ចិន និងរុស្ស៊ី អំពាវនាវឲ្យលុបទណ្ឌកម្មលើកូរ៉េខាងជើង

2018-09-28 02:13:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសមហាអំណាច ចិន និងរុស្ស៊ី បានអំពាវនាវឲ្យលុបទណ្ឌកម្មកូរ៉េខាងជើង ដោយបដិសេធការជំរុញរបស់អាមេរិកនៅក្នុងកិច្ចប្រជុំក្រុមប្រឹក្សាសន្ដិសុខអង្គការសហប្រជាជាតិ សម្រាប់ការអនុវត្តទណ្ឌកម្មឲ្យតឹងរឹងបន្ថែមទៀតលើកូរ៉េខាងជើង។

ការអំពាវនាវឲ្យលុបទណ្ឌកម្មនេះ ត្រូវបានធ្វើឡើងដោយលោក Wang Yi រដ្ឋមន្រ្តីក្រសួងការបរទេសចិន និងមានការគាំទ្រដោយលោក Sergei Lavrov រដ្ឋមន្រ្តីក្រសួងការបទេសរុស្ស៊ី។

លោក Wang Yi រដ្ឋមន្រ្តីក្រសួងការបរទេសចិន អំឡុងពេលលោកចូលរួមកិច្ចប្រជុំក្រុមប្រឹក្សាសន្ដិសុខអង្គការសហប្រជាជាតិ/ រូបភាព៖ AFP

អំឡុងកិច្ចប្រជុំក្រុមប្រឹក្សាសន្ដិសុខអង្គការសហប្រជាជាតិ កាលពីថ្ងៃទី២៧ ខែកញ្ញា ២០១៨ ម្សិលមិញ លោកប្រមុខការទូតចិនលើកឡើងថា ការវិវឌ្ឍជាវិជ្ជមានក្នុងទំនាក់ទំនងរវាងកូរ៉េខាងជើង និងកូរ៉េខាងត្បូង រួមជាមួយទំនាក់ទំនងអាមេរិក-កូរ៉េខាងជើងកាន់តែកក់ក្ដៅជាងមុន គួរតែនាំទៅរកការលើកលែងទណ្ឌកម្ម។

ក្រោយការលើកឡើងនេះ លោកប្រមុខការទូតរុស្ស៊ីបានគាំទ្រការលើកឡើងរបស់ចិន ដោយបញ្ជាក់ថា វាដល់ពេលហើយដើម្បីផ្ដល់សញ្ញាវិជ្ជមានដល់ក្រុងព្យុងយ៉ាង ដើម្បីជំរុញសម្បទាននានា។ "ជំហាននានាដោយកូរ៉េខាងជើងឆ្ពោះទៅរកការរំលាយអាវុធជាបន្ដបន្ទាប់ គួរតែត្រូវបានទទួលមកវិញដោយការលុបចោលទណ្ឌកម្ម"។ លោក Lavrov បន្ថែម។

សូមបញ្ជាក់ថា លោក Mike Mompeo រដ្ឋមន្រ្តីក្រសួងការបរទេសអាមេរិក បានបើកកិច្ចប្រជុំក្រុមប្រឹក្សាសន្ដិសុខអង្គការសហប្រជាជាតិ ដោយលោកបានទាមទារឲ្យរឹតបន្ដឹងការអនុវត្តទណ្ឌកម្មលើកូរ៉េខាងជើង៕

ប្រភព៖ Channelnewsasia ប្រែសម្រួល៖ វាសនា