រដ្ឋមន្រ្តីពាណិជ្ជកម្មថៃ ប្រាប់ឲ្យអនុព័ន្ធពាណិជ្ជកម្ម ត្រៀមខ្លួនចំពោះសង្រ្គាមពាណិជ្ជកម្ម

2018-10-16 01:59:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Sontirat Sontijirawong រដ្ឋមន្រ្តីក្រសួងពាណិជ្ជកម្មថៃ បានជំរុញឲ្យនាយកនៃការិយាល័យកិច្ចការពាណិជ្ជកម្ម នៃស្ថានទូតថៃទាំង ៦៤ប្រទេស ត្រៀមខ្លួនសម្រាប់សង្រ្គាមពាណិជ្ជកម្មសាកល ដែលលោកថា វានឹងផ្ទុះឡើងកាន់តែធំឡើងនៅឆ្នាំ២០១៩ ខាងមុខ។

លោក Sontirat Sontijirawong រដ្ឋមន្រ្តីក្រសួងពាណិជ្ជកម្មថៃ/ រូបភាព៖ Bangkok Post

លោករដ្ឋមន្រ្តីពាណិជ្ជកម្មថៃបញ្ជាក់ថា សម្រាប់ផ្នែកវិជ្ជមាន ប្រទេសថៃអាចនាំចេញកាន់តែច្រើនជាងមុន និងទទួលការវិនិយោគបរទេសកាន់តែច្រើនជាងមុនផងដែរ។ លោកបន្ថែមថា "ប៉ុន្ដែវានឹងមានផលប៉ះពាល់អវិជ្ជមាននានា... ដូច្នេះអនុព័ន្ធពាណិជ្ជកម្មត្រូវតែសម្របសម្រួលការផ្ដោតយកចិត្តទុកដាក់របស់ពួកគេ និងផ្សព្វផ្សាយផលិតផលក្នុងស្រុកនៅលើទីផ្សារសាកល"។

ជាមួយគ្នានេះ លោក Sontirat Sontijirawong បានបញ្ជាឲ្យមន្រ្តីជាន់ខ្ពស់ក្រសួង និងអនុព័ន្ធពាណិជ្ជកម្ម រៀបចំផែនការនានា ដើម្បីទប់ទល់នឹងសង្រ្គាមពាណិជ្ជកម្មសាកល។ លោកថា ផែនការទាំងនោះ អាចជួយជំរុញពាណិជ្ជកម្មអន្តរជាតិរបស់ថៃកើនឡើង មុនរដ្ឋាភិបាលថ្មីចូលកាន់តំណែងនៅក្នុងរយៈពេល ៦ខែទៀត។

សូមបញ្ជាក់ថា ក្រសួងពាណិជ្ជកម្មថៃបានដាក់គោលដៅនាំចេញ ឲ្យកើនឡើងក្នុងរង្វង់ ៨% ហើយលោករដ្ឋមន្រ្តីក្រសួងពាណិជ្ជកម្មថៃជឿជាក់ថា គោលដៅនេះនឹងអាចសម្រេចបាន៕

ប្រភព៖ Bangkokpost ប្រែសម្រួល៖ វាសនា