កម្ពុជានឹងចុះបញ្ជីនាំចេញសម្បុកត្រចៀកកាំទៅកាន់ទីផ្សារចិន
- 2018-09-21 03:30:31
- ចំនួនមតិ 0 | ចំនួនចែករំលែក 0
កម្ពុជានឹងចុះបញ្ជីនាំចេញសម្បុកត្រចៀកកាំទៅកាន់ទីផ្សារចិន
ចន្លោះមិនឃើញ
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងនៅថ្ងៃទី២១ ខែកញ្ញា ឆ្នាំ២០១៨ នេះថា កម្ពុជាបានស្នើសុំទៅចិន ដើម្បីធ្វើការនាំចូលសម្បុកត្រចៀកកាំ ក្នុងចំណោមផលិតផលកសិកម្មជាច្រើនទៀត។
លោករដ្ឋមន្ត្រី បានបន្តថា ការណ៍នេះទាមទារឲ្យកម្ពុជាត្រូវរៀបចំខ្លួនឲ្យបានរួចរាល់ក្នុងការចុះបញ្ជីការចិញ្ចឹមសត្វត្រចៀកកាំ ដោយមានការត្រួតពិនិត្យយ៉ាងត្រឹមត្រូវ ដូចជាផ្នែកអនាម័យជាដើម។ លោកថា "អ្វីដែលយើងយកពីធម្មជាតិនេះគឺត្រូវតែមានការត្រួតពិនិត្យមុននឹងឆ្លងប្រទេស ជាពិសេសភូតគាមអនាម័យ ព្រោះគេខ្លាចឆ្លងជាមួយនឹងរឿងផលិតផលដែលយកពីធម្មជាតិ អ៊ីចឹងត្រូវត្រួតពិនិត្យយន្តការត្រួតពិនិត្យភូតគាមអនាម័យ"។
លោក វេង សាខុន បានបញ្ជាក់ទៀតថា កម្ពុជាពុំទាន់មានច្បាប់អនុញ្ញាតនាំចេញសម្បុកត្រចៀកកាំនោះទេ ប៉ុន្តែនាពេលបច្ចុប្បន្ននេះមានការនាំចេញខុសច្បាប់ជាបណ្ដើរៗហើយ។
"មកដល់ពេលនេះ នៅកម្ពុជា ការចិញ្ចឹមសម្បុកត្រចៀកកាំ គឺមានច្រើនគ្រួសារ ដែលចង់ក្លាយជាឧស្សាហកម្ម ដែលយើងកំពុងគិតគូរថាគួរចុះបញ្ជីថាមានប៉ុន្មានគ្រួសារ។ បញ្ហានេះ យើងមិនចង់រឹតបន្តឹងទេ ប៉ុន្តែយើងចង់ជួយគាត់ នៅពេលដែលគេអនុញ្ញាតឲ្យនាំចូល យើងមានយន្តការរួចស្រេចនៅគ្រប់កន្លែង" នេះជាការថ្លែងរបស់លោក វេង សាខុន៕