ក្រសួងអប់រំ គ្រោងផ្តល់ថវិកាជាង ៧០ម៉ឺនដុល្លារ ឱ្យ ៤០សហព័ន្ធកីឡា នៅឆ្នាំ២០១៩

2018-09-21 12:44:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងអប់រំ យុវជន និងកីឡា គ្រោងនឹងផ្តល់ថវិកាជាតិសរុបចំនួន ២៩៨០លានរៀល (ជាង ៧២ម៉ឺនដុល្លារ) ទៅឱ្យ ៤០សហព័ន្ធកីឡា សម្រាប់គម្រោងអភិវឌ្ឍន៍វិស័យកីឡា នាឆ្នាំ២០១៩ខាងមុខ។ នេះបើតាមការបញ្ជាក់របស់លោក ស សុខា រដ្ឋលេខាធិការក្រសួងអប់រំ នៅក្នុងឱកាសបើកការប្រកួតកីឡានិស្សិតឧត្តមសិក្សា និងមធ្យមសិក្សាបច្ចេកទេសជើងឯកថ្នាក់ជាតិ ប្រចាំឆ្នាំសិក្សា២០១៨ កាលពីល្ងាចថ្ងៃទី២០ ខែកញ្ញា ឆ្នាំ២០១៨។

បើតាមការចុះផ្សាយរបស់ AKP លោក ស សុខា បានលើកឡើងថា ក្រសួងបានប្រតិភូកម្មការងារ និងគាំទ្រថវិកាដល់សហព័ន្ធកីឡាជាតិលើការងាររដ្ឋបាល ២០ភាគរយ ការងារបណ្តុះបណ្តាល ៣៥ភាគរយ និងការចំណាយលើការរៀបចំព្រឹត្តិការណ៍ប្រកួត ៤៥ភាគរយ ដើម្បីពន្លឿនការអភិវឌ្ឍឆ្ពោះទៅទទួលធ្វើជាម្ចាស់ផ្ទះព្រឹត្តិការណ៍កីឡាថ្នាក់តំបន់អាស៊ាន ស៊ីហ្គេម លើកទី៣២ នាឆ្នាំ២០២៣ ខាងមុខ។

លោក ស ខេង ក្នុងពិធីបើកការប្រកួតកីឡានិស្សិតឧត្តមសិក្សា និងមធ្យមសិក្សាបច្ចេកទេសជើងឯកថ្នាក់ជាតិ ប្រចាំឆ្នាំសិក្សា២០១៨ កាលពីថ្ងៃទី២០កញ្ញា ២០១៨។ រូបថត៖ AKP

ទិសដៅបន្ទាប់របស់ក្រសួងអប់រំ សម្រាប់អាណត្តិទី៦ (២០១៨-២០២៣) ដោយនឹងត្រូវបន្តធ្វើកំណែទម្រង់ស៊ីជម្រៅ ដើម្បីលើកកម្ពស់ និងអភិវឌ្ឍវិស័យអប់រំកាយ និងកីឡា ឆ្ពោះទៅស៊ីហ្គេម ឆ្នាំ២០២៣ ដែលក្នុងនោះរួមមាន៖ បន្តការជួសជុល កែលម្អ និងកសាងហេដ្ឋារចនាសម្ព័ន្ធកីឡា បណ្តុះបណ្តាលធនធានមនុស្ស មន្ត្រីកីឡា គ្រូបង្វឹក អាជ្ញាកណ្តាលចៅក្រម កីឡាករ កីឡាការិនីថ្នាល និង ជម្រើសជាតិ។ ក្រៅពីនេះក៏មានការបន្តកែទម្រង់ការប្រកួតកីឡាគ្រប់ប្រភេទ បន្តប្រតិភូកម្មការងារ និងគាំទ្រថវិកាដល់សហព័ន្ធជាតិផងដែរ។ លោករដ្ឋលេខាធិការបញ្ជាក់បន្ថែម។

ជាមួយគ្នានេះ នៅឆ្នាំ២០១៩ខាងមុខ់ ក្រសួងនឹងពង្រឹង និងពង្រីកសកម្មភាពអប់រំកាយ និងកីឡា នៅតាមរាជធានី-ខេត្ត ឱ្យកាន់តែផុសផុល ដែលជាមូលដ្ឋាន និងជាសក្តានុពល ដើម្បីចូលរួមប្រកួតកីឡាសិស្ស-និស្សិត ថ្នាក់ជាតិ និងថ្នាក់តំបន់ឆ្ពោះទៅស៊ីហ្គេម ឆ្នាំ២០២៣។

បន្ថែមពីនេះទៀត ក្រសួងអប់រំ នឹងធ្វើកំណែទម្រង់ការប្រកួតកីឡាសិស្ស-និស្សិត ពីការប្រកួតជ្រើសរើស ជើងឯកថ្នាក់ជាតិ ប្រចាំឆ្នាំទៅជាការប្រកួតពហុកីឡាសិស្សថ្នាក់ជាតិ (National School Games) និងពហុកីឡានិស្សិតថ្នាក់ជាតិ (National University Games) រៀងរាល់២ឆ្នាំម្តង ចាប់ពីឆ្នាំ២០១៩ តទៅ។

គួររម្លឹកថា កាលពីឆ្នាំ២០១៧ ក្រសួងបានចំណាយថវិកាចំនួន ១៦៧០លានរៀល (ជាង ៤០ម៉ឺនដុល្លារ) ដល់សហព័ន្ធកីឡាជាតិនានាចំនួន២១។ ការផ្តល់កញ្ចប់ថវិកាសរុបទាំងអស់នេះតាមឆ្នាំនីមួយៗ គឺត្រូវបានបែងចែកទៅតាមសហព័ន្ធជំនាញនីមួយៗ ដោយសហព័ន្ធបានរៀបចំការងារទាំង៣ គឺការងាររដ្ឋបាល ការបណ្តុះបណ្តាល និងការប្រកួតដោយខ្លួនឯង៕

ប្រភព៖ AKP ប្រែសម្រួល៖ សំភី