ក្រសួងរៀបចំដែនដី ព្រមានចាត់វិធានការក្រុមហ៊ុនពុះដីឡូត៍លក់ដែលគ្មានច្បាប់អនុញ្ញាត

2018-09-25 06:29:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំដែនដី នគរូបនីយកម្មថ្នាក់ជាតិ នៃក្រសួងរៀបចំដែនដី នគរូបនីយកម្ម និងសំណង់ បានព្រមានចាត់វិធានការចំពោះក្រុមហ៊ុនពុះដីឡូត៍លក់ដែលគ្មានច្បាប់អនុញ្ញាតត្រឹមត្រូវ និងបានអំពាវនាវឲ្យប្រជាពលរដ្ឋមុននឹងទិញដីពុះឡូត៍ ត្រូវពិនិត្យមើលឲ្យបានត្រឹមត្រូវ។

លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែងដូច្នេះ នៅក្រៅសិក្ខាសាលាស្តីពីការផ្សព្វផ្សាយប្រកាសស្តីពីការអភិវឌ្ឍដី នៅព្រឹកថ្ងៃទី២៥ ខែកញ្ញានេះ នៅក្រសួងរៀបចំដែនដី។

លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ថ្លែងប្រាប់អ្នកសារព័ត៌មាន នៅព្រឹកថ្ងៃទី២៥ ខែកញ្ញា ឆ្នាំ២០១៨

លោក ប៉ែន សុផល បានថ្លែងថា បន្ទាប់ពីប្រកាសឲ្យអនុវត្តប្រកាសស្តីពីការអភិវឌ្ឍដី គឺការអភិវឌ្ឍដីទាំងអស់ រួមទាំងដីពុះឡូត៍ ជាគម្រោងមួយនៅក្នុងការអភិវឌ្ឍដី ត្រូវសុំច្បាប់អនុញ្ញាតពីក្រសួងរៀបចំដែនដី នគរូបនីយកម្ម និងសំណង់ ឬក៏សាលារាជធានី ខេត្ត ឬក៏សាលាក្រុង ស្រុក ខណ្ឌ ទៅតាមទំហំសមត្ថកិច្ច។

លោកបន្តថា នៅក្នុងប្រកាស និងបទដ្ឋានគតិយុត្តិជាច្រើនទៀតរបស់ក្រសួង គឺទាំងវិស័យឯកជន និងវិស័យវិជ្ជាជីវៈ រួមទាំងសាធារណៈ និងឯកជន ត្រូវតែគោរពតាមគោលការណ៍ច្បាប់ជាធរមាន។ ក្នុងករណីមិនគោរពតាម ក្រសួងនឹងមានការដាក់ទណ្ឌកម្ម និងផាកពិន័យ។

លោករដ្ឋលេខាធិការបានបន្ថែមថា ចំពោះការទិញដីពុះឡូត៍ ក្រសួងអំពាវនាវទៅដល់ប្រជាពលរដ្ឋទាំងអស់ត្រូវតែពិនិត្យមើលមុននឹងទិញថា តើដីពិតជាមានការចុះបញ្ជីត្រឹមត្រូវ ហើយជាដីអ្នកដែលបានលក់ពិតប្រាកដ។ ហើយជាទូទៅ អ្នកដែលយកដីរបស់ខ្លួនទៅលក់បន្តគ្នា គឺត្រូវមានទោស ទាំងច្បាប់ភូមិបាល និងក្រមព្រហ្មទណ្ឌ។

លោក ប៉ែន សុផល បានបញ្ជាក់ថា ការអភិវឌ្ឍដីនៅកម្ពុជា មានដំណើរការល្អនៅក្នុងរាជធានី ខេត្ត ហើយការអភិវឌ្ឍដីនាំឲ្យមានការសាងសង់ ការវិនិយោគ និងសំណង់ល្អៗ ខ្ពស់ៗ សំណង់កម្ពស់មធ្យម ទាប បានកើតឡើងជាច្រើន។

ជាមួយគ្នានេះ លោកក៏បង្ហើបពីបញ្ហាប្រឈមមួយចំនួន ដោយនៅមានចំណុចមួយចំនួនដែលត្រូវពង្រឹងការគ្រប់គ្រងបន្ថែម ធ្វើយ៉ាងណាដើម្បីធានាបានទាំងគុណភាព បរិមាណ សោភ័ណភាព សម្រាប់ធានាការអភិវឌ្ឍប្រកបដោយចីរភាពនៅកម្ពុជា៕

អត្ថបទ៖ សោភា