិរក្សកន្ធាយក្បាលកង្កែប (កន្លងមកអនុវត្តដោយអង្គការអភិរក្សអន្តរជាតិ) ដោយសហការជាមួយរដ្ឋបាលជលផល និងសម្ព័ន្ធដើម្បីការរស់រានប្រភេទសត្វអណ្តើក។

បើតាមអង្គការដដែលនេះ បន្ថែមថា តាមរយៈកម្មវិធីការពារសំបុកសត្វនេះ បានលើកទឹកចិត្តឲ្យប្រជាសហគមន៍ រស់នៅខេត្តក្រចេះ និងស្ទឹងត្រែង ចូលរួមការពារសត្វកន្ធាយក្បាលកង្កែប ដោយបានជ្រើសរើសអតីតអ្នកប្រមូលពង និងមេពូជកន្ធាយក្បាលកង្កែបឲ្យមកធ្វើការងារជាបុគ្គលិករបស់គម្រោង ដើម្បីស្វែងរក និងការពារសំបុកសត្វកន្ធាយក្បាលកង្កែបជំនួសឲ្យការប្រមូលយកពង និងមេពូជសម្រាប់ហូប និងលក់។ «ចាប់តាំងពីពេលនោះមក យើងបានការពារសំបុកពងកូនបានចំនួន ៤០២សំបុក និងបានលែងកូនកន្ធាយក្បាលកង្កែបចំនួន ៩០៤៧កូន»៕

អត្ថបទ៖ សំភី