EU បើកការប្រកួត រូបថតស្តីពី "បេតិកភណ្ឌវប្បធម៌" នៅកម្ពុជា

2018-09-21 07:28:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមសេចក្តីប្រកាសព័ត៌មាន របស់សហភាពអឺរ៉ុបប្រចាំកម្ពុជា នៅថ្ងៃទី២១ ខែកញ្ញា ឆ្នាំ២០១៨ បានឲ្យដឹងថា ប្រតិភូសហភាពអឺរ៉ុបប្រចាំកម្ពុជា ប្រកាសចាប់ផ្តើមកម្មវិធីប្រកួតរូបថតស្តីពី "បេតិកភណ្ឌវប្បធម៌" នៅកម្ពុជា។ EU បានអំពាវនាវ ឱ្យអ្នកស្នេហាវិស័យថតរូបទាំងអស់នៅក្នុងប្រទេស ផ្ញើរូបថតជាស្នាដៃរបស់ខ្លួន ដែលឆ្លើយតបយ៉ាងសក្តិសមបំផុតទៅនឹងប្រធានបទនេះ។

កម្មវិធីប្រកួតក្រោមពាក្យស្លោកថា "បេតិកភណ្ឌរបស់យើងអតីតកាល ជួបអនាគតកាល" ត្រូវបាន រៀបចំឡើងដើម្បីជាផ្នែកមួយ នៃការអបអរឆ្នាំនៃបេតិកភណ្ឌវប្បធម៌អឺរ៉ុប ហើយដែលមានការរៀបចំការប្រកួតការតាំងពិព័រណ៍ និងព្រឹត្តិការណ៍ផ្សេងៗ។ ស្រដៀងគ្នានេះ ក៏មានការរៀបចំឡើងទូទាំង ពិភពលោកដែរ។

ក្នុងសន្និសីទសារព័ត៌មាន បើកការប្រកួតរូបថត ឯកអគ្គរដ្ឋទូតសហភាពអឺរ៉ុបប្រចំាកម្ពុជា លោក George Edgar បានលើកឡើងថា «បេតិកភណ្ឌវប្បធម៌ មានឥទ្ធិពលមកលើអត្តសញ្ញាណ និងជីវិត រស់នៅប្រចាំថ្ងៃរបស់យើង។ បេតិកភណ្ឌវប្បធម៌ ស្ថិតនៅជុំវិញខ្លួន យើងទាំងអស់គ្នា នៅទីក្រុងប្រជុំជន នៅតំបន់ទេសភាពធម្មជាតិ និងទីតាំងបុរាណវិទ្យារបស់យើងទៀតផង»។

ទូត EU ប្រចាំកម្ពុជា ក្នុងសន្និសីទសារព័ត៌មានស្តីពីការកម្មវិធីប្រកួតរូបថត។ រូបថត៖ ផ្តល់ឱ្យ

លោកបន្តថា បេតិកភណ្ឌវប្បធម៌មិនត្រឹមតែមានក្នុងអក្សរសាស្ត្រសិល្បៈ និងវត្ថុផ្សេងៗប៉ុណ្ណោះទេ ប៉ុន្តែក៏មានក្នុងវិស័យសិប្បកម្មដែលបានរៀនសូត្រពីដូនតា សាច់រឿងដែលដំណាលប្រាប់ដល់ កូនចៅ របស់អាហារដែលបរិភោគ និងភាពយន្តផងដែរ។

«តាមរយៈកម្មវិធីនេះ យើងមានបំណងចង់ទាញការយកចិត្តទុកដាក់ លើសារៈសំខាន់នៃបេតិកភណ្ឌវប្បធម៌ចំពោះរូបយើងទាំងអស់គ្នា ទាំងនៅសហភាពអឺរ៉ុប និងនៅកម្ពុជា ក៏ដូចជាទីកន្លែងផ្សេងទៀតក្នុងពិភពលោក»។ លោក George Edgar បន្ថែម។

ការសម្តែងសិល្បៈ របាំបុរាណ ក្នុងពិធីមួយនាពេលកន្លងមក

សូមបញ្ជាក់ថា ការប្រកាសឈ្មោះជយលាភី នឹងត្រូវធ្វើឡើងជាសាធារណៈនៅចុងខែវិច្ឆិកា ឯពិធីប្រគល់រង្វាន់ ប្រព្រឹត្តទៅនៅ ថ្ងៃទី៦ ធ្នូ។ កាលបរិច្ឆេទផុតកំណត់ចុងក្រោយសម្រាប់ការផ្ញើរូបថតដើម្បីចូលរួម គឺថ្ងៃទី ៣១ ខែតុលា ឆ្នាំ២០១៨។

កម្មវិធីប្រកួតរូបថតនេះ ត្រូវបានបើកឲ្យចូលរួមសម្រាប់មនុស្សគ្រប់គ្នា ដែលអាចផ្ញើររូបថតដែលមានគុណភាពច្បាស់ និងជាស្នាដៃដើមរបស់ខ្លួន (ក្នុងទម្រង់ជា JPEG និងទំហំយ៉ាងហោចណាស់ ៥ មេហ្គាភិចសែល) ដោយថតតាមទូរស័ព្ទស្មាតហ្វូន ឬម៉ាស៊ីនថត។ រង្វាន់រួមមាន៖

ជយលាភីលេខ១ នឹងទទួលបានរង្វាន់ជាបណ្ណដែលមាន ទឹកប្រាក់ ៧០០ដុល្លារ សម្រាប់ឧបករណ៍ម៉ាស៊ីនថត។
លេខ២ ទទួលបានបណ្ណដែលមានទឹកប្រាក់ ៦០០ដុល្លារ
និងលេខ៣ ទទួលបានបណ្ណដែលមានទឹកប្រាក់ ៥០០ដុល្លារ។

រូបថតរបស់ជយលាភីទាំង៣នាក់ និងរូបថតសម្រាំង ល្អបំផុតចំនួន១០ នឹងត្រូវដាក់បង្ហាញក្នុងព្រឹត្តិការណ៍នានា រៀបចំដោយសហភាពអឺរ៉ុបនៅកម្ពុជា៕

អត្ថបទ៖ សោភា