សិស្សប្រឡងចូលរៀននៅសាលាវិចិត្រសិល្បៈ មានការកើនឡើង
- 2018-10-11 04:40:19
- ចំនួនមតិ 0 | ចំនួនចែករំលែក 0
សិស្សប្រឡងចូលរៀននៅសាលាវិចិត្រសិល្បៈ មានការកើនឡើង
ចន្លោះមិនឃើញ
សាស្ត្រាចារ្យសាលាវិចិត្រសិល្បៈ បានបង្ហាញក្តីសង្ឃឹមឡើងវិញ ក្នុងការស្វែងរកអ្នកបន្តវេនជំនាញ សិល្បៈបុរាណ ក្រោយសាលាមធ្យមវិចិត្រសិល្បៈ បានបើកសម័យប្រឡងជ្រើសរើសសិស្ស ដែលមានឧបនិស្ស័យសិល្បៈ ទទួលបានសិស្សកើនឡើងជាង១០០នាក់ បើប្រៀបនឹងឆ្នាំកន្លងទៅ។
សាស្ត្រាចារ្យសាលាមធ្យមវិចិត្រសិល្បៈ រីករាយនៅពេលឃើញមានកូនខ្មែរបានចាប់ផ្ដើមចាប់អារម្មណ៍ដើរចូលមកថ្នាលបណ្ដុះគ្រាប់ពូជសិល្បៈបុរាណ មានចំនួនច្រើនជាងបណ្ឌាឆ្នាំមុនៗ។
បញ្ជីរាយនាមបេក្ខជនដែលបានដាក់ពាក្យប្រឡងចូលរៀនជំនាញចំនួន៥ ក្នុងនោះរួមមាន ផ្នែក ដូរ្យតន្ត្រី របាំ ល្ខោន សៀក និងសិល្បៈសូនរូប ក្នុងឆ្នាំសិក្សា២០១៨-២០១៩ ខាងមុខនេះ មានចំនួន ជាង៣០០នាក់។ ចំនួននេះកើនឡើង លើសពីឆ្នាំទៅ គឺឆ្នាំ២០១៧ ជាង ១០០នាក់។
សាស្ត្រាចារ្យផ្នែកល្ខោនបាសាក់ លោក ឯល ប៉ុនណ្ណាល់ មានប្រសាសន៍ថា ការកើនឡើងចំនួនសិស្សនេះ មិនទាន់គ្រប់តាមតម្រូវការនៅឡើយទេ ប៉ុន្តែបើឆ្នាំក្រោយទៀត មានការកើនឡើងថែមច្រើនលើសនេះទៀតនោះ នឹងអាចគ្រប់តាមតម្រូវការរបស់សាលាដែលចង់បាន។ «ប្រៀបធៀបឆ្នាំទៅ ចំនួនសិស្សតិចមែនទែន ផ្នែកបាសាក់ខ្ញុំឆ្នាំទៅ ចូលបាន៦នាក់ ក្រោយមកឈប់វិញអស់៣នាក់ ខាងយីកេ ដូចបាន៨នាក់ ឆ្នាំនេះបានច្រើនៗគ្រាន់បើ»។
ក្រុមសាស្ត្រាចារ្យ ចាប់អារម្មណ៍ថា ការកើនឡើងនេះ ដោយសារមានការផ្សព្វផ្សាយតាមបណ្ដាញសង្គម និងសាលាទុករយៈពេលយូរក្នុងការសម្រេចចិត្ត ការស្វែងរកព័ត៌មាន មិនមានការបង់ថ្លៃ និងការយល់ដឹងពីតម្លៃវប្បធម៌របស់ខ្លួនជាដើម។
សាលាមធ្យមវិចិត្រសិល្បៈ បានប្រកាសចាប់ទទួលពាក្យស្នើសុំចូលប្រឡងចាប់តាំងពីខែសីហា ហើយរហូតដល់ថ្ងៃទី២៨ កញ្ញា កន្លងទៅនេះ សាលាបានរៀបចំការប្រឡងពិនិត្យ ឧបនិស្ស័យរបស់សិស្សានុសិស្ស ឲ្យចូលរៀនតាមជំនាញនីមួយៗដោយ ឥតបង់ថ្លៃអ្វីទាំងអស់។
ឆ្នាំសិក្សាថ្មី ២០១៨-២០១៩ សាលាបានប្រកាសជ្រើសរើសសិស្សានុសិស្ស ឲ្យចូលរៀនជំនាញចំនួន៥ ក្នុងនោះរួមមាន ផ្នែក ដូរ្យតន្ត្រី របាំ ល្ខោន សៀក និងសិល្បៈសូនរូប។
ការប្រកាសជ្រើសរើសនេះ ធ្វើឡើងជារៀងរាល់ឆ្នាំ ប៉ុន្តែមិនសូវមានក្រុមយុវជនរំភើបរីករាយសម្រុកចូលទៅដាក់ពាក្យប្រឡង ដូចការប្រឡង ចម្រៀងសម័យ នៅតាមស្ថានីយទូរទស្សន៍នានា ឬនៅតាមសាលាជំនាញ និងមហាវិទ្យាល័យផ្សេងៗនោះទេ។
អ្នកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ មានប្រសាសន៍ប្រាប់អាស៊ីសេរី មុនការប្រឡងជ្រើសរើសមកដល់ថា ដោយមានការផ្សព្វផ្សាយពីការទទួលពាក្យសុំចូលរៀនជំនាញនេះពីចម្ងាយ ដូច្នេះ ក្រសួងសង្ឃឹមថា ឆ្នាំសិក្សា២០១៨ -២០១៩ នៅសាលាមធ្យមសិក្សាវិចិត្រសិល្បៈ នឹងមានសិស្សចូលរៀនច្រើនជាងពេលមុនៗ៖ «កាលពីបួនប្រាំឆ្នាំមុន កូនសិស្សមានការថយចុះបន្តិច ប៉ុន្តែកាលពីឆ្នាំទៅ បន្ទាប់ពីមានការផ្សព្វផ្សាយទូលំទូលាយ និងការកែសម្រួលហេដ្ឋារចនាសម្ព័ន្ធដូចជា ផ្លូវ អាគារសិក្សា និងឧបករណ៍សិក្សាជាដើម សិស្សចាប់ផ្ដើមមានការកើនឡើង ហើយនៅឆ្នាំសិក្សា ២០១៨-២០១៩ នេះ សង្ឃឹមថា សិស្ស នឹងមានការកើនឡើងគួរឲ្យយើងពេញចិត្ត ហើយការដាក់សុំចូលរៀននេះមិនមានការបង់ថ្លៃអ្វីនោះទេ»។
ទោះយ៉ាងណាក្តីសាស្ត្រាចារ្យផ្សេងទៀត នៅតែមានក្តីព្រួយបារម្ភចំពោះការខ្វះខាតគ្រាប់ពូជសិល្បៈបុរាណ ជាពិសេសផ្នែកខាងសិល្បៈល្ខោនទាំង៣ ទម្រង់នោះតែម្តង ដោយសារការកើនឡើងនេះមានចំនួនតិចពេក ធ្វើឲ្យខ្វះពីតម្រូវការរហូតជាងពាក់កណ្ដាល ជាងនេះទៅទៀត អ្នកខ្លះចូលមកហើយក៏ឈប់ទៅវិញ ធ្វើឲ្យការបណ្តុះបណ្តាលលើវិស័យមួយនេះជួបការលំបាកច្រើន។
អ្នកគ្រូបង្ហាត់ជំនាញល្ខោន យីកេ ជាង ២០ឆ្នាំ មកហើយ អ្នកគ្រូ មែន ចន្ទសុភី បានបង្ហាញពីបញ្ហាប្រឈមមួយចំនួនជុំវិញរឿងនេះ ជាពិសេស បញ្ហាជីវភាព និងមុខរបរដែលពួកគេត្រូវស្វែងរកលំនឹងដែលអាចរឹងមាំ ក្នុងងការកសាងជីវភាពគ្រួសារទៅអនាគត៖ «ច្បាស់ជាមានបញ្ហាបណ្ដុះបណ្ដាលធនធានមនុស្សហើយ....ពីព្រោះទីមួយទិសដៅគាត់មុនពេលប្រឡងចូល ពួកគាត់សួរខ្លួនឯងថា ពេលរៀបចប់គាត់ទៅធ្វើការងារអីបាន ក្រៅពីការងារសិល្បៈ.......?»
ក្រុមសាស្ត្រាចារ្យ នៅស្នើសុំឲ្យ អ្នកពាក់ព័ន្ធទាំងស្ថាប័នឯកជន និងរដ្ឋ ព្រមទាំងប្រព័ន្ធផ្សព្វផ្សាយ ជួយលើកស្ទួយ វិស័យនេះឲ្យបានខ្លាំងថែមទៀត។
អ្នកគ្រូ មែន ចន្ទសុភី បានលើកបានលើកឡើងថា ក្រសួងគួរគិតគូរឲ្យខ្លាំងថែមទៀត ដល់ទីផ្សារសិល្បៈ និងការងារផ្សេងទៀតដល់អ្នកបញ្ចប់ការសិក្សាផ្នែកជំនាញសិល្បៈ។
អ្នកស្រី ភឿង សកុណា មានប្រសាសន៍ថា ក្រសួងតែងតែគិតគូរជានិច្ច ចំពោះបញ្ហាប្រឈម និងការឧបត្ថម្ភ សិស្សានុសិស្ស សាស្ត្រាចារ្យទៅតាមលទ្ធភាព ប៉ុន្តែអ្នកស្រីមិនអាចបញ្ជាក់បានថា មួយៗឆ្នាំក្រសួង មានថវិកាប៉ុន្មានសម្រាប់ជួយលើវិស័យសិល្បៈនោះទេ ប៉ុន្តែក្រសួងបានដាក់គោលដៅពង្រឹងគុណភាពជាចម្បង។ កិច្ចការបន្ទាប់ គឺការស្វែងរកទីផ្សារការងារជូនសិល្បករ ការបញ្ចូលក្នុងក្របខ័ណ្ឌរដ្ឋ ហើយការងារនេះក្រសួងកំពុងតែអនុវត្តជាបណ្ដើរៗជាច្រើនឆ្នាំហើយ។
សាស្ត្រាចារ្យសាលាវិចិត្រសិល្បៈ មើលឃើញថា ក្នុងរយៈពេលប្រមាណ ១០ឆ្នាំចុងក្រោយនេះ ទម្រង់សិល្បៈល្ខោនចំនួន៣ ដូចជាល្ខោន បាសាក់ យីកេ និងល្ខោននិយាយជាដើម កំពុងតែប្រឈមនឹងការបាត់បង់ការគាំទ្រ ឬធ្លាក់ចុះប្រជាប្រិយភាពលឿនជាងគេ ក្នុងចំណោមទម្រង់សិល្បៈដទៃទៀត៕
ចុចត្រង់នេះ ដើម្បីមើលលទ្ធផលនៃការប្រឡងជ្រើសរើសសិស្សចូលរៀនដោយឥតបង់ថ្លៃនៅសាលាមធ្យមវិចិត្រសិល្បៈ