កំពង់ភ្លុក ក្លាយជាគោលដៅទេសចរណ៍ធម្មជាតិដ៏សំខាន់ ក្នុងរដូវវស្សា

2018-10-16 07:35:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តំបន់ទេសចរណ៍កំពង់ភ្លុក ជាគោលដៅទេសចរណ៍ធម្មជាតិដ៏ទាក់ទាញមួយនៅក្នុងរដូវស្សានេះនៅក្នុងខេត្តសៀមរាប ដែលនៅទីនោះភ្ញៀវទេសចរអាចគយគន់សម្រស់ពិតនៃធម្មជាតិ និងឈ្វេងយល់ពីជីវភាពរស់នៅ និងប្រពៃណីទំនៀមទម្លាប់របស់ប្រជាពលរដ្ឋនៅមូលដ្ឋាន។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា នៅថ្ងៃទី១៦ ខែតុលា ឆ្នាំ២០១៨។

ភ្ញៀវទេសចរ កំពុងជិះទូកកម្សាន្ត នៅតំបន់ទេសចរណ៍ធម្មជាតិកំពង់ភ្លុក ក្នុងរដូវវស្សា

ដោយដកស្រង់សម្ដីលោក សាង គង់ ប្រធានសហគមន៍ទេសចរណ៍ធម្មជាតិកំពង់ភ្លុក ទីភ្នាក់ងារសារព័ត៌មានកម្ពុជាបានឲ្យដឹងថា សហគមន៍ទេសចរណ៍កំពង់ភ្លុក ជាគោលដៅទេសចរណ៍ធម្មជាតិដែលកំពុងទាក់ទាញភ្ញៀវទេសចរជាតិ និងអន្តរជាតិ ឲ្យទៅកម្សាន្ត។ កំពង់ភ្លុក មានទេសភាពព្រៃលិចទឹក ផ្ទះប្រជាពលរដ្ឋ ដែលហ៊ុមព័ទ្ធដោយផ្ទៃទឹកខៀវស្រងាត់នៅជុំវិញនៅក្នុងបឹងទន្លេសាបដ៏ស្រស់ស្អាតនារដូវវស្សានេះ។ ប្រជាពលរដ្ឋរស់នៅមូលដ្ឋាននេះមួយចំនួនធំ កំពុងមានការងារធ្វើ និងប្រកបមុខរបររកស៊ីទទួលបានប្រាក់កម្រៃសមរម្យពីវិស័យទេសចរណ៍។

ពេលធ្វើដំណើរទៅដល់ភូមិឋានដ៏ស្រស់ស្អាតមួយនេះ ភ្ញៀវទេសចរអាចជិះទូកតូចទស្សនានៅក្រោមម្លប់ព្រៃឈើលិចទឹកដ៏ត្រជាក់។ ក្រៅពីនេះ នៅពេលល្ងាច គេអាចទស្សនាថ្ងៃលិចនៅលើផ្ទៃទឹកដ៏ស្រស់ស្អាត។ នៅពេលយប់ភ្ញៀវទេសចរអាច ស្នាក់នៅទីនោះបាន ដោយសហគមន៍មានផ្ទះស្នាក់នៅ រៀបចំយ៉ាងស្អាត និងមានផាសុកភាព។

ប្រធានសហគមន៍ទេសចរណ៍ធម្មជាតិកំពង់ភ្លុកបានបន្តថា ដោយសារភាពស្រស់ស្អាតនៃតំបន់ទេសចរណ៍កំពង់ភ្លុកនេះ កាលពីបុណ្យភ្ជុំបិណ្ឌកន្លងទៅ មានភ្ញៀវទេសចរជាតិ និងអន្តរជាតិជាច្រើនបានមកកម្សាន្តនៅតំបន់នេះ ដោយពួកគេអាចទស្សនាទេសភាពដ៏ស្រស់ស្អាត និងអាចលេងទឹកសប្បាយផង។

ចំណែកលោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានឲ្យដឹងថា កំពង់ភ្លុកត្រូវបានភ្ញៀវទេសចរ ជាពិសេសភ្ញៀវទេសចរបរទេសដែលបានទៅកម្សាន្តទីនោះ មានការពេញចិត្តទៅនឹងបរិយាកាសដ៏ត្រជាក់បរិសុទ្ធ នៅលើផ្ទៃទឹកដ៏ថ្លាយង់ និងសំណង់ផ្ទះបណ្ដែតទឹក ព្រៃលិចទឹកលាតសន្ធឹងយ៉ាងឆ្ងាយ។

សូមជម្រាបថា តំបន់ទេសចរណ៍ធម្មជាតិកំពង់ភ្លុក ស្ថិតនៅក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប ដែលមានចម្ងាយពីរួមខេត្តសៀមរាបប្រមាណជាង ១០គីឡូម៉ែត្រប៉ុណ្ណោះ៕

ទស្សនាទិដ្ឋភាពផ្សេងៗ នៅកំពង់ភ្លុក