លោក វេង សាខុន ចូលរួមកិច្ចប្រជុំរដ្ឋមន្រ្តីកសិកម្ម និងព្រៃឈើអាស៊ាន នៅវៀតណាម
- 2018-10-11 09:43:31
- ចំនួនមតិ 0 | ចំនួនចែករំលែក 0
លោក វេង សាខុន ចូលរួមកិច្ចប្រជុំរដ្ឋមន្រ្តីកសិកម្ម និងព្រៃឈើអាស៊ាន នៅវៀតណាម
ចន្លោះមិនឃើញ
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ រួមដំណើរដោយមន្រ្តីជាន់ខ្ពស់ក្រសួង បានអញ្ជើញចូលរួមពិធីបើកកិច្ចប្រជុំលើកទី៤០ នៃរដ្ឋមន្រ្តីកសិកម្ម និងព្រៃឈើអាស៊ាន នៅទីក្រុងហាណូយ ប្រទេសវៀតណាម នាថ្ងៃទី១១ ខែតុលា ឆ្នាំ២០១៨នេះ។ កិច្ចប្រជុំនេះ ធ្វើឡើងក្រោមអធិបតីភាព លោក ត្រិញ ឌិញហ្សូង (Trinh Dinh Dung) ឧបនាយករដ្ឋមន្រ្តីវៀតណាម។
ក្រសួងកសិកម្ម បានឱ្យដឹងថា កិច្ចប្រជុំនេះរៀបចំឡើងក្នុងគោលបំណងពិនិត្យមើលរួមគ្នានូវវឌ្ឍនភាព និងសមិទ្ធផលនៃការអនុវត្តក្របខណ្ឌគោលនយោបាយ ដែលពាក់ព័ន្ធនឹងកិច្ចសហប្រតិបត្តិការស្បៀង កសិកម្ម និងព្រៃឈើអាស៊ាន ដើម្បីសម្រេចបាននូវចក្ខុវិស័យកសិកម្មអាស៊ានក្នុងឆ្នាំ២០៣០។ ចក្ខុវិស័យនេះ គឺធ្វើយ៉ាងណាឱ្យកសិកម្មមានលក្ខណៈទំនើប ប្រកួតប្រជែង បរិយាប័ន្នធន់នឹងការប្រែប្រួលអាកាសធាតុ និងនិរន្តភាព ដែលនាំដល់ការកើនឡើងប្រាក់ចំណួលគ្រួសារកសិករ វិបុលភាព និងសុខុមាលភាពប្រជាពលរដ្ឋតំបន់។
១. លទ្ធផលនៃមហាសន្និបាតលើកទី៣១ និង៣២ និងកិច្ចប្រជុំលើកទី៥០ នៃរដ្ឋមន្រ្តីសេដ្ឋកិច្ចអាស៊ាន។
២. វឌ្ឍនភាពនៃការអនុវត្តក្របខណ្ឌគោលនយោបាយដែលពាក់ព័ន្ធទៅនឹងកិច្ចសហប្រតិបត្តិការស្បៀង កសិកម្ម និងព្រៃឈើអាស៊ាន
៣. ការរៀបចំសម្រាប់កិច្ចប្រជុំលើកទី១៨ នៃរដ្ឋមន្រ្តីកសិកម្ម និងព្រៃឈើអាស៊ានបូកបី
៤. ការរៀបចំសម្រាប់កិច្ចប្រជុំលើកទី៦ រវាងរដ្ឋមន្រ្តីអាស៊ាន និងចិន ជាលទ្ធផលនៃកិច្ចប្រជុំលើកទី៣៩ នៃរដ្ឋមន្រ្តីកសិកម្ម និងព្រៃឈើអាស៊ាន នៃការអនុវត្តក្របខណ្ឌគោលនយោបាយកិច្ចសហប្រតិបត្តិការស្បៀង កសិកម្ម និងព្រៃឈើអាស៊ាន ២០១៧-២០១៨។
អង្គប្រជុំ បានជំរុញឲ្យសមាជិកអាស៊ានទាំងអស់ បន្តពង្រឹងសន្តិសុខស្បៀង កសិធុរកិច្ច និងសុវត្ថិភាពចំណីអាហារ។ ដោយឡែក ពាក់ព័ន្ធទៅនឹងអនុវិស័យសត្វ អង្គប្រជុំបានសម្រេចបង្កើតនូវស្តង់ដារក្នុងការចាក់វ៉ាក់សាំងសត្វ និងការអនុវត្តការចិញ្ចឹមសត្វល្អ ជាពិសេសកសិដ្ឋានចិញ្ចឹមជ្រូក។
ក្រៅពីនេះ អង្គប្រជុំក៏បានឯកភាពផងដែរ ក្នុងការបង្កើតក្រុមការងារបច្ចេកទេសលើការកំណត់បទដ្ឋានណែនាំសម្រាប់ការអនុវត្តវារីវប្បកម្មល្អ និងការអនុវត្តការចិញ្ចឹមបង្គាល្អ។ ចំពោះអនុវិស័យព្រៃឈើ អង្គប្រជុំបានគាំទ្រឲ្យមានការរៀបចំនូវបទដ្ឋានណែនាំពីការអភិវឌ្ឍកសិ-រុក្ខាកម្ម និងយន្តការគ្រប់គ្រងធនធានព្រៃឈើប្រកបដោយនិរន្តភាពដើម្បីពង្រឹងភាពប្រកួតប្រជែងក្នុងការធ្វើពាណិជ្ជកម្មព្រៃឈើនៅលើឆាកអន្តរជាតិ ដោយគោរពទៅតាមលក្ខខណ្ឌតម្រូវរបស់ពិភពលោក៕