អាជ្ញាធរខេត្តកោះកុង គ្រោងផ្អាកចរាចរណ៍រថយន្តធំៗលើផ្លូវជាតិលេខ៤៨ ជាបណ្តោះអាសន្ន

2018-10-01 09:01:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកស្រី មិថុនា ភូថង អភិបាលខេត្តកោះកុង គ្រោងនឹងផ្អាកការធ្វើចរាចរណ៍រថយន្តធំធុនធ្ងន់ដឹកទំនិញលើផ្លូវជាតិលេខ៤៨ ដែលកំពុងរងការខូចខាតជាបណ្តោះអាសន្នសិន។ លោកស្រីលើកឡើងដូច្នេះ ក្រោយបញ្ចប់កិច្ចប្រជុំលើកទី២ស្តីពីការរៀបចំបុណ្យសមុទ្រកាលពីថ្ងៃទី៣០កញ្ញា។

លោកស្រី ពន្យល់ថា មូលហេតុដែលអាជ្ញាធរចាំបាច់ធ្វើដូច្នេះ គឺដើម្បីបញ្ចៀសគ្រោះថ្នាក់តាមដងផ្លូវដែលកំពុងរងផលខូចខាតនេះ ពិសេសទុកពេលវេលាដល់ក្រុមការងារជំនាញ មានលទ្ធភាពគ្រប់គ្រាន់សម្រាប់ជួសជុលផ្លូវឱ្យបានរឹងមាំស្អាតល្អ សម្រួលដល់ការធ្វើដំណើរ ខណៈពិធីបុណ្យសមុទ្រខិតជិតមកដល់។

អភិបាលខេត្តកោះកុងរូបនេះ នឹងសរសេរលិខិតជាផ្លូវការមួយទៅកាន់ម្ចាស់ក្រុមហ៊ុនរថយន្តដឹកជញ្ជូនទំនិញធំៗទាំងអស់ក្នុងខេត្តកោះកុង សុំផ្អាកសកម្មភាពចរាចរណ៍លើផ្លូវជាតិលេខ៤៨ ជាបណ្តោះអាសន្ន។

ការត្រួតពិនិត្យរថយន្តធំៗ នៅលើផ្លូវជាតិលេខ៤៨ នាពេលកន្លងមក។ រូបថត៖ រស្មីកម្ពុជា

បើតាមលោក អន ដាវុធ ប្រធានមន្ទីរសាធារណការ និងដឹកជញ្ចូនខេត្តកោះកុង ថ្លែងថា អំឡុងខែឧសភានិងខែមិថុនា លោកបានសហការជាមួយស្នងការនគរបាល និងកងរាជអាវុធហត្ថខេត្ត ចុះត្រួតពិនិត្យលក្ខណៈបច្ចេកទេសយានយន្តតាមដងផ្លូវជាតិលេខ៤៨ជាបន្តបន្ទាប់។

ជាយន្តការថែទាំផ្លូវថ្នល់ និងទប់ស្កាត់សកម្មភាពដឹកទំនិញលើសទម្ងន់កំណត់ លោក អន ដាវុធ បានដាក់សំណើទៅរដ្ឋមន្ត្រីក្រសួងសាធារណការ ដើម្បីមានស្ថានីយ៍ថ្លឹងរថយន្តធំៗដែរ។ តែទោះយ៉ាងណា គិតមកដល់ពេលនេះ ពុំទាន់មានការឆ្លើយតបណាមួយឡើយ។

បច្ចុប្បន្នមន្ទីរនិងក្រសួងសាធារណការចាត់បញ្ចូនគ្រឿងចក្របុគ្គលិកកម្មករជំនាញចុះពិនិត្យទីតាំងរងផលខូចខាតទំហំធំដោយកំពុងឈូសឆាយជួសជុលសម្រាប់ធ្វើការដំណើរជាបឋមសិន។

តាមការវាយតម្លៃរបស់ក្រសួងសាធាណការ គិតមកត្រឹមថ្ងៃទី២២ ខែសីហា ឆ្នាំ២០១៨ ទំហំនៃការខូចខាតផ្លូវជាតិលេខ៤៨ ចាប់ពីស្រុកស្រែអំបិលដល់ក្រុងខេមរភូមិន្ទ ខេត្តកោះកុង គឺមានប្រវែង៣៥គីឡូម៉ែត្រ ស្មើនឹង២២,២៦% ដោយរាប់បញ្ចូលទាំងកំណាត់ផ្លូវដែលបានកែលម្អកាលពីឆ្នាំ២០១៧ផងដែរ៕

ប្រភព៖ រស្មីកម្ពុជា ប្រែសម្រួល៖ សំភី