ម្ចាស់ពាណិជ្ជកម្មធំ២ ព្រួយបារម្ភពីករណី Ronaldo ត្រូវគេចោទពីបទចាប់រំលោភ

2018-10-05 02:08:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Nike និង EA Sports ជាក្រុមហ៊ុនធំ ដែលសហការពាណិជ្ជកម្មជាមួយនឹងកីឡាករ Ronaldo។ ក្រោយលេចឮព័ត៌មានពាក់ព័ន្ធនឹងការចោទប្រកាន់ថា Ronaldo បានចាប់រំលោភនារីម្នាក់ ម្ចាស់ពាណិជ្ជកម្មទាំង២ បានបង្ហាញក្ដីកង្វល់ជាខ្លាំង។

Ronaldo សមាជិករបស់ក្លឹបបាល់ទាត់ Juventus (រូបថត៖ Reuters)

Nike បានចេញសេចក្ដីថ្លែងការណ៍មួយកាលពីថ្ងៃទី៤ ខែតុលា ថា "យើងបារម្ភខ្លាំងណាស់ពីរឿងចោទប្រកាន់ទាំងនោះ ហើយនឹងបន្តពិនិត្យឲ្យបានហ្មត់ចត់លើស្ថានភាពនេះ"។

Ronaldo បានចុះកិច្ចសន្យាផ្សព្វផ្សាយពាណិជ្ជកម្មឲ្យ Nike ចាប់តាំងពីឆ្នាំ២០១៦មកម៉្លេះ ដោយពាក់នូវឈុតសម្លៀកបំពាក់របស់ក្រុមហ៊ុននៅពេលប្រកួតម្ដងៗ។ តម្លៃនៃកិច្ចសន្យាដែលកីឡាករក្លឹប Juventus បានចុះគឺប្រមាណជា ១ពាន់លានដុល្លារ។

មិនខុសពី Nike ក្រុមហ៊ុនហ្គេម EA Sports ក៏បង្ហាញពីភាពមិនសូវស្រួលចិត្តក្នុងខ្លួនផងដែរចំពោះរឿងដែលកើតឡើងមកលើ Ronaldo។ EA Sports បានឲ្យដឹងថា ពួកគេនឹងពិនិត្យលើស្ថានភាពនេះ ហើយរំពឹងថា រាល់កីឡាករត្រូវគោរពក្រមសីលធម៌ឲ្យសមស្របទៅនឹងការចង់បានរបស់ក្រុមហ៊ុន។

សូមជម្រាបថា កីឡាករបាល់ទាត់ឆ្នើម Cristiano Ronaldo ត្រូវបាននារីម្នាក់ ចោទប្រកាន់ពីបទរំលោភសេពសន្ថវៈ នៅក្នុងបន្ទប់សណ្ឋាគារមួយ កាលពីឆ្នាំ២០០៩ ហើយពាក្យបណ្ដឹងនឹងត្រូវមេធាវីរបស់នារីដដែល ដាក់ជូនតុលាការ នៅរដ្ឋ Nevada សហរដ្ឋអាមេរិក។ នេះបើតាមសេចក្ដីរាយការណ៍ពីសារព័ត៌មាន Der Spiegel កាលពីពេលថ្មីៗនេះ។

នារីខាងលើ មានឈ្មោះ Kathryn Mayorga អាយុ ៣៤ឆ្នាំ បានអះអាងថា Ronaldo បានរំលោភនាង តាមរន្ធគូទ រួចបានឲ្យលុយនាងចំនួន ៣៧៥០០០ ដុល្លារ ដើម្បីកុំឲ្យរាយការណ៍ទៅកាន់ប៉ូលិស។ នេះជាលើកទីមួយ ដែលនាង Mayorga អះអាងជាសាធារណៈ ពីករណីរំលោភ ទាក់ទងខ្សែប្រយុទ្ធរបស់ក្លឹប Juventus ។ នាងបញ្ជាក់ថា Ronaldo បានរំលោភនាងចំនួន ៥ដង ក្នុងយប់មួយក្រោយពីពិធីជប់លៀង។

ឈ្មោះ Kathryn Mayorga បានប្ដឹង Ronaldo ពីបទរំលោភសេពសន្ថវៈ

ជាការឆ្លើយតប ក្រុមមេធាវីរបស់ Ronaldo បានបញ្ជាក់ថា ពួកគេនឹងដាក់ពាក្យប្ដឹងទស្សវដ្តីអាល្លឺម៉ង់ Der Spiegel បន្ទាប់ពីបានចុះផ្សាយខុសច្បាប់ពីការចោទប្រកាន់ របស់ស្ត្រីជនជាតិអាមេរិក។ លោក Christian Schertz មេធាវីរបស់ Ronaldo បានធ្វើសេចក្ដីថ្លែងការណ៍មួយ ដែលអះអាងថា ការចុះផ្សាយរបស់ Der Spiegel គឺជាការសង្ស័យមិនច្បាស់លាស់មកលើឯកជនភាពរបស់ Ronaldo៕

ប្រភព៖ DW ប្រែសម្រួល៖ ឈាង.