កីឡាករបរទេសដែលលេងនៅលីគកម្ពុជា មកពីប្រទេសណាខ្លះ?

2018-09-21 09:45:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករបាល់ទាត់ ដែលកំពុងប្រកបអាជីពក្នុងក្របខណ្ឌមិត្តហ្វូនខេមបូឌានលីគ រដូវកាល២០១៨នេះ មានទាំងអស់ ៣៣៤នាក់ ក្នុងនោះកីឡាករកម្ពុជាមាន ២៦៩នាក់ និងកីឡាករបរទេសមាន ៦៥នាក់។

បើតាមការចុះផ្សាយរបស់គណៈកម្មការប្រកួតបាល់ទាត់ជាតិកម្ពុជា (CNCC) នៅថ្ងៃទី២១កញ្ញានេះ បានឱ្យដឹងថា កីឡាករបរទេសទាំងនោះ ភាគច្រើនគឺមកពីជប៉ុន ចំនួន១៨នាក់ បន្ទាប់មក នីហ្សេរីយ៉ា និងកូរ៉េខាងត្បូង ចំនួន១២នាក់ដូចគ្នា។ ក្រៅពីនេះ មកពីកូរ៉េខាងជើង ឥណ្ឌូណេស៊ី កាម៉េរូន អ៊ីរ៉ង់ អាហ្វ្រិកខាងត្បូង អង់គ្លេស អេហ្ស៊ីប កូឌីវ័រ ឡេសូថូ អាមេរិក និងហ្គាណា។

កីឡាករបរទេសនៃក្លឹបព្រះខ័នរាជស្វាយរៀង និងណាហ្គាវើល ប្រកួតគ្នាក្នុងលីគកំពូលកម្ពុជា ២០១៨ នាពេលកន្លងមក

CNCC បញ្ជាក់ថា បទបញ្ជាមិត្តហ្វូនខេមបូឌានលីគ អនុញ្ញាតឱ្យក្លឹបមួយចុះបញ្ជីកីឡាករបរទេស ៥នាក់ និងដាក់ឱ្យលេងក្នុងមួយប្រកួតយ៉ាងច្រើនបំផុត ៣នាក់ តែអាចកើនដល់ ៤នាក់ ប្រសិនក្នុងចំណោមនោះមានអាស៊ីយ៉ាងហោចម្នាក់។

ការប្រកួតបាល់ទាត់ដណ្ដើមពានរង្វាន់មិត្តហ្វូនខេមបូឌានលីគរដូវកាល២០១៨ បានដំណើរការអស់ ២០ប្រកួតហើយ នៅសល់តែ២ប្រកួតទៀតប៉ុណ្ណោះ នឹងបិទរដូវកាលនេះ។ ក្រុមដែលចូលរួមប្រកួតប្រជែងក្នុងរដូវកាលនេះ មានចំនួន ១២ក្រុម ដោយធ្វើការប្រកួតក្នុងផ្ទះ និងក្រៅផ្ទះ ដើម្បីស្វែងរកក្រុមមានពិន្ទុច្រើនជាងគេដើម្បីគ្រងជើងឯក៕

អត្ថបទ៖ សំភី