ក្រពើដែលជាប់មងនៅខេត្តពោធិ៍សាត់ ត្រូវបានយកទៅលែងនៅស្ទឹងវិញហើយ

2018-09-27 06:41:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដោយមានសំណូមពរពីប្រជាពលរដ្ឋ ក្រុមការងារចម្រុះខេត្តពោធិ៍សាត់ បានសម្រេចយកក្រពើដែលជាប់មង ទៅលែងក្នុងទឹកស្ទឹង ដែលជាកន្លែងចាប់វាបាននោះវិញហើយ កាលពីថ្ងៃទី២៦ ខែកញ្ញា ឆ្នាំ២០១៨។ ក្រុមការងារនេះ រួមមាន មន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ រដ្ឋបាលជលផល ខណ្ឌរដ្ឋបាលជលផលពោធិ៍សាត់ មេបញ្ជាការវរៈសេនាតូចនគរបាលការពារព្រំដែនគោក លេខ៨២៥ មន្ទីរបរិស្ថាន ផ្នែករដ្ឋបាលជលផលរាំងទិល មេឃុំថ្មដា និងអង្គការវាយអេត ដែលដឹកនាំដោយលោកអភិបាលស្រុកវាលវែង។

ក្រុមការងារ បានដឹកក្រពើ ដែលមានបណ្តោយ ២,៩៣ម៉ែត្រ ទម្ងន់ ១៧០គីឡូក្រាមនេះ ទៅលែង ចូលក្នុងស្ទឹងឆាយតាម៉េត ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ និងបានផ្តល់ថវិកា លើកទឹកចិត្តដល់អ្នកចាប់បានចំនួន ៦០០ដុល្លារផងដែរ។

ក្រពើដែលជាប់មងរបស់ពលរដ្ឋនៅខេត្តពោធិ៍សាត់ ត្រូវបានដាក់នៅលើរថយន្ត (រូបថត៖ ហ្វេសប៊ុក)

សូមរំលឹកថា កាលពីព្រលឹមថ្ងៃទី២៥ ខែកញ្ញា ឆ្នាំ២០១៨ ប្រជានេសាទម្នាក់ បានដាក់មង ជាប់សត្វក្រពើមួយក្បាលនេះ នៅក្នុងស្ទឹងមេទឹក ដែលស្ថិតក្នុងដែនជម្រកសត្វព្រៃភ្នំសំកុស ក្នុងភូមិកណ្តាល ឃុំថ្មដា។

ស្ទឹងមេទឹក ដែលស្ថិតក្នុងដែនជម្រកសត្វព្រៃភ្នំសំកុស

បើតាមការចុះផ្សាយរបស់វិទ្យុស្រ្តី ដែលបានដកស្រង់សម្តីមេឃុំថ្មដា បានឱ្យដឹងថា ក្រពើដែលជាប់មងនេះ គឺជាក្រពើភ្នំ ហើយមិនមែនមានតែមួយក្បាលនេះទេ។ ជានិច្ចកាលគេតែងប្រទះឃើញសត្វក្រពើនេះ ស្ថិតក្នុងអន្លង់ជ្រៅៗ ចាប់ពី១០ម៉ែត្រឡើងទៅ។ លោកមេឃុំបន្ដថា ការដែលមិនមានការទៅចាប់យកក្រពើទាំងនោះចេញពីស្ទឺងនោះ ពីព្រោះតែកន្លងមកសត្វក្រពើទាំងនោះ មិនធ្លាប់បង្កគ្រោះថ្នាក់ ឬវាយប្រហារលើមនុស្សឡើយ៕

ប្រភព៖ ដើមអម្ពិល ប្រែសម្រួល៖ សំភី