អាមេរិក ចាប់ខ្លួនចារកម្មចិនម្នាក់ ពាក់ព័ន្ធនឹងការលួចការសម្ងាត់ពាណិជ្ជកម្ម

2018-10-11 06:52:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរអាមេរិក កាលពីថ្ងៃទី១០ ខែតុលា ឆ្នាំ២០១៨ ម្សិលមិញ បានឱ្យដឹងថា ខ្លួនបានចាប់ខ្លួនភ្នាក់ងារចារកម្មជនជាតិចិនម្នាក់ ក្រោយធ្វើបត្យាប័នពីប្រទេសប៊ែលហ្ស៊ិក។ ភ្នាក់ងារចារកម្មចិននេះ ត្រូវបានចោទប្រកាន់ពីបទ ពាក់ព័ន្ធនឹងកិច្ចខិតខំដែលគាំទ្រដោយរដ្ឋ ដើម្បីលួចការសម្ងាត់ពាណិជ្ជកម្មរបស់អាមេរិក។

រូបភាព៖ South China Morning Post

ក្រសួងយុត្តិធម៌អាមេរិកបានបញ្ជាក់ថា លោក Xu Yanjun ជាមន្រ្តីក្រសួងសន្ដិសុខជាតិចិន និងបានលួចការសម្ងាត់ពាណិជ្ជកម្មក្រុមហ៊ុនអាកាសចរណ៍ GE និងក្រុមហ៊ុនមួយចំនួនទៀត ចាប់តាំងពីឆ្នាំ២០១៣ មកម៉្លេះ។

លោក Xu Yanjun ត្រូវបានបញ្ជូនពីប៊ែលហ្ស៊ិក ទៅអាមេរិក កាលពីថ្ងៃទី៩ ខែតុលា ឆ្នាំ២០១៨។ នេះជាករណីដំបូងដែលមន្រ្តីចារកម្មចិនត្រូវបានធ្វើបត្យាប័នទៅកាន់ប្រទេសផ្សេង។

សូមបញ្ជាក់ថា ការប្រកាសរបស់ក្រសួងយុត្តិធម៌អាមេរិក គឺធ្វើឡើងខណៈភាពតានតឹងកំពុងកើនឡើងខ្លាំងរវាងក្រុងវ៉ាស៊ីនតោន និងក្រុងប៉េកាំង លើបញ្ហាភូមិសាស្រ្តនយោបាយ ពាណិជ្ជកម្ម ការលួច Hack និងចារកម្ម។

គួររម្លឹកផងដែរថា កាលពីថ្ងៃទី២៦ ខែកញ្ញា ឆ្នាំ២០១៨ អាមេរិកក៏បានចោទប្រកាន់វិស្វករអេឡិចត្រូនិចចិនម្នាក់ ឈ្មោះ Ji Chaoqum ពីបទពាក់ព័ន្ធនឹងការប៉ុនប៉ងលួចការសម្ងាត់ឧស្សាហកម្មអាកាសចរណ៍អាមេរិកផងដែរ៕

ប្រភព៖ Channelnewsasia ប្រែសម្រួល៖ វាសនា