លោកគីម ជុងអ៊ុន ជួយសម្រេចក្ដីស្រមៃរបស់លោក មូន ចេអ៊ីន

2018-09-20 06:36:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គីម ជុងអ៊ុន មេដឹកនាំកូរ៉េខាងជើង នៅថ្ងៃទី២០ ខែកញ្ញានេះ បានជូនលោក មូន ចេអ៊ីន ប្រធានាធិបតីកូរ៉េខាងត្បូង ឡើងលើកំពូលភ្នំ Paektu នៅកូរ៉េខាងជើង។ ការឡើងលើកំពូលភ្នំនេះ ត្រូវបានលោក មូន បង្ហើបថា គឺជាក្ដីស្រមៃរបស់លោកជាយូរមកហើយ។

លោក មូន ចេអ៊ីន ធ្លាប់បានប្រាប់ទៅកាន់លោក គីម ជុងអ៊ុន ដូច្នេះកាលពីជំនួបក្នុងខែមេសាកន្លងទៅ នៅតំបន់គ្មានយោធា ដែលជាព្រំដែនខណ្ឌចែកប្រទេសទាំងពីរ។

លោក គីម ជុងអ៊ុន បានចាប់លើកដៃរបស់លោក មូន ចេអ៊ីន បន្ទាប់ពីអ្នកទាំងពីរ បានឡើងលើកំពូលភ្នំ Paektu នៅព្រឹកថ្ងៃទី២០ ខែកញ្ញានេះ (រូបថត៖ South China Morning Post)

បើតាមរូបថត លោក គីម ជុងអ៊ុន បានចាប់លើកដៃរបស់លោក មូន ចេអ៊ីន ដើម្បីបង្ហាញពីការបង្រួបបង្រួម ក្រោយភាគីទាំងពីរ បានសម្រេចចុះហត្ថលេខាលើកិច្ចព្រមព្រៀងរំសាយទីតាំងតេស្តសាកល្បងគ្រាប់មីស៊ីល Tongchang-ri ។

សូមជម្រាបថា ភ្នំ Paektu ក៏មាននៅក្នុងចម្រៀងភ្លេងជាតិរបស់កូរ៉េខាងត្បូងផងដែរ។ ចំណែកកូរ៉េខាងជើង បានអះអាងថា លោក គីម ជុងអ៊ីល ដែលត្រូវជាឪពុករបស់លោក គីម ជុងអ៊ុន បានកើតនៅទីនោះ និងហៅភ្នំនេះថា ជាភ្នំដ៏ពិសិដ្ឋ នៃបដិវត្តន៍។

ក្រោយឡើងភ្នំ Paektu លោក មូន ត្រឡប់ទៅកាន់ក្រុងសេអ៊ូលវិញ បន្ទាប់ពីបញ្ចប់ដំណើរទស្សនកិច្ចផ្លូវការរយៈពេល ៣ថ្ងៃ៕

អត្ថបទទាក់ទង

ប្រភព៖ South China Morning Post ប្រែសម្រួល៖ លាភ.