ស្លូវ៉ាគី ត្រៀមចែករំលែកបទពិសោធ ដល់កម្ពុជា ពាក់ព័ន្ធនឹងវិស័យហិរញ្ញវត្ថុសាធារណៈ

2018-10-17 03:32:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឧបនាយករដ្ឋមន្រ្តី និងជារដ្ឋមន្រ្តីក្រសួងហិរញ្ញវត្ថុ នៃសាធារណរដ្ឋស្លូវ៉ាគី លោក Peter Kazimir បានបញ្ជាក់ថា រដ្ឋាភិបាលស្លូវ៉ាគី បានត្រៀមជាស្រេចក្នុងការចែករំលែកបទពិសោធ ដែលស្លូវ៉ាកមាន ដល់កម្ពុជា ជាពិសេស ពាក់ព័ន្ធនឹងវិស័យហិរញ្ញវត្ថុសាធារណៈ។ លោកថ្លែងដូច្នេះ ក្នុងជំនួបជាមួយលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៦ ខែតុលា ឆ្នាំ២០១៨។ នេះបើតាមសេចក្តីជូនដំណឹងរបស់ក្រសួងសេដ្ឋកិច្ច ស្តីពីដំណើរទស្សនកិច្ចរបស់លោក Peter Kazimir នៅកម្ពុជា ពីថ្ងៃទី១៤ ដល់ ១៦តុលា ២០១៨។

លោក អូន ព័ន្ធមុនីរ័ត្ន ក្នុងជំនួបជាមួយលោក Peter Kazimir កាលពីថ្ងៃទី១៦តុលា ២០១៨ នៅទីស្តីការក្រសួងសេដ្ឋកិច្ច។ រូបថត៖ FB ក្រសួងសេដ្ឋកិច្ច

ជាការឆ្លើយតប លោក អូន ព័ន្ធមុនីរ័ត្ន បានសម្តែងអំណរគុណដល់ភាគីស្លូវ៉ាគី ចំពោះបំណងនេះ ហើយលោកក៏បានជម្រាបជូនវិញដែរថា កំណែទម្រង់លើវិស័យហិរញ្ញវត្ថុសាធារណៈ ជាកំណែទម្រង់ដ៏សំខាន់របស់រាជរដ្ឋាភិបាលកម្ពុជា។ លោកបន្តថា កម្ពុជា នឹងសិក្សាស្វែងយល់បន្ថែមទៀតនូវបទពិសោធរបស់ស្លូវ៉ាគី ដើម្បីជាប្រយោជន៍ដល់ការអនុវត្ត។

ជាមួយគ្នានេះ លោកអគ្គបណ្ឌិតសភាចារ្យ ក៏បានបង្ហាញនូវក្តីសង្ឃឹមថា កម្ពុជា-ស្លូវ៉ាគី នឹងពង្រឹងនូវទំនាក់ទំនងពាណិជ្ជកម្មទ្វេភាគី ការវិនិយោគ និងកិច្ចសហប្រតិបត្តិការផ្សេងៗជាច្រើនទៀត ដូចជា ការអប់រំ/ការអភិវឌ្ឍធនធានមនុស្ស ទេសចរណ៍ វប្បធម៌ សុខាភិបាល និងបច្ចេកវិទ្យាព័ត៌មានផងដែរ៕

អត្ថបទ៖ សំភី