អាជ្ញាធរ កំណត់គោលដៅចុះបង្ក្រាបគ្រឿងញៀន ១០ទីតាំងក្នុងរាជធានីភ្នំពេញ
- 2018-09-20 09:58:49
- ចំនួនមតិ 0 | ចំនួនចែករំលែក 0
អាជ្ញាធរ កំណត់គោលដៅចុះបង្ក្រាបគ្រឿងញៀន ១០ទីតាំងក្នុងរាជធានីភ្នំពេញ
ចន្លោះមិនឃើញ
លោកនាយឧត្តមសេនីយ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា អាជ្ញាធរបានកំណត់យកក្លឹបកម្សាន្ត និងទីកន្លែងសប្បាយចំនួន ១០ទីតាំងនៅរាជធានីភ្នំពេញ ដើម្បីចុះបង្ក្រាបគ្រឿងញៀន។ ការថ្លែងនេះ ធ្វើឡើងក្នុងកិច្ចប្រជុំពាក់ព័ន្ធ នឹងការងារប្រយុទ្ធប្រឆាំងគ្រឿងញៀន នៅសាលារាជធានីភ្នំពេញ កាលពីព្រឹកថ្ងៃទី២០ ខែកញ្ញា ឆ្នាំ២០១៨។
លោកបានមានប្រសាសន៍យ៉ាងដូច្នេះថា៖ «ការទប់ស្កាត់ការប្រើប្រាស់ និងជួញដូរគ្រឿងញៀន ដែលយើងមិនទាន់ចូលទៅដល់ ពិសេសក្លឹបកម្សាន្ត និងទីកន្លែងសប្បាយ។ យើងបានដាក់ទៅឱ្យអាជ្ញាធរ ខណ្ឌ សង្កាត់ តែបើធ្វើមិនបាន ត្រូវរាយការណ៍ មកអាជ្ញាធររាជធានី ដើម្បីចាត់តាំង អនុវត្តការងារនេះបន្ត»។
អាជ្ញាធរ ក៏នឹងធ្វើការបិទសេចក្តីប្រកាស ចំនួន ២៣៩៨កន្លែងផងដែរ ដែលមានទាំងផ្ទះសំណាក់ និងខុនដូ។ ដោយឡែក ការចាប់ពិនិត្យមើលទឹកនោមរបស់អ្នកប្រើប្រាស់ថ្នាំគ្រវី នឹងត្រូវធ្វើឡើងនៅតាមក្លឹប។ «ការងារនេះ ភ្នំពេញ ត្រូវបានសម្រេចជាគំរូមុនគេ បន្ទាប់មកខេត្តព្រះសីហនុ និងសៀមរាប បើមានបញ្ហានៅកន្លែងណា អាជ្ញាធរនៅទីនោះ ជាអ្នកទទួលខុសត្រូវ។ បើទីតាំងណាធ្វើខុសពីការណែនាំ យើងមានសិទ្ធិក្នុងការបិទទីតាំងនោះតែម្តង»។ លោកនាយឧត្តមសេនីយ មាស វិរិទ្ធ បញ្ជាក់បន្ថែម។
ជាមួយគ្នានេះ លោក ឃួង ស្រេង អភិបាលរាជធានីភ្នំពេញ បានថ្លែអក្នុងកិច្ចប្រជុំនេះថា បញ្ហាគ្រឿងញៀន ជាបញ្ហាធំ ដោយលោកបានជំរុញឱ្យគ្រប់សង្កាត់ និងខណ្ឌទាំង១២ ចុះត្រួតពិនិត្យនៅតំបន់ស្មុគស្មាញ និងតំបន់ដែលអាជ្ញាធរមិនធ្លាប់ចុះទៅដល់៕