ដើម្បីស្រូបទេសចរបរទេស រដ្ឋាភិបាលថៃលើកលែងទិដ្ឋាការប្រទេសចំនួន២១

2018-10-18 02:27:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលគ្រោងលើកលែងទិដ្ឋាការដល់ភ្ញៀវទេសចរបរទេសចំនួន ២១ប្រទេស នៅអំឡុងខែវិច្ឆកា និងខែធ្នូ ឆ្នាំ២០១៨ ខាងមុខ ក្រោយការធ្លាក់ចុះចំនួនទេសចរយ៉ាងខ្លាំង ជាពិសេសទេសចរចិន។

រូបភាព៖ Bangkok Post

គំនិតផ្ដួចផ្ដើមនេះត្រូវបានលើកឡើងដោយលោកឧបនាយករដ្ឋមន្រ្តីថៃ Somkid Jatusripitak ក្នុងគោលបំណងធានាទេសចរចិន ដែលបានធ្លាក់ចុះយ៉ាងខ្លាំង ក្រោយហេតុការណ៍លិចទូកនៅក្នុងសមុទ្រក្នុងខេត្តភូកេត កាលពីខែកក្កដា ២០១៨ កន្លងទៅ។

លោក Yuthasak Supasorn ប្រធានអាជ្ញាធរទេសចរណ៍ថៃបានបញ្ជាក់ថា លោកឧបនាយករដ្ឋមន្រ្តី Somkid Jatusripitak បានអនុញ្ញាតឲ្យការិយាល័យអន្តរប្រវេសន៍ លើកលែងទិដ្ឋាការដល់ប្រទេសចំនួន២១ រហូតដល់ចុងឆ្នាំ២០១៨។

ការលើកលែងទិដ្ឋការនេះរំពឹងថានឹងជួយទាក់ទាញភ្ញៀវទេសចរឲ្យកើនឡើងរហូតដល់ ៤០លាននាក់ កើនឡើងលើសគោលដៅដែលមាន ៣៨លាននាក់។ ក្នុងនោះ ភ្ញៀវទេសចរចិនអាចកើនឡើងរហូតដល់ ១២លាននាក់ ខណៈដែលគោលដៅគ្រោងទុកមានត្រឹមតែ ១០,៥លាននាក់។

ប្រតិបត្តិករទេសចរណ៍ឯកជនបានបង្ហាញការព្រួយបារម្ភថា ប្រទេសថៃអាចបាត់ភ្ញៀវទេសចរចិន ១លាននាក់ ក្នុងរយៈពេល ៦ខែ ប្រសិនបើប្រទេសថៃមិនអាចស្ដារទំនុកចិត្តលើបញ្ហាសុវត្ថិភាព។

សូមបញ្ជាក់ថា ប្រទេសថៃទទួលបានភ្ញៀវទេសចរបរទេសជាង ៣៥លាននាក់ កាលពីឆ្នាំ២០១៧ កន្លងទៅ ដែលក្នុងនោះ មួយភាគបីជាភ្ញៀវទេសចរចិន។ ប៉ុន្ដែចំនួនភ្ញៀវទេសចរចិនបានធ្លាក់ចុះគួរឲ្យកត់សម្គាល់ ក្រោយហេតុការណ៍លិចទូកនៅខេត្តភូកេត ដែលបានសម្លាប់ភ្ញៀវទេសចរចិនជិត ៥០នាក់៕

ប្រភព៖ Bangkokpost ប្រែសម្រួល៖ វាសនា